2 Korinto 5:1-21
5 Kadi tuzeye wo vo avo e saba kiaki, e nzo eto ova nsi ibanguka,* tukala ye nzo ituka kwa Nzambi, ke nzo yatungilwa muna moko ko, kansi ya mvu ya mvu kuna zulu.
2 Kadi tubumanga omu nzo* yayi, wau tuna ye tima diayingi diavuata ina* ya zulu,
3 dianu vo, vava tuvuata yo, ke tuwanuka nkonga ko.
4 Ozevo, oyeto tuna mu saba kiaki tubumanga ye zitu, e kuma kadi ke tuzolele kio vula ko, kansi tuzolele vuata kiankaka, kimana kina kiamfwe kiavua o moyo.
5 Ndiona watukubikila kio i Nzambi, yandi watuvana o mwanda se lusikidisu lwa mana mekwiza.*
6 Dianu vo, wau tuna ye vuvu kiasikila yo zaya vo ekolo tuna omu nzo eto muna nitu, twavavuka yo Mfumu,
7 kadi oyeto mu lukwikilu tukangalelanga, ke mu mbona meso ko.
8 Kansi tuna ye vuvu kiasikila yo zola vo twavavuka e nitu yayi kimana e nzo eto yakala kumosi yo Mfumu.
9 Diakala vo tuna yandi muna nzo, yovo twamvavuka, e kani dieto twatondakana kwa yandi.
10 Kadi yeto awonso tutelama* vana ndose a kunda kia lufundisu kia Kristu, kimana konso muntu kasendelwa mun’owu wa mavangu mandi ekolo kena muna nitu, makala mambote yovo mambi.
11 Dianu vo, wau tuzeye o vumi wa Mfumu, tukwamanananga kwikidisa wantu, kansi tutomene zayakana kwa Nzambi. Ngina ye vuvu vo tutomene zayakana mpe muna ntona zeno.
12 Ke tukuyisunzula diaka kwa yeno ko, kansi tunuwondelele nwayisana mu kuma kieto, kimana nwalenda vana e mvutu kw’awana bekuyisaninanga kaka muna mpwa, ke muna ntima ko.
13 Kadi avo twazengomoka, i mu kuma kia Nzambi; avo ke twazengomoka ko i mu kuma kieno.
14 Kadi o zola kwa Kristu kukutufilanga, e kuma kadi edi tuzeye vo muntu mosi wafwa muna wete dia wantu awonso; kadi awonso bafwa.
15 Wafwila awonso kimana awana bena moyo, balembi kadila diaka o moyo muna yau kibeni, kansi muna ndiona wabafwila yo fulwa.
16 Dianu vo, tuk’owau ke tuzeye kana muntu mosi ko mun’owu wa kinitu. Kana nkutu vo twakizayila Kristu mun’owu wa kinitu, ke tunzayidi diaka mu mpila yayi ko.
17 Dianu vo, avo muntu omo Kristu kena, i vangwa kiampa; lekwa yankulu iviokele; tala! e lekwa yampa isemeno.
18 Kansi lekwa yawonso kwa Nzambi yatuka, ona wavutulwisa e ngwizani eto yo yandi kibeni muna Kristu yo kutuvana uselo wavutulwisa e ngwizani,
19 i sia vo, muna Kristu, Nzambi wavutulwisa e ngwizani a nza ye yandi kibeni, ke badikanga diaka makuzuka mau ko, watuyekeka e nsangu za vutulwisa e ngwizani.
20 Dianu vo, oyeto tu akunzi,* twavinga vana fulu kia Kristu, vika sia vo Nzambi muna yeto kedodokelelanga wantu. Wau vo twavinga vana fulu kia Kristu, tuwondelele vo: “Vutulwisa e ngwizani yo Nzambi.”
21 Ndiona kasumuka ko, o Nzambi wankitula se kimenga kia masumu muna wete dieto, kimana muna yandi oyeto twalungiswa vana ndose a Nzambi.
Mvovo vana yand'a lukaya
^ Yovo “ibetomoka.”
^ Yovo “kalu.”
^ Yovo “diavuata e kalu kieto kina kia.”
^ Yovo “mfutu.”
^ Yovo “tusenzekwa.”
^ Yovo “antumwa.”
