2 Tesalonika 3:1-18
3 Vo i mambu mankaka ampangi, nutusambidilanga kimana e diambu dia Yave diamwangana mu nzaki yo kembelwa wauna uvangamanga vovo nwina,
2 twavuluzwa vana vena akwa nsoki ye yimpumbulu, kadi ke wantu awonso ko bena yo lukwikilu.
3 Kansi Mfumu nkwa kwikizi, okunukumika yo kunutanina muna ndiona wambi.
4 Vana ntandu, muna kuma kieno, tuna ye vuvu muna Mfumu vo nusadilanga ye nukwamanana sadila nkanikinu mieto.
5 Yambula o Mfumu kakwamanana fila e ntima mieno muna zola kwa Nzambi yo muna luzindalalu muna diambu dia Kristu.
6 Tunukanikini ampangi muna nkumbu a Mfumu eto Yesu Kristu, nuvavuka konso mpangi okangalelanga nkangal’ambi, ke mun’owu wa nkanikinu ko mina nwatambula* kwa yeto.
7 Kadi yeno kibeni nuzeye una nufwete kututanginina, e kuma kadi oyeto ke twakangalela nkangal’ambi ko vovo nwina,
8 ngatu dia madia mangani e ngovo.* Kansi, twafuntukanga yo sala fuku yo mwini kimana twalembi kala se zitu diampwena kwa konso muntu mu yeno.
9 Ke sia ko vo ke twakala ye wisa ko, kansi twazola vo yeto kibeni twakala se mbandu ina nutanginina.
10 Kieleka, vava twakala yeno, twanukanikina vo: “O muntu avo kazolele sala ko, kadie ko.”
11 Kadi tuwidi wo vo ankaka vovo nwina nkangal’ambi bekangalanga, ke besalanga nkutu ko, kansi ayakami a mambu mangani.
12 O wantu awaya, tubakanikini yo kubawondelela muna Mfumu Yesu Kristu vo basadila kuna luvuvamu yo dia madia ma salu kia moko mau.
13 Vo i yeno ampangi, ke nuyambula vanga edi diambote ko.
14 Kansi avo muntu kazolele lemvokela ko edi tuvovele mu nkanda wau, nunsia e dimbu, nuyambula kala yandi e ntwadi, kimana kamona e nsoni.
15 Ke numbadikila nga mbeni ko, kansi nukwamanana kunludika nze mpangi.
16 Yambula Mfumu a luvuvamu kanuvan’o luvuvamu ntangwa zawonso ye muna mambu mawonso. O Mfumu kakala yo yeno awonso.
17 I mavimpi mame mama, mono Paulu, kiaki i dimbu kia koko kuame muna nkanda miawonso; eyayi i nsonek’ame.
18 E nsambu za Mfumu Yesu Kristu zakala yo yeno awonso.
