Ayibere 10:1-39
10 O Nsiku i kîni* kia mambu mambote mekwiza, kansi ke fwaniswa kibeni kia mambu ko, muna yimenga yau yimosi yikwamanananga kelwa mvu ke mvu, ke ilendi kitula ko awana befinamanga Nzambi se wantu alunga.
2 Kele vo ke wau ko, yimenga nga ke yayambulwa kelwa ko e? Kadi awana besalanga e salu kiavauka, badi veleleswa emvimba, e ntona zau ke zadi kala diaka za masumu ko.
3 Kansi, yimenga yayi masumu isungamesanga mvu ke mvu,
4 kadi o menga ma ngombe za makoko ye nkombo ke malendi katula masumu ko.
5 Dianu vo, Kristu vava kayiza ova nza, wavova vo: “‘E kimenga ye lukau ke yau ko ozolele, kansi unkubikidi e nitu.
6 O tukau twangioka ye twa masumu, kwayangalela to ko.
7 I bosi mpovele vo: ‘Tala! Ngizidi (muna nkanda diasonama mu kuma kiame) yavanga luzolo lwaku, e Nzambi.”’
8 Wau katekele vova vo: “E yimenga ye tukau, yo tukau twangioka ye twa masumu, ke twau ko ozolele ngatu yangalela”—yimenga ina yikelwanga mun’owu wa Nsiku—
9 i bosi ovovele vo: “Ngizidi yavanga luzolo lwaku.” Okatwidi owu wantete, kasikidisa owu wanzole.
10 Muna “luzolo” lwalu i tuveleleselwanga muna kimenga kia nitu a Yesu Kristu ina yakelwa nkelwa mosi kaka.
11 Diaka, konso ngang’a Nzambi okalanga vana fulu kiandi lumbu ke lumbu mu sala e salu kiavauka yo kela nkela zayingi yimenga yau yimosi, ina vo ka ilendi katula emvimba masumu ko.
12 Kansi, o Yesu wau katambika emvimba kimenga kimosi kaka muna diambu dia masumu, wavuanda kuna koko kwalunene kwa Nzambi,
13 tuka kolo kiakina, ovingilanga yavana mbeni zandi besiwa se nsikinw’a tambi yandi.
14 Kadi muna kimenga kimosi katambika, wakitula emvimba awana beveleleswanga se alunga.
15 Dianu vo, mwand’avelela mpe ukutusilanga umbangi, kadi utekele vova vo:
16 “‘Ediadi i kangu ikanga yau vava kivioka e lumbu yayina,’ u kavovele Yave. ‘E nsiku miame nsia mio muna ntima miau yo soneka mio muna nyindu miau.”’
17 I bosi uvovele diaka vo: “O masumu mau yo mavangu mau mavilwa, kiyindula mo diaka ko.”
18 Vana valolokelo masumu mama, ke vena diaka mfunu a kimenga ko muna diambu dia sumu.
19 Dianu vo, ampangi, wau tuna yo unkabu* wa kotela mu fulu kiavauka muna menga ma Yesu,
20 nzil’ampa ye yamoyo ina katuziulwila yaviokela vana nlele a ngumbu,* i sia vo, nitu andi,
21 wau tuna ye ngang’a Nzambi anene muna nzo a Nzambi,
22 yambula twafimana Nzambi ye ntim’asikila yo lukwikilu lwafwana, e ntima mieto miaveleleswa* muna ntona zambi, e nitu zeto mpe zasukulwa muna maza mavelela.
23 Yambula twazindalala samuna e vuvu kieto kwa wantu awonso kondwa lukatikisu, kadi ndiona wasia o nsilu nkwa kwikizi.
24 Yambula twayindulaziananga* kimana twasikamesa* o zola ye mavangu mambote kwa muntu yo nkw’andi,
25 ke tuyambula kutakana ko, nze i fu kia ankaka, kansi tukasakesanga muntu yo nkw’andi, yo siamanana wo vanga, musungula wau tumwene vo e lumbu mu finama kaka kina.
26 Kadi avo tusumukina kuna lukanu wau tumene tambula o zayi wasikila waludi, ke vena diaka kimenga ko muna diambu dia masumu,
27 kansi vena yo wonga wa fundiswa ye nganzi za tiya tuna tubomona atantu.
28 Ndiona okulwidi o Nsiku a Mose vana vena mbangi zole yovo zitatu, fwa kefwa, ke fwilwa nkenda ko.
29 Adieyi nubenze, nkia tumbu kilutidi o nene kafwanukini ndiona odiatakese Mwan’a Nzambi yo badikila menga ma kangu dina kavaulwilwa vo mafunzuka yo tianguna o mwand’a nsambu e?
30 Kadi tunzeye Ndiona wavova vo: “Diame dia landa e kunda; mono kwame nsenda.” Ovovele diaka vo: “Yave ofundisa nkangu andi.”
31 O bwa vana moko ma Nzambi amoyo diambu diansisi.
32 Dianu vo, nusungamenanga e lumbu ina yavioka, ina vo, wau nwavua temoka, nwazizidila e ndwan’a ngolo kumosi ye mpasi.
33 Ezak’e ntangwa, nwasenzekwa vana meso ma ndonga* muna luvezo ye muna mpasi, ezak’e ntangwa nwasadisa* awana babwilwa mambu mama.
34 Kadi nwasonga ngemba kw’awana bakala muna pelezo, ye kiese kiawonso nwatambulwila vo mavua meno masanzua, wau nuzeye wo vo nuvuidi e vua disundidi o wete ye dianzingi.
35 Dianu vo, ke nubembola unkabu weno* ko, kadi i mûna nutambulwila nsendo anene.
36 Luzindalalu nuvuidi o mfunu, kimana vava numana vanga luzolo lwa Nzambi, nwatambula dina kasila o nsilu.
37 Kadi “kolo kiakete kaka kisidi,” “ndiona okwizanga oluaka, ke zingila ko.”
38 “Vo i nsongi ame muna lukwikilu i kekadil’o moyo,” “avo ovutukidi manima, kikunyangalela ko.*
39 Vo i yeto, ke tu akwa vutuka kuna lufwasu ko, kansi tu akwa lukwikilu kaka muna vuluza mioyo mieto.
Mvovo vana yand'a lukaya
^ Yovo “ninga.”
^ Yovo “vuvu.”
^ ynlele wavambulanga suku diavauka ye dina disundidi ovauka.
^ Sina, “miazazilwa,” i sia vo, menga ma Yesu.
^ Yovo “twatokanena; twa sia e sungididi kwa muntu yo nkw’andi.”
^ Yovo “kasakesa; yangumuna.”
^ Sina, “songwa muna kimpa.”
^ Yovo “nwakala e ntwadi.”
^ Sina, “unkabu wavovela.”
^ Yovo “moyo ame ke ukunyangalela ko.”
