2 Tesalonika 1:1-12
1 Paulu, Silwano* yo Timoteo, kuna kwa nkutakani ya esi Tesalonika muna Nzambi wa Se dieto yo Mfumu Yesu Kristu:
2 Nsambu koko nwina ye luvuvamu lutuka kwa Nzambi wa Se yo Mfumu Yesu Kristu.
3 Ampangi, ntangwa zawonso tusianga sungididi kiavutula matondo kwa Nzambi mu kuma kieno. Ediadi diansongi, e kuma kadi lukwikilu lweno lusikidi kikilu, o zola muna muntu yo nkw’andi kuwokelanga.
4 Dianu vo, tukuyisananga vana vena nkutakani za Nzambi muna diambu dia lukwikilu lweno ye luzindalalu muna lubangamu ye mpasi zawonso numonanga.*
5 E kiaki i ziku kia mfundis’ansongi a Nzambi, eyi inufwanisi mu kota muna Kintinu kia Nzambi kina numwenang’e mpasi.
6 Kadi diansongi kikilu kuna kwa Nzambi kaland’e kunda kw’awana bekunumwesang’e mpasi.
7 Kansi kwa yeno numweswang’e mpasi, nuvevolwa kumosi yo yeto muna lusengomoko lwa Mfumu Yesu tuka kuna zulu kumosi ye mbasi zandi zankuma,
8 muna tiya twanyuyi, kalanda e kunda kw’awana balembi zaya Nzambi ye kw’awana ke belemvokelanga ko e nsangu zambote mu kuma kia Mfumu eto Yesu.
9 Wantu awaya bevewa tumbu kia lufwasu lwa mvu ya mvu, tuka vana ndose a Mfumu ye muna nkembo a nkum’andi,
10 vava kekwiza mu kembeswa ye aveledi andi yo sivikwa muna lumbu kiakina kw’awonso ana bekwikilanga, e kuma kadi nwakwikila o umbangi twanusila.
11 E kiaki i kuma tukunusambidilanga ntangwa zawonso kimana Nzambi eto kanufwanisa muna dina kanubokelela ye muna nkum’andi kalunganesa emvimba mawonso mambote kazolele ye konso salu kia lukwikilu.
12 Muna mpila yayi e nkumbu a Mfumu eto Yesu ikembelwa muna yeno, oyeno mpe muna yandi, mun’owu wa nsambu za Nzambi eto yo Mfumu Yesu Kristu.
