Ayibere 1:1-14
1 Kuna nz’ankulu, Nzambi wavovesela mase meto muna angunza, mu nkumbu miayingi ye mu mpila zayingi.
2 Oku mbaninu a lumbu yayi okutuvoveselanga muna Mwan’andi, ona kasola kakala mvingidi a vua dia lekwa yawonso, muna yandi i kavangila lekwa ina ova nza ye kuna zulu.*
3 Yandi i ntemo a nkembo a Nzambi ye fwani-fwani kiandi, osimbininanga lekwa yawonso muna mvovo a nkum’andi. Wau kamene velelesa masumu meto, ovuende kuna koko kwalunene kwa ndiona Wanene kuna zulu.
4 Dianu kasundidi ambasi yo vewa e nkumbu iviokele nkumbu zau o wete.
5 Muna bonga e nona, nkia mbasi o Nzambi kavovesa vo: “Ongeye u mwan’ame; o unu nkitukidi se kuna kwa ngeye”? Wavova diaka vo: “Omono nkala se diandi, oyandi okala mwan’ame”?
6 Kansi vava katuma diaka Mwan’andi antete ova nza, wavova vo: “Mbasi zawonso za Nzambi yambula bankunda.”*
7 Wavova diaka mu kuma kia mbasi vo: “Ovangidi mbasi zandi se mianda, selo yandi se nlaku a tiya.”
8 Kansi mu kuma kia Mwana, wavova vo: “Nzambi i kunda kiaku yamu mvu ya mvu, e mvual’a Kintinu kiaku i mvual’a unsongi.
9 Ozolele unsongi, omengene umpumbulu. I dianu o Nzambi wa Nzambi aku kakusila o mazi ma kiese vioka akw’aku.”
10 Ye: “Kuna lubantiku, e Mfumu, ngeye wakuba e nkubilwa za ntoto, e zulu mpe i salu kia moko maku.
11 Oyau bekuyifwila, kansi ongeye okala kaka; yau awonso fwa befwa nze mvuatu,
12 okubabundika nze yunga, okubasoba nze mvuatu. Kansi ongeye okala kaka una, e mvu miaku ke misuka nkutu ko.”
13 Kansi nkia mbasi kavovesa vo: “Vuanda oku koko kwame kwalunene yavana nsia mbeni zaku se nsikinw’a tambi yaku”?
14 Nga ke yau awonso ko i mianda besalanga salu kiavauka yo tumwa benda sadila awana betambula luvuluku e?
