2 Timoteo 1:1-18
1 Paulu, wa ntumw’a Kristu Yesu muna luzolo lwa Nzambi mun’owu wa nsilu a moyo wina muna Kristu Yesu,
2 kuna kwa Timoteo wa mwan’ame anzolwa:
Yambula wakala ye nsambu, nkenda yo luvuvamu lutuka kwa Nzambi wa Se yo Kristu Yesu wa Mfumu eto.
3 Ntondele Nzambi ona nsadilanga e salu kiavauka ye ntona zavelela wauna wavanga akulu ame, ikwamanananga kuyika muna ndodokela zame fuku yo mwini.
4 Wau nsungamene mansanga maku, ngina ye tima diamonana yaku kimana yazadiswa ye kiese.
5 Kadi nsungamene o lukwikilu lwaku lwakondwa kivunina, luna lwateka kala muna nkak’aku ankento Loi ye muna ngudi aku Yunike, ngina ye vuvu vo luna mpe omo ngeye.
6 Muna kuma kiaki, isusumwini wasadila o lukau lwa Nzambi kuna vema, luna watambula vava yayambika o moko mame.
7 Kadi o Nzambi katuvene mwand’a unkuta* ko, kansi wankuma kaka yo zola ye lulungalalu.
8 Dianu vo, kumwena umbangi wa Mfumu eto nsoni ko, ngatu wa mono mbakami andi, kansi zizidila kaka e mpasi muna diambu dia nsangu zambote, bundanga e vuvu muna nkum’a Nzambi.
9 Watuvuluza yo kutubokela e mbok’avelela, ke mu kuma kia mavangu meto ko, kansi mu kuma kia kani diandi ye nsambu zandi, zina twavaninwa muna Kristu Yesu tuka tandu yavioka,
10 kansi owau zitomene zayakana muna nsengomok’a Kristu Yesu wa Mvuluzi eto, ona wasukisa lufwa yo kutusonga una tuvuila moyo ye nitu ilembi wola muna nsangu zambote,
11 zina yatumbikilwa se nteleki, ntumwa ye nlongi.
12 Ekiaki i kuma imwenanga e mpasi zazi, kansi kimonanga nsoni ko. Kadi nzeye Ndiona nkwikidi, ngina ye vuvu vo olenda lunda kina inyekekele yamuna lumbu kiakina.
13 Simbinina e mbandu a mambu mavimpi* mana wawá kwa mono muna lukwikilu yo zola kuna muna Kristu Yesu.
14 Lunda eki kiambote oveno muna mwand’avelela, owu wina omu yeto.
15 Ozeye dio vo awonso bena mu mvivu a Asia bamfididi e nima, kumosi mpe yo Fungelo yo Emongene.
16 Yambula o Mfumu kasonga walakazi kwa esi nzo a Onesiforo, kadi nkumbu miayingi kankumika, kamwena tuvambu twame nsoni ko.
17 Vava kakala kwaku Roma, kakumpava ye fululu kiawonso yavana kansolola.
18 O Mfumu yambula kansadisa kamona e nkenda za Yave muna lumbu kiakina. Ongeye otomene zaya e salu yawonso kasala muna Efeso.
