Ayibere 2:1-18
2 Muna diadi, diamfunu twaluta sia sungididi muna mambu twawa, kimana twalembi vukumunwa.
2 Kadi, e diambu diavovelwa muna mbasi avo diasikila, konso nsumuki ye nkolami otambwidi tumbu kia nsongi,
3 aweyi tuvengela e tumbu avo tubembwele o luvuluku lwalu lwanene? Kadi lwateka vovelwa kwa Mfumu eto ye awana banwa batusikidisa dio,
4 ekolo Nzambi kabayikama muna sia umbangi mu sinsu ye masivi ye mavangu ma mpila mu mpila ma nkuma ye muna mwand’avelela una kakayanesa mun’owu wa luzolo lwandi.
5 Kadi ke kw’ambasi ko kasakidika e nza ikwiza, ina tuvovelanga.
6 Kansi vena yo muntu wasia kimbangi va fulu kimosi, oku vo: “O muntu se nki, kimana wansungamena? Yovo mwan’a muntu se nki kimana wanlunga-lunga?
7 Wansakidika kikilu vana vena ambasi; wamvuika kolow’a nkembo yo zitu, wansia e kiyekwa kia salu ya moko maku.
8 Wasakidika lekwa yawonso kuna nsi a tambi yandi.” Wau kasakidika lekwa yawonso kwa yandi, Nzambi kasisa lekwa ko kilembi kunsakalela. Kansi owau, ke twakanini mona e lekwa yawonso insakalele ko.
9 Kansi tumonanga Yesu, ona wasakidikwa vana vena mbasi, wau kamona mpasi za fwa, wavuikwa kolow’a nkembo yo zitu, kimana muna nsambu za Nzambi kayeleka o lufwa mu kuma kia wantu awonso.
10 Kadi diansongi kwa ndiona una vo muna kuma kiandi ye muna yandi mpe lekwa yawonso inina, muna twasa wana ayingi kuna nkembo, kazikula o Ntu a luvuluku lwau muna mpasi.
11 Kadi, ndiona ovaulanga y’awana bevaulwanga, yau awonso kwa se dimosi bawutwa, muna kuma kiaki ke monanga nsoni ko za kubayikila vo mpangi,
12 kadi wavova vo: “Isamuna nkumbu aku kwa mpangi zame; muna nkutakani ikukembelela muna nkunga.”
13 Wavova mpe vo: “Isia vuvu kiame muna yandi.” Wavova diaka vo: “Tala, omono yo wana kampene o Yave.”
14 Wau vo o “wana” bena e ntwadi muna menga ye nitu, oyandi mpe una e ntwadi muna lekwa yau imosi, kimana muna lufwa lwandi kafwasa ndiona una yo nkuma watwasa lufwa, i sia vo, Nkadi ampemba,
15 yo kûla awonso ana babundunwa e zingu kiau kiawonso kwa wonga wa lufwa.
16 Kadi ke sadisanga ambasi ko, kansi mbongo ya Abarayama kaka kesadisanga.
17 Dianu kafwana kadila nze “mpangi” zandi muna mambu mawonso, kimana kakituka se ngang’ambuta a nkenda ye kwikizi muna mambu ma Nzambi, kimana katambika kimenga kia luloloko lwa masumu ma wantu.
18 Wau vo yandi kibeni wamon’e mpasi vava katontwa, wafwana mu sadisa awana betontwanga.
