2 Korinto 6:1-18
6 Wau tusalanga yandi kumosi, tunuwondelele nwalembi tambula e nsambu za Nzambi nkatu-nkatu.
2 Kadi wavova vo: “Muna ntangwa dienga, iwididi, muna lumbu kia luvuluzu isadisi.” Eyayi i ntangwa dienga. Owau i lumbu kia luvuluzu.
3 Ke tutesesa nkutu muntu sakuba ko muna konso diambu, kimana uselo weto walembi tumbwa;
4 kansi muna mawonso tukuyisonganga vo tu selo ya Nzambi, muna luzindalalu lwayingi, muna lubangamu, muna nkondelo, muna mpasi,
5 muna ngwandwa, muna pelezo, muna nkindu, muna mfuntuka, muna nkondelo a tulu, muna nkondelo a madia;
6 muna velela, muna zayi, muna luzindalalu, muna walakazi, muna mwand’avelela, muna zola kwa kondwa kivunina,
7 muna diambu dialudi, muna nkum’a Nzambi; muna nwaninwa ya ndungidi kuna koko kwalunene ye kwalumonso,*
8 muna nkembo ye luvezo, muna nsangu zambi ye nsangu zambote. Tubadikilwanga se akwa luvunu, kinga tu akwa ludi,
9 nze wantu balembi zayakana, kinga tuzayakene, nze wantu bafwa,* kinga tuna moyo, nze yeto twatumbwa, kinga ke twayekolwa muna lufwa ko,
10 nze yeto tuna mu ntantu, kinga mu kiese tuna, nze tu asukami kinga ayingi tuvuamisanga, nze ke tuna ye má ko, kinga tuvuidi lekwa yawonso.
11 Tubatwini nua mieto kwa yeno esi Korinto, tuziwidi mpe ntima mieto.
12 Ke tukulwidi o zola kweto ko omo yeno, kansi oyeno nukulwidi o zola kweno omu yeto.
13 Dianu vo, inuvovesele nze wan’ame—nuvanga diau adimosi mu kuma kieto—nuziula e ntima mieno.
14 Ke nukadi kintwadi ye mindembi-kwikila ko. Kadi nkia ngwizani ina vana vena unsongi ye umpumbulu? Nga ntemo ulenda kala e ntwadi ye tombe?
15 Nkia ngwizani ina vana vena Kristu yo Beliale?* Yovo, nkia ngwizani ina vana vena munkwikizi ye mundembi-kwikila?
16 Nkia ngwizani ina e tempelo a Nzambi ye teke? Kadi oyeto tu tempelo a Nzambi amoyo; wauna Nzambi kavova vo: “Ikala vana bena yo kangala yau, ikala Nzambi au, oyau bekala nkangu ame.”
17 “‘Dianu vo, nukatuka vana bena, nubavambuka,’ u kavovele Yave, ‘ke nusimbi má kiafunzuka ko’”; “‘ikunutambula.’”
18 “‘Omono ikala se kuna kwa yeno, oyeno nukala wan’ame amakala ye amakento,’ u kavovele o Yave wa Mpungu-ngolo.”
Mvovo vana yand'a lukaya
^ Dilenda kala vo, kimosi kia nwanina, kiankaka muna kuyitanina.
^ Yovo “twafwanukina lufwa.”
^ Mvovo a Kiyibere una ye nsas’a vo, “Wakondwa Mfunu.” Satana uyikanga.
