2 Timoteo 4:1-22
4 Omono ikanikini vana ndose a Nzambi yo Kristu Yesu, ona ofundisa awana bena o moyo ye awana bafwa, muna lusengomoko lwandi ye Kintinu kiandi:
2 Samuna e diambu; kwamanana dio samuna muna ntangw’ambote ye muna ntangw’ampasi; tumba, kanikina, wondelela kuna luzindalalu lwawonso yo umbangu wa longa.
3 Kadi e ntangwa ikwiza ina vo wantu ke bezizidila e longi diavimpi* ko, kansi mun’owu wa zolela yau, beyikama alongi ana bekubasia mfisi muna matu.*
4 Ke betamba matu muna ludi ko, besia e sungididi kiau muna tusansu twaluvunu.
5 Vo i ngeye, lungalala muna mawonso, zizidila e mpasi, sala e salu kia nteleki,* lungisa uselo waku una ufwene.
6 Kadi nyitilwanga nze lukau lwa ndua vana kimenga, ntangw’a lufwa lwame ifinamene.
7 Ndwene ndwan’ambote, mbanisi o nkul’ame, ndundidi lukwikilu.
8 Tuk’owau, ndundilu kolowa kia ndungidi, kina o Mfumu wa mfundisi ansongi kekumpana se nsendo muna lumbu kiakina, ke mono kaka ko, kansi awonso ana bazolele lusengomoko lwandi.
9 Sia sungididi kia kwiza oku ngina, kuzingila ko.
10 Kadi Dema umbembwele wau kazolele tandu* kiaki, wele kwandi kuna Tesalonika, Kereseke wele kuna Ngalatia, vo i Tito wele kuna Dalmatia.
11 Luka kaka wina yame. Vitula Maku keza yaku, kadi mfunu imvuidi muna kunsadila.
12 Vo i Tukiko intumini kuna Efeso.
13 Vava okwiza, twasa yunga kina yasisa kwa Kampo kuna Teroa ye nkanda mpe, musungula e ngungu.*
14 Alesandero wa ngangul’a nsongo* mpasi zayingi kambwesese. Yave okunsenda mun’owu wa mavangu mandi.
15 Ongeye mpe ofwete kuyikenga muna yandi, kadi kitantu kiangolo kasila e nsangu zeto.
16 Muna nkumbu antete yakivovela kuna mbazi a nkanu, ke mosi ko wakala yame, yau awonso bambembola—yambula o Nzambi kalembi kubalanda e kunda.
17 Kansi o Mfumu wakala yame yo kunkumika, kimana e nsangu zambote zatoma samunwa muna diambu diame, e zula yawonso bawa zo; yavuluzwa muna nu’a nkosi.
18 O Mfumu okumpuluza muna mavangu mawonso mambi yo kundunda muna Kintinu kiandi kia zulu. Kuna kwa yandi nkembo yamu mvu ya mvu. Amen.
19 Zingula mavimpi mame kwa Pereseka yo Akila ye esi nzo a Onesiforo.
20 Eraseto kuna Korinto kasala, kansi Terofimo kuna Miletu yansisa, wayela kena.
21 Vanga wawonso waluaka vitila e nsungi a sivu.*
Yubulo utumini mavimpi yo Pudi yo Linu yo Kelodia ye mpangi zawonso.
22 Yambula o Mfumu kakala yo mwanda osonganga. E nsambu zandi zakala yaku.
Mvovo vana yand'a lukaya
^ Yovo “diambote; diamfunu.”
^ Yovo “kubavovesa dina bazolele wá.”
^ Yovo “kwamanana samuna e nsangu zambote.”
^ Tala Nsas’a Mvovo.
^ I sia vo, mabuku ma nkanda mia bulu.
^ I sia vo, mfudi a lekwa ya sengwa.
^ Yovo “mbangala.”
