2 Timoteo 3:1-17
3 Kansi, zaya edi vo, muna lumbu yambaninu mukwiza nsungi zampasi.
2 Kadi wantu bekala akwa kizola, minzol’a nzimbu, akwa lusanu, akwa lulendo, akwa lutiangu, akolami a se ye ngudi, ntokozi,* minkondwa kwikizi,
3 minkondwa nzolani a ungudi, minkondwa ngwizani, akumbi, minkondwa volo, akwa nganzi, mindembi zola mawete,
4 ayekodi, akwa mpaka, bazola kuyitundidika, azodi a nkembo ke mu Nzambi ko,
5 bena nze yau bevuminanga Nzambi, kansi o nkum’andi bavakwidi wo nkalu, awaya ubavengomoka.
6 Muna wantu awaya i mutukanga akala bevumvulanga muna nzo zangani kuna ngangu yo bunduna akento atovoka ana bazele ye masumu yo filakeswa kwa zolela ya mpila mu mpila,
7 belongokanga ntangwa zawonso, kansi yau ke bavue zayi wasikila wa ludi.
8 Wauna Yane yo Yambere batelamena Mose, wantu awaya mpe betelamenanga e ludi. E nyindu miau miayiva kikilu, ke bafwana ko mun’owu wa lukwikilu.
9 Dianu vo, ke benungunuka diaka ko, kadi uzowa wau utomene moneka kw’awonso, wauna wakala kwa Yane yo Yambere.
10 Kansi, ongeye watoma landa malongi mame, mpila zingu kiame, e kani diame, lukwikilu lwame, ntim’ame a vunda, nzol’ame ye luzindalalu lwame,
11 lubangamu ye mpasi nze zina yamona kuna Antiokia, Ikonio ye Luseta. Yazizidila lubangamu lwalu, o Mfumu wampuluza muna mbangama zazi zawonso.
12 Dianu vo, awonso ana bazolele zingila e ngwizani yo vumi wa Nzambi muna Kristu Yesu bangikwa bebangikwa.
13 Vo i wantu ambi ye akwa luvunu, besakisa vanga o bi, bevukumunanga ankaka yo vukumunwa.
14 Vo i ngeye, kala kaka muna mambu walongwa yo kwikidiswa, wau ozeye awana balonga mo,
15 tuka muna kinsedia ozeye sono yavelela, ina ilenda kuvana ngangu yamuna luvuluku muna lukwikilu muna Kristu Yesu.
16 Sono yawonso yavumunwinwa kwa Nzambi, yamfunu muna longa, muna tumba, muna singika mambu, muna ludika kuna unsongi,
17 kimana muntu a Nzambi kakala watoma fwana, watoma kubama muna mavangu mawonso mambote.
Mvovo vana yand'a lukaya
^ I sia vo, muntu olembi tondanga.
