3 Yoane 1:1-14
1 Mono mbuta,* kuna kwa Ngayo, wa nzolwa, ona nzolele kikilu.
2 E nzolwa, isambanga kimana wakwamanana nungunuka muna mambu mawonso, wakala mpe yo vimpi wambote, wauna onungunukini* owau.
3 Kadi ntomene yangalala vava ampangi bayizidi yo sia umbangi wa ludi kina osimbininanga, wau okangalelanga muna ludi.
4 Kina ye kiese* kisundidi e kiaki ko: kia wa vo o wan’ame muna ludi bekangalelanga.
5 E nzolwa, kwikizi osonganga muna mana ovanganga mu kuma kia ampangi, musungula awana bena vo anzenza kwa ngeye.
6 Besianga umbangi wa zola kwaku muna nkutakani. Idodokele, ubasindika e nsindika izolakene kwa Nzambi.
7 Kadi mu kuma kia nkumbu andi bayizila koko, ke babongele má ko kuna kwa esi zula.*
8 I dianu vo, tufwete tambulanga wantu awaya kuna zola, kimana twakala asadi kumosi muna ludi.
9 Diambu nsonekene kuna kwa nkutakani, kansi Dioterefe ona ozolele fulu kiantete vana bena, ke tambulwilanga kuna luzitu ko mana tuvovanga.
10 Dianu vo, avo ngizidi, isenzeka mavangu mandi wau kekutukumbanga.* Ke diadi kaka ko, ke zolanga mpe tambula ampangi kuna luzitu ko; awana bazolele kubatambula, okubasimanga yo kubayinga muna nkutakani.
11 E nzolwa, kutanginina oma mambi ko, kansi tanginina kaka oma mambote. Ndiona ovanganga oma mambote, muntu a Nzambi. Ndiona ovanganga oma mambi, kazeye Nzambi ko.
12 Demeterio umbangi wambote kesilwanga kwa mpangi zawonso kumosi ye zingu kiandi kina ngwizani ye ludi. Yeto mpe tukunsilanga umbangi, ozeye wo vo umbangi weto waludi.
13 Mambu mayingi ngina mau muna kusonekena, kansi kizolele mo soneka mu tinta ye lusala ko.
14 Kansi, ngina ye vuvu vo ke kolo ko se yawanana yaku, twamokena mantalani.
Luvuvamu koko wina.
Akundi batumini mavimpi. Zingula mavimpi kwa akundi, konso muntu muna nkumbu andi.
Mvovo vana yand'a lukaya
^ Yovo “nkuluntu.”
^ Yovo “moyo aku unungunukini.”
^ Dilenda kala vo, “kuma kia vutulwila matondo.”
^ Awana bena vo ke Ayuda ko.
^ Sina, “kekutuvovelanga e mbi.”
