Ayibere 12:1-29
12 Dianu vo, wau tuzungilu kwa tuti diadi dianene dia ambangi, tukatula mpe mazitu mawonso ye sumu dikutuzingalakananga mu sazu, twalundumukina kuna luzindalalu e nkula una tusidilu,
2 wau tusianga kaka o meso muna Yesu wa Ntu ye Nlunganisi* a lukwikilu lweto. Kadi muna kiese kasidilwa i kazizidila nti a mpasi,* waveza e nsoni yo vuanda kuna koko kwalunene kwa kunda kia Nzambi.
3 Dianu vo, nutoma badika ndiona wazizidila mvovo mia lutiangu mia asumuki ana bekuyikotanga nsoki, kimana nwalembi yoya yo vutuka manima.*
4 Muna ndwan’eno ye sumu, ke nwazizididi ntete ko yamu tezo kia bungulwa menga.
5 Nuvilakene luwondelelo nwavewa nze wana: “E mwan’ame, kubembola e longi dia Yave ko, ngatu vutuka manima avo osembelo kwa yandi;
6 kadi o Yave ana kezolanga i kesembanga yo zwabula* konso ona ketambula nze mwana.”
7 O luzindalalu lweno luna se longi kwa yeno. O Nzambi okunubadikilanga nze wan’andi. Kadi nkia mwana olembi longwanga kwa se diandi?
8 Kansi, avo ke nulongelo kwa Nzambi ko nze una kelongelanga ankaka, ozevo ke nu wan’andi ko, nu wan’a zumba.
9 Vana ntandu, o mase meto ma kinitu longa bekutulonganga, oyeto tukubazitisanga. Nga ke tufwete luta sakalela Se dia zingu kieto kia kimwanda ko kimana twazinga e?
10 Kadi oyau mu kolo kiandwelo batulonga mana bamona vo mambote, kansi oyandi ovanganga wo muna wete dieto kimana twakala e ntwadi muna vauka kwandi.
11 Kieleka, ke vena longi ko dikalanga diakiese vava divewanga, diampasi* kaka; kansi kuna kulanda, diyima mbongo a luvuvamu ye unsongi kw’awana baveno dio.
12 Dianu vo, nukumika moko mazeza ye makungunu mayoya,
13 nusingika nzila za malu meno, kimana ona wafwa malu kalembi vengomoka, kansi kasasuka.
14 Nuvavanga kadila kuna luvuvamu ye wantu awonso yo velela,* avo ke wau ko, ke muntu ko omona o Mfumu.
15 Nutoma kuyikenga valembi kala muntu ofunga mu vua nsambu za Nzambi, kimana valembi mena mwanzi a mpondi vovo lwina yo twasa e mpasi yo safula wantu ayingi;
16 nutoma kuyikenga valembi kala munta-zumba* vovo lwina ngatu muntu olembi yangalelanga mambu mavauka, nze Esau ona wateka e kimbuta kiandi muna dia kumosi.
17 Kadi nuzeye wo vo vava kazola tambula e nsambu, wabembolwa; kana una vo wavava soba e ngindu* kuna kinsanga, kalenda wo ko.*
18 Ke nufinamene va mongo ko una ulenda simbwa, una wakwikwa e tiya, wayitalala e tuti dia ndombe ye tombe kina e bú ye tembwa kiangolo,
19 ye zú dia mpungi ye ndinga yavovelenge mambu, ina vo vava yawakana, o nkangu wadodokela vo ke bavoveswa diaka diambu ko.
20 Kadi bazakama kikilu muna diambu dia nkanikinu owu: “Kana nkutu bulu kiviakene mongo, kifwete tubwa matadi.”
21 E mona-meso mpe kiansisi kiakala, dianu Mose kavovela vo: “Mbwene wonga yo zakama.”
22 Kansi, oyeno nufinamene Mongo a Zione, e mbanz’a Nzambi amoyo, Yerusaleme ya zulu ye yazi ya mbasi
23 muna lukutakanu lwampwena ye nkutakani a mwan’antete a Nzambi ina yasonekwa kuna zulu yo Nzambi wa mfundisi a awonso, ye mioyo mia wantu ansongi ana bawutwa kwa mwand’avelela yo lunganeswa,
24 yo Yesu wa nkambami* a kangu diampa yo menga katuzazila, mana meluta vovanga ke mu menga ma Abele ko.
25 Nutoma tala nwalembi kak’o matu* kwa ndiona ovovanga. Kadi avo ana balembi winikina ndiona wavananga lulukisu lwa Nzambi ova ntoto ke bavenga e tumbu ko, ozevo, diampasi kikilu dikala kwa yeto mu venga e tumbu avo tufididi e nima kwa ndiona ovovanga tuka kuna zulu!
26 Muna kolo kiakina e nding’andi yanikuna o ntoto, kansi owau osidi nsilu vo: “Nkumbu mosi diaka inikuna, ke ntoto kaka ko, kansi ye zulu mpe.”
27 O mvovo “nkumbu mosi diaka,” usonganga e nkatul’a lekwa ina yanikunwa, lekwa ina yavangwa, kimana e lekwa ina yalembi nikunwa yakala kaka.
28 Dianu vo, wau tutambula e Kintinu kina ke kinikunwa ko, yambula twakwamanana tambula e nsambu, zina tulenda sadila e salu kiavauka kitondakana kwa Nzambi kuna vumi yo zakama.
29 Kadi o Nzambi eto i tiya twambomoni.
Mvovo vana yand'a lukaya
^ Yovo “Nzikudi.”
^ Tala Nsas’a Mvovo.
^ Yovo “yoyesa mioyo mieno.”
^ Yovo “tumba.”
^ Yovo “dia ntantu.”
^ Yovo “vauka.”
^ Tala Nsas’a Mvovo, “Mvukana za usafu.”
^ I sia vo, ngindu za se diandi.
^ Sina, “kasololwela dio fulu ko.”
^ Yovo “kimpovela.”
^ Yovo “lembi vakula nkalu; lembi veza.”
