Ayibere 4:1-16
4 Dianu vo, wau vo o nsilu wa kota muna vundu kiandi wakinu, yambula twayikenga* valembi kala yo muntu vovo nwina ofunga muna nsilu wau.
2 Kadi oyeto mpe twasamunwinwa e nsangu zambote, wauna zasamunwinwa kwa yau; kansi e diambu dina bawá ke diabatwasila nluta ko, e kuma kadi ke bakala ntwadi ko muna lukwikilu ye awana bawá.
3 Kadi oyeto twasonga lukwikilu tukota muna vundu kiaki, wauna kavova vo: “Ndidi e ndofi kuna makasi mame vo, ‘Ke bekota muna vundu kiame ko,’” kana una vo e salu yandi yafokoka tuka kuna semo dia nza.
4 Kadi muna sono wavova mu kuma kia lumbu kiansambwadi vo: “O Nzambi wavunda muna lumbu kiansambwadi muna salu yandi yawonso,”
5 ovovele diaka vo: “Ke bekota muna vundu kiame ko.”
6 Wau vo vakinu ye ankaka bekota mo, ana bateka samunwinwa e nsangu zambote ke bakota mo ko mu kuma kia ukolami wau,
7 vava kiavioka kolo kiayingi wasikidisa diaka e lumbu wau kavova muna nkung’a Davidi vo, “O unu”; wauna diavovua vo, “O unu avo nuwa nding’andi, ke nubadisa ntima mieno ko.”
8 Kadi kele vo Yosua wabafila muna vundu kiakina, o Nzambi kadi vovela diaka lumbu kiankaka ko.
9 Dianu vo, vakinu ye lumbu kia vundu kwa nkangu a Nzambi.
10 Kadi ona okotele muna vundu kia Nzambi, ovundidi muna salu yandi, wauna Nzambi kavundila muna salu yandi.
11 Dianu vo, yambula twavanga mawonso twakota muna vundu kiakina, kimana valembi kala muntu otanginina mbandu ya ukolami wau umosi.
12 Kadi e diambu dia Nzambi diamoyo ye nkuma, dilutidi mpe o twa kwa konso nsosolo a meno mole, dikotanga kana nkutu muna mpambaninu a moyo* yo mwanda,* yo mayikilu yo nluku, dilenda sengomona ngindu ye makani ma ntima.
13 Ke vena vangwa kiaswekama vana ndose andi ko, kadi lekwa yawonso ina e nkonga yo senzama vana meso ma ndiona tutela e mbalu.
14 Dianu vo, wau tuna ye ngang’ambuta anene ona wakota kuna zulu, Yesu wa Mwan’a Nzambi, yambula twatatidila osamuna lukwikilu lweto muna yandi.
15 Kadi ke tuna ye ngang’ambuta ko ona olembi fwila lutovoko lweto e nkenda, kansi ndioyo tuna yandi watontwa muna mawonso nze yeto, kansi kasumuka ko.
16 Ozevo, yambula twafinama e kunda kia nsambu kuna unkabu, kimana twafwilw’e nkenda yo vua e nsambu zikutusadisa muna ntangwa ifwene.
