2 Timoteo 2:1-26
2 Dianu vo, ongeye mwan’ame, kwamanana vua nkuma muna nsambu zina muna Kristu Yesu;
2 o mambu mana wawá kwa mono, mana masilwa umbangi kwa wantu ayingi, yekeka mo kwa akwa kwikizi, ana bafwana mo longa kwa ankaka.
3 Nze kesa diambote dia Kristu Yesu, kubama muna zizidila e mpasi.
4 Ke vena kesa ko okuyivananga* muna salu yankaka ya zingu,* kimana kayangidika ndiona wansoneka mu salu kia kikesa.
5 Diau dimosi mpe muna nsaka, konso muntu okotele mo, avo kazitisi nsiku mia nsaka ko ke tambula kolowa ko.
6 O mvati a nsengo ona ofuntukanga, yandi i wantete ofwete dia mbongo.
7 Toma badikanga edi mpovele; o Mfumu okuvana umbakuzi muna mambu mawonso.
8 Sungamena dio vo Yesu Kristu ona wafulwa muna mafwa, mbongo a Davidi kakala, mun’owu wa nsangu zambote isamunanga,
9 zina imwenang’e mpasi yo siwa mu pelezo nze kimpumbulu. Kansi e diambu dia Nzambi ke diakangama ko.
10 Dianu izizidilanga mambu mawonso mu diambu dia awana basolwa, kimana oyau mpe bavua luvuluku muna Kristu Yesu yo nkembo a mvu ya mvu.
11 E diambu diadi diaziku: Avo tufwa yandi kumosi, kumosi mpe tukadila yandi o moyo;
12 avo tuzizidila, tuyala yandi mpe se atinu; avo tumvakwidi o nkalu, oyandi mpe okutuvakwila o nkalu;
13 avo tukondwa kwikizi, yandi osikila ye kwikizi, kadi kalendi kuyivakulwila nkalu ko.
14 Ubasungamesa mambu mama, ubalongela* vana ndose a Nzambi, ke batantani mu kuma kia mvovo ko, ke dina nkutu mfunu ko, e kuma kadi ditwasa mpasi* kw’awana bewanga.
15 Vanga wawonso wayisonga kwa Nzambi vo wafwana, u nsadi wakondw’e nsoni, otoma sasilang’e diambu dia ludi.
16 Kansi, tina moko yakondwa mfunu ina itiangunanga oma mavelela, kadi iwokesanga e fu kia lembi vumina Nzambi,
17 e diambu diau disayana nze mputa iyandangananga. Imènai yo Fileto i ankaka muna yau.
18 Wantu awaya bavengomoka muna ludi, bevovanga vo lufuluku lwavangama kala, bebendomonanga lukwikilu lw’akaka.
19 Kana una vo i wau, e nkubilw’a nsiami a Nzambi yasikila kikilu, ina ye dimbu eki, “Yave ozeye awana bavuilu kwa yandi,” ye “Konso ndiona ovovelanga nkumbu a Yave, kafwete yambula o vilwa.”
20 Muna nzo ampwena, ke mu kalanga kaka salanganu* ya wolo ye palata ko, kansi ya nti ye tûma mpe, yankaka ya zitu, kansi yankaka ke ya zitu ko.
21 Dianu vo, avo muntu ovavukidi eyi ke ya zitu ko, okala se salanganu* kia zitu, kiavelela, kiamfunu kuna kwa mfumu andi, kiakubamena muna konso salu kiambote.
22 Tina zolela ya kileke, kansi tatidila unsongi, lukwikilu, zola, luvuvamu kumosi ye awana bevovelanga Mfumu ye ntima miavelela.
23 Tina mpaka za uzowa ye za udinda, wau ozeye wo vo nkindu zitwasanga.
24 Kadi ntaudi a Mfumu kafwete nwana ko, kansi kakala kaka nkwa ngemba* kw’awonso, ozeye longa, ozizidilanga e mbi,
25 olongelanga afidi a mpaka kuna lulembamu. Kana vo Nzambi okubavana luviluku lwa ntima* luna lukubafila mu vua zayi wasikila wa ludi,
26 bavunguka* o zayi yo vuluka muna sokolo dia Nkadi ampemba, wau vo kimoyo babakama kimana bavanga luzolo lwandi.
Mvovo vana yand'a lukaya
^ Sina, “okuyikankalakesanga.”
^ Dilenda kala vo, “salu ya lumbu ke lumbu.”
^ Sina, “ubasila umbangi una ufwene.”
^ Yovo “difwasa; dibangula.”
^ Yovo “yinzu.”
^ Yovo “kinzu.”
^ Yovo “ndekwa.”
^ Yovo “soba e ngindu.”
^ Yovo “bavutukila.”
