2 Korinto 7:1-16
7 Dianu vo, azolwa, wau tuna ye nsilu miami, yambula twayivelelesa muna usafu wawonso wa nitu ye mwanda, twazikuka muna velela muna vumi wa Nzambi.
2 Nututambula muna ntima mieno. Ke tuvangidi muntu mbi ko, ke tusafwidi muntu ko, ke tuvunini muntu ko kimana twavua nluta.
3 Kivovele wo ko kimana yanuvana ngielele. Kadi ntekele wo vova vo luna muna ntima mieto kimana twafwa kumosi yo kala moyo kumosi.
4 Ngina yo unkabu wayingi wa vovana yeno. O lusanu lwame omu yeno lwayingi. Nzadidi ye lufiaulwisu; kiese kiayingi ngina kiau muna mpasi zeto zawonso.
5 Kadi vava twaluaka omu Makedonia, e nitu zeto ke zavevoka ko, twakwamanana mweswa e mpasi za mpila zawonso—nkindu kuna mbazi ye wonga muna kati.
6 Kansi, Nzambi ona ofiaulwisanga awana babudika e ntima, watufiaulwisa muna ngiz’a Tito;
7 ke mu ngiz’andi kaka ko, kansi muna mfiaulwiswa mpe ina kafiaulwiswa kwa yeno, utusamunwini e tima dieno dia kumbona, e dilu kieno, ye ntokani zeno* mu kuma kiame; kimana yayangalala kwayingi.
8 Kanele vo yakunumwesa e ntantu muna nkand’ame, kikuyibanzanga ko. Kanele vo kuna lubantiku yakuyibanza, (wau mbwene vo o nkanda wauna ntantu wanumwesa, kana una vo mu kolo kiandwelo kaka),
9 owau ngiangalele, ke mu kuma kia ntantu nwamweswa ko, kansi mu kuma kia ntantu zeno za luviluku lwa ntima. Kadi e ntantu nwamweswa ngwizani zina ye luzolo lwa Nzambi, kimana nwalembi mona e mpasi mu kuma kieto.
10 Kadi e ntantu zina ngwizani ye luzolo lwa Nzambi zitwasanga luviluku lwa ntima yamuna luvuluzu, ke za kuyibanza ko; kansi e ntantu za nza zitwasa lufwa.
11 Kadi e ntantu zina ngwizani ye luzolo lwa Nzambi nwamweswa, zinutwasidi e tima diayingi, luveleleso, makasi, vumi, viangi* kiayingi, vema, nlandu a kunda! Muna mambu mawonso nusongele vo ke luna ye kuma ko muna diambu diadi.
12 Kanele vo yanusonekena, kiavanga wo mu kuma kia ndiona wavanga edi diambi ko, ngatu ndiona wavangwa e mbi, kansi yanusonekena kimana e tima dieno omu yeto diamoneka vovo nwina vana ndose a Nzambi.
13 Muna diadi i tufiaulwisilu.
Kansi vana ntandu a lufiaulwisu lweto, tuyangalele kikilu muna kiese kia Tito, e kuma kadi yeno awonso nuvuvikidi o ntim’andi.*
14 Kadi avo ikisanini vana ndose andi mu kuma kieno, kifusukilu nsoni ko; kadi wauna twanuvovesela mawonso muna ludi, o lusanu lweto mpe muna Tito, lwa ludi.
15 O zola kwandi mpe muna yeno kuwokelanga vava kesungamenanga o nlemvo weno ye ntambula nwantambula kuna vumi yo zitu.
16 Ngiangalele muna mawonso nuvanganga, ngina ye vuvu* omu yeno.
Mvovo vana yand'a lukaya
^ Sina, “vema kweno.”
^ I sia vo, nsatu za monana yo muntu.
^ Sina, “mwand’andi.”
^ Dilenda kala vo, “ngina ye unkabu.”
