Ayibere 5:1-14
5 Kadi konso ngang’ambuta osolelo vana vena wantu, otumbikwanga muna wete dia wantu muna mambu mana ma Nzambi, kimana katambika tukau ye yimenga mu kuma kia masumu.
2 Wafwana kadila kuna lulembamu* y’awana bena ku bubu y’akwa makuzuka,* kadi yandi mpe onwananga yo lutovoko lwa yandi kibeni,
3 kiaki i kuma kafwete tambikila tukau muna masumu ma yandi kibeni wauna kevanganga muna masumu ma nkangu.
4 Ke vena muntu ko okuyitumbikanga muna salu kiaki kia zitu, Nzambi kaka okunsolanga, wauna kasolela Arone.
5 Diau adimosi mpe yo Kristu, ke yandi kibeni ko wayikembesa kimana kakala se ngang’ambuta, kansi wakembeswa kwa Ndiona wamvovesa vo: “Ongeye u mwan’ame; o unu nkitukidi e se kuna kwa ngeye.”
6 Wauna kavovele mpe vana fulu kiankaka vo, “Ongeye u nganga yakwele mvu, e kinganga nze kia Mankizedeke.”
7 Muna zingu kiandi ova nza,* Kristu wadodokela yo lomba kuna kâzu kiangolo ye mansanga kuna kwa Ndiona wafwana kumvuluza muna lufwa, wawakana mu kuma kia vumi wandi kwa Nzambi.
8 Kana una vo mwan’a Nzambi, walongoka o nlemvo muna mpasi kamona.
9 Vava kazikulwa muna mawonso, wakituka se ntu a luvuluzu lwakwele mvu kw’awonso ana bekunlemvokelanga,
10 e kuma kadi watumbikwa se ngang’ambuta kwa Nzambi, e kinganga nze kia Mankizedeke.
11 Mambu mayingi tuna mau mu vova mu kuma kiandi, diampasi mu sasila mo, wau vo nukitukidi se afwa-matu.
12 Kanele vo nwafwana kala alongi, kansi owau* muntu diaka nuvuidi o mfunu kanulonga mambu mantete mavauka ma Nzambi tuka kuna lubantiku, nuvutukidi vava kimvumina, ke madia mangolo ko.
13 Kadi konso ona onuanga kimvumina, kazeye diambu dia unsongi ko, kadi nsedia kwandi.
14 Kansi madia mangolo m’awana bazikuka, awana bena vo, wau bayukwa sadila umbakuzi wau, balongoka swaswanesa o wete yo bi.
Mvovo vana yand'a lukaya
^ Yovo “ngemba.”
^ Yovo “akolami.”
^ Sina, “muna lumbu yandi ya nitu.”
^ Sina, “mun’owu wa kolo.”
