Ayibere 13:1-25
13 Yambula o zola kweno vana vena ampangi kwawokela.
2 Ke nuvilakani e fu kia tambula nzenza ko, kadi akaka i wau batambulwila ambasi lembi wo zaya.
3 Nusungamena awana bena muna pelezo,* nze yeno nwakangwa yau kumosi, ye awana bemweswanga e mpasi, wau vo yeno kibeni mpe nwakinu muna nitu.*
4 O longo yambula lwazitiswa kw’awonso, e mfulu a longo yambula yakondwa usafu, kadi Nzambi ofundisa akwa mvukana za usafu ye minta-zumba.*
5 Yambula e zingu kieno kiakondwa zola muna nzimbu, nuyangalelanga ina nuna yau. Kadi edi kavova vo: “Kikuyambula nkutu ko, ngatu kubembola.”
6 Kimana twakala yo unkabu yo vova vo: “Yave i nsadisi ame; kimona wonga ko. O muntu adieyi kalenda kumpanga?”
7 Nusungamena awana bevitang’o ntu vovo lwina, ana bekunusamunwinanga e diambu dia Nzambi, wau numonanga e nluta mia nkadilu au, nutanginina lukwikilu lwau.
8 Yesu Kristu yandi mosi kaka, o zono, o unu, yakwele mvu.
9 Ke nubendomonwa kwa malongi ma mpila mu mpila ko ye ma nzenza, kadi diambote o ntima wakumamena muna nsambu za Nzambi ke mu madia ko,* mana ke matwasa nluta ko kw’awana bakivana muna mambu mama.
10 Tuvuidi ziku dina vo awana besalanga e salu kiavauka muna saba ke bena yo nswa ko wa dia ina ikelwanga vo.
11 Kadi e bulu ina yakatulwang’o menga mana ngang’ambuta kanatanga muna fulu kiavauka nze lukau lwa masumu, kuna mbazi a ndo* zayokelwanga.
12 I dianu mpe o Yesu kamwena e mpasi kuna mbazi a vitu dia mbanza, kimana kavaulwila nkangu muna menga mandi.
13 Ozevo, yambula twenda kuna mbazi a ndo,* yo nata luvezo lwandi,
14 kadi ovava ke tuna ye mbanza ko isikila yakwele mvu, kansi mbanza ina ikwiza tuvavanga.
15 Yambula twakwamanana tambika lukau lwa lusanisinu kwa Nzambi muna yandi, i sia vo, mbongo a nua mieto mina mitambulwilanga e nkumbu andi.
16 Vana ntandu, ke nuvilakani vanga o wete ko yo kayila ankaka ina luna yau, kadi o Nzambi tukau twa mpila yayi keyangalelanga.
17 Nulemvokela awana bevitang’o ntu vovo nwina yo kubasakalela, kadi beyingilanga e mioyo mieno, nze yau beta e mbalu, kimana bavanganga wo kuna kiese, ke ku bumu ko, kadi ediadi ke ditwasa nluta ko kwa yeno.
18 Nutusambidilanga, kadi tutomene wo zaya vo tuna ye ntona zambote, tuzolele kala akwa ziku muna mambu mawonso.
19 Kansi inudodokele kikilu nwasambanga kimana yavutuka kwa yeno mu nzaki.
20 O Nzambi a luvuvamu, ona wafutumuna muna mafwa o Mfumu eto Yesu wa mvungudi anene a mameme, muna menga ma kangu dia mvu ya mvu,
21 kanufwanisa muna mambu mawonso mambote kimana nwavanga luzolo lwandi. Muna Yesu Kristu okutusadisanga twavanga oma ma luyangalalu vana meso mandi. Kuna kwa yandi nkembo yamu mvu ya mvu. Amen.
22 Inukasakese ampangi, owau nusia e sungididi muna diambu diadi dialukasakeso, kadi mambu makete inusonekene.
23 Nzolele nwazaya wo vo Timoteo wa mpangi eto wavaikisu muna pelezo. Avo ovita kwiza, se ngiza yandi vava ikwiza kunutala.
24 Nuzingula mavimpi kw’awonso bevitang’o ntu vovo nwina ye aveledi awonso. Awana bena kuna Italia banutumini mavimpi.
25 E nsambu zakala yo yeno awonso.
Mvovo vana yand'a lukaya
^ Sina, “awana bakangwa; awana bena mu kangwa.”
^ Dilenda kala vo, “nze yeno numonanga e mpasi kumosi yo yau.”
^ Tala Nsas’a Mvovo, “Zumba.”
^ I sia vo, nkanikinu mu kuma kia madia.
^ Yovo “ndanda.”
^ Yovo “ndanda.”
