2 Petelo 3:1-18
3 Azolwa, owau i nkanda wanzole inusonekene, omu nkanda wau ye una wantete, nsikamese nyindu mieno mia kiá muna kunususumuna,
2 kimana nwasungamena mambu mateka vovua* kwa ngunza zavauka yo nkanikinu a Mfumu yo Mvuluzi muna ntumwa zeno.
3 Entete nuzaya edi vo, muna lumbu yambaninu mukwiza akwa luvezo ye tuvezo twau, belanda e zolela yau
4 yo vova vo: “O nsilu a ngiz’andi, aweyi? Kadi tuka muna lumbu kina mase meto baleka muna lufwa, mambu mawonso makinu wauna makala kuna lubantiku lwa nsema.”
5 Kadi kuna lukanu, ke bazolele zaya e ziku kia diambu diadi ko vo, tuka kuna nz’ankulu e zulu diakala, o ntoto wasikidisilwa muna maza, muna kati kwa maza muna mvovo a Nzambi;
6 muna mama mpe e nza ya tandu kiakina yafwasilwa vava yazala yo maza.
7 Muna mvovo wau umosi e zulu ye nza ina owau yalundilwa muna tiya, ilundwanga yamuna lumbu kia lufundisu ye kia lufwasu lwa mindembi vumina Nzambi.
8 Dianu vo, azolwa, ke nuvilakani diambu diadi ko, e lumbu kimosi kuna kwa Yave kina nze funda dia mvu, e funda dia mvu mpe nze lumbu kimosi.
9 O Yave ke nkwa fuki ko muna lungisa nsilu andi, nze una wantu ankaka beyindulanga vo nkwa fuki, kansi ozindalalanga kaka, kadi kazolele ko vo muntu kafwa, kansi, awonso baluaka muna luviluku lua ntima.
10 E lumbu kia Yave nze mwivi kikwizila, muna lumbu kiakina e zulu divempoka kuna mazu mayingi, e lekwa ya zulu ye ya nza yizelokela muna mbangazi, e nza ye mavangu mandi mesenzekwa.
11 Wau vo e lekwa yayi yawonso yizeloka nzeloka yayi, nutoma yindula e mpila wantu nufwete kala muna nkadilu yavauka ye mavangu ma vumi wa Nzambi,
12 wau nuvingilanga yo sutila* e ngiz’a lumbu kia Yave, kina kikala vo e zulu dibomonwa vana tiya, e lekwa yizeloka muna mbangazi!
13 Kansi mun’owu wa nsilu andi tuvingilanga e zulu diampa ye nz’ampa, i mûna mukala unsongi.
14 Dianu vo, azolwa, wau nuvingilanga mambu mama, nuvanga mawonso kimana kanuwana kuna luvuvamu, nwakondwa e tona ye twangu.*
15 Vana ntandu, nubadikila luzindalalu lwa Mfumu eto se luvuluku, wauna Paulu wa mpangi eto anzolwa kanusonekena mun’owu wa ngangu zina kavewa,
16 vava kayika mambu mama nze una kavanga muna nkanda miandi miawonso. Kansi, o maka mambu mena mo mampasi kikilu muna bakula, mena vo ana bena ku bubu* yo lembi sikila bebendomonanga mo, nze una bevanganga mpe muna Sono yankaka, muna lufwasu lwa yau kibeni.
17 Vo i yeno azolwa, wau nutekele zaya mambu mama, nuyikenga kimana nwalembi vengomonwa kumosi kwa bi wa yimpumbulu yo kunkuka muna sikila kweno.
18 Kansi, nukwamanana nungunuka muna nsambu yo zayi wa Mfumu eto ye Mvuluzi Yesu Kristu. Kuna kwa yandi nkembo, tuk’owau yamu mvu ya mvu. Amen.
Mvovo vana yand'a lukaya
^ Yovo “mambu masakulwa.”
^ Yovo “lakukil’o moyo.”
^ Yovo “mvindu.”
^ Yovo “balembele zaya.”
