2 Tesalonika 2:1-17
2 Dianu vo, ampangi, muna diambu dia ngiz’a Mfumu eto Yesu Kristu ye nkutakeswa tukutakeswa kumosi yo yandi, tunuwondelele vo
2 ke nuviki vilakeswa muna nyindu mieno ko ngatu telamwa e mioyo, kana muna diambu diavumunwinwa* yovo muna nsangu ngatu muna nkanda ulenda moneka vo kwa yeto utukidi, mu songa vo e lumbu kia Yave kilueke.
3 Ke vakadi muntu ko kanuvunginika* muna konso diambu, e kuma kadi ke kikwiza ko yavana umpengomoki uteka kwiza yo sengomona muntu a sumu, mwan’a lufwasu.
4 Yandi i ntantu, uyisidi vana ntandu awonso beyikilwanga vo nzambi yovo má kisambilwanga,* ovuende muna tempelo a Nzambi, uyisongele se nzambi vana meso ma ndonga.
5 Nga ke nusungamene wo ko vo mambu mama yakunusamunwina mo vava yakala yeno?
6 Owau ona wina se nkaku nunzeye, osengomonwa muna ntangwa yasikidiswa.
7 Kieleka, o muntu a sumu ndioyo una se mbumba, mu sala se kena, kansi okala kaka se mbumba yavana kikatuka ndiona una se nkaku.
8 I bosi, o muntu a sumu osengomonwa, Mfumu Yesu okumfwasila muna mwand’a nua andi yo kumfukisa emvimba muna lusengomono lwa ngiz’andi.
9 Kansi, o muntu a sumu wizidi muna lusadisu lwa Satana yo mavangu mawonso mankuma ye sinsu yaluvunu ye masivi,
10 yo vilwa wawonso uvukikanga awana bena muna nzil’a lufwasu, e kuma kadi ke batambwidi zola kwa ludi ko kimana bavuluzwa.
11 Kiaki i kuma o Nzambi kabayambulwidi vo bavukumunwa kimana bakwikila muna luvunu,
12 kimana yau awonso bafundiswa, kadi ke bakwikidi muna ludi ko kansi bayangalele kaka muna vilwa.
13 Dianu vo, ampangi azolwa kuna kwa Yave, ntangwa zawonso tusianga sungididi kiavutula matondo kwa Nzambi mu kuma kieno, e kuma kadi tuka kuna lubantiku o Nzambi wanusola muna luvuluku wau kanuvelelesa muna mwand’andi ye muna lukwikilu lweno muna ludi.
14 Muna diadi i kanubokelela muna nsangu zambote tusamunanga, kimana nwatambula o nkembo wa Mfumu eto Yesu Kristu.
15 Dianu vo ampangi, nusikila yo simbinina o tusansu tuna nwalongwa, kana muna nsangu yovo muna nkanda watuka kwa yeto.
16 Yambula yandi kibeni Mfumu eto Yesu Kristu yo Nzambi wa Se dieto ona watuzola yo kutuvana lufiaulwisu lwa mvu ya mvu ye vuvu kiasikila muna nsambu zandi,
17 kafiaulwisa e ntima mieno yo kunusikidisa muna mavangu ye mambu mawonso mambote.
Mvovo vana yand'a lukaya
^ Yovo “kwa mwanda.” Tala Nsas’a Mvovo, “Mwanda.”
^ Yovo “kanuvukumuna.”
^ Yovo “kikundwanga.”
