Ayibere 3:1-19
3 Dianu vo, ampangi avelela, akwa kunku muna mbok’a zulu, nubadika ntumwa ye ngang’ambuta ona tuzeye*—Yesu.
2 Wasonga kwikizi kwa Ndiona wansola, wauna o Mose kasongela e kwikizi kwa Nzambi ekolo kasadilanga muna nzo* andi yawonso.
3 Kadi yandi* ofwene nkembo lutila nkutu una wa Mose, diau adimosi ye ndiona otungidi e nzo osundidi e nzo o zitu.
4 Kieleka, konso nzo kwa muntu yatungwa, kansi ndiona watunga e lekwa yawonso i Nzambi.
5 Mose selo kia kwikizi kakala muna nzo yawonso ya Nzambi. E salu kiandi kiakala se kimbangi* muna mambu mevovua kwa Nzambi,
6 kansi Kristu nze mwan’a mfumu a nzo, wasonga e kwikizi muna nzo a Nzambi. Oyeto tu nzo a Nzambi, avo tutatidila unkabu wavova yo simbinina e vuvu kina tukuyisanina yakuna mbaninu.
7 Dianu vo, wauna uvovele mwand’avelela vo, “O unu, avo nuwa nding’andi,
8 ke nubadisa ntima mieno ko nze una kiafusuka makasi ma ndudi, muna lumbu kia ntonta muna makanga,
9 muna mase meno bantontela, kanele vo bamona mavangu mame mu mvu 40.
10 Dianu yamengena e mbandu yayi yo vova vo: ‘Ntangwa zawonso bebendomokanga muna ntima miau, ke bazeye nzila zame ko.’
11 Muna kuma kiaki ndidi e ndofi kuna makasi mame vo: ‘Ke bekota muna vundu kiame ko.’”
12 Ampangi, nuyikenga, valembi kala muntu vovo nwina onungununa ntim’ambi, wakondwa lukwikilu muna kuyivambula yo Nzambi amoyo;
13 kansi nukasakesanga muntu yo nkw’andi e lumbu yawonso, ekolo kilenda yikwa vo “Unu,” kimana valembi kala yo muntu vovo nwina obadiswa o ntima kwa umpukumuni wa nkum’e sumu.
14 Kadi tukitukidi tu akwa kunku muna Kristu avo tusimbinina yakuna mbaninu e vuvu twakala kiau kuna lubantiku.
15 Wau kiavovua vo, “O unu, avo nuwa nding’andi, ke nubadisa ntima mieno ko nze una kiafusuka makasi ma ndudi.”
16 Kadi aki nani bawá yo kumfungisa makasi ma ndudi? Nga ke yau awonso ko ana bavaikiswa muna Engipito kwa Mose?
17 Aki nani o Nzambi kafungila makasi mu mvu 40? Nga ke awana basumuka ko, ana bafwila muna makanga?
18 Aki nani kadila ndofi vo, ke bekota muna vundu kiandi ko? Nga ke awana bakolama ko e?
19 Tumwene vo ke balenda mo kota ko wau bakondwa lukwikilu.
Mvovo vana yand'a lukaya
^ Yovo “twatambulwila.”
^ I sia vo, nkutakani a Nzambi.
^ I sia vo, Yesu.
^ Yovo “umbangi.”
