2 Korinto 9:1-15
9 Vo i diambu dia sadisa aveledi, ke dina kwandi mfunu ko dia kunusonekena,
2 kadi nzeye luzolo lweno, luna ikuyisaninanga kwa esi Makedonia, avo se mvu amvimba uviokele kala tuka esi Akaya bakubamene, o vema kweno kuyangumwini ayingi muna yau.
3 Kansi ntumini ampangi, kimana o lusanu lweto mu kuma kieno lwa lembi kala lwankatu muna diambu diadi, nukala kaka nwakubama wauna yavova.
4 Nkwa kala vo, esi Makedonia avo bezidi yame yo kunuwana vo ke nwakubama ko, oyeto—muna lembi vova vo oyeno—nsoni tufusuka wau tukunubundanga e vuvu.
5 Dianu ngindulwidi vo diamfunu dia kasakesa ampangi bateka kwiza kwa yeno, nwakubika lukau lwa mvevo luna nwateka sila o nsilu, kimana lwakala se lukau lwa mvevo, ke lwa komekenwa ko.
6 Muna diambu diadi, konso ona okunina kuna mbaba,* kuna mbaba mpe kekutikila, konso ona okunina kuna mvevo, kuna mvevo mpe kekutikila.
7 Konso muntu yambula kavanga wauna kakanini muna ntim’andi, ke mu lukendalalu* ko ngatu komekenwa, kadi Nzambi mvani amvevo kezolanga.
8 Vana ntandu, Nzambi wafwana kunuwokesela e nsambu zandi zawonso kimana konso ntangwa nwavua yawonso nuvuidi o mfunu, nwakala ye lekwa yayingi muna sala e salu yawonso yambote.
9 (Wauna wasonama vo: “Ovene tukau twayingi;* okayidi kw’asukami. O unsongi wandi ukala yakwele mvu.”
10 Ndiona owokesanga mbongo kwa nkuni ye mbolo kwa ndie, osinga kunuvana ye kunuwokesela mbongo kimana nwakuna, owokesa mpe mbongo a unsongi weno.)
11 Nuvuamiswanga muna lekwa yawonso kimana nwavanina kuna mvevo wawonso, ediadi dikutufilanga mu vutula matondo kwa Nzambi;
12 kadi e salu kiaki ke kilungisanga kaka nsatu za aveledi ko, kansi kisalwanga mpe kimana wantu ayingi bavutula matondo kwa Nzambi.
13 E salu kiaki kitomene songa mpila wantu nwina, wantu bakembelele Nzambi mu kuma kia lusakalalu lweno muna nsangu zambote nusamunanga mu kuma kia Kristu, kadi nusongele ntim’a mvevo muna lukau lweno kuna kwa yau ye kw’awonso.
14 Badodokele Nzambi mu kuma kieno yo kunusonga o zola mu kuma kia ulolo wa nsambu za Nzambi zina nwavewa.
15 Matondo kwa Nzambi muna lukau lwandi lwangovo lulembi tangakana.
