2 Korinto 8:1-24
8 Ampangi, owau tuzolele kunuzayisa oma ma nsambu za Nzambi zina zavewa kwa nkutakani za Makedonia.
2 Muna lutonto lwayingi lwa mpasi, o wokela kwa kiese kiau yo usukami wau wayingi, wawokesa umvuama wau wavanina kuna mvevo.
3 Kadi bavangila wo mun’owu wa ndendelo zau, nsidi umbangi vo bavanina nkutu lutila e ndendelo zau,
4 kadi yau kibeni batudodokele kimana bavewa e lau diavanina kuna mvevo yo sadisa aveledi.
5 Bavangidi nkutu lutila una twayindulanga, entete bakivana muna Mfumu ye kwa yeto mpe muna luzolo lwa Nzambi.
6 Dianu tukasakese Tito kafokola e salu kia tambula tukau tweno twamvevo, kadi yandi wayantika kio vovo nwina.
7 Kansi, wauna nuvuamini muna mawonso, muna lukwikilu, muna mvovo, muna zayi, muna tima diawonso yo muna zola kweto muna yeno, nuvuamina mpe muna vanina kuna mvevo.
8 Ediadi mpovele ke nsiku ko, kansi mpovele dio mu kunusonga e tima dia wantu ankaka yo zaya e ziku kia zola kweno.
9 Kadi nuzeye zo e nkenda za Mfumu eto Yesu Kristu, kana una vo mvuama kakala, wasukama muna diambu dieno, kimana oyeno nwavuamina muna usukami wandi.
10 E ngindu zame muna diambu diadi i zazi: E salu kiaki i muna wete dieno, kadi mvu amvimba uviokele kala tuka nwayantikila e salu kiaki, ke nusalanga kio kaka ko, kansi nusonganga mpe luzolo lwa lungisa kio.
11 Dianu vo, nufokola e salu kina nwayantika, kimana e tima dieno dia sala dialungana mun’owu wa ndendelo zeno.
12 Kadi avo luzolo lwa vana luna vo, ditondakana kwa Nzambi, musungula avo muntu ovanini mun’owu wa kina kena kiau, ke mun’owu wa kondwa ko.
13 Kadi kizolele ko vo diakala diasazu kuna kw’akaka, kansi diampasi kuna kwa yeno;
14 owau yambula ulolo wa lekwa yeno yalungisa e nsatu zau, ulolo wa lekwa yau mpe yalungisa e nsatu zeno kimana vakala ye mfwanani.
15 Wauna wasonama vo: “Ndiona wakala ye yayingi, kakala ye nsuvila ko, ndiona wakala ye yakete, kakondwa má ko.”
16 Matondo kwa Nzambi wau kasia muna ntim’a Tito e tima edi tuna diau mpe mu kuma kieno,
17 e kuma kadi, wau katambwidi lukasakeso lweto, una ye tima diayingi diakwiza kwa yeno muna luzolo lwa yandi kibeni.
18 Kansi tuntumini kumosi yo mpangi ona ozitiswanga muna nkutakani zawonso muna diambu dia nsangu zambote.
19 Ke diau kaka ko, kansi wasolwa mpe kwa nkutakani kimana kakala nkw’eto muna nkangalu, wau tulunga-lunganga o lukau lwalu muna nkembo a Mfumu yo songa e tima dieto dia sadisa ankaka.
20 Ke tuzolele ko vo muntu kasolola o bi omu yeto wau tulunga-lunganga lukau lwalu lwa mvevo.
21 Kadi oyeto ‘tulunga-lunganga mawonso muna unsongi, ke vana ndose a Yave kaka ko, kansi vana ndose a wantu mpe.’
22 Vana ntandu, tubatumini kumosi yo mpangi eto ona twatonta nkumbu miayingi yo soloka vo nkwa tima muna mambu mayingi, kansi owau una ye tima diayingi, e kuma kadi vuvu kiayingi kekunubundanga.
23 Avo lukatikisu luna lwau mu kuma kia Tito, yandi i nkw’ame, kumosi tusalanga muna wete dieno; avo lukatikisu luna lwau mu kuma kia mpangi zeto, oyau i ntumwa za nkutakani ye nkembo a Kristu.
24 Dianu vo, nubasonga ziku kia zola kweno yo songa kwa nkutakani zawonso e kuma tukuyisaninanga muna yeno.
