Ayibere 6:1-20
6 Dianu vo, wau tumene longoka mambu ma lubantiku mu kuma kia Kristu, yambula twanungunuka yamuna nzikuka, lembi kuba diaka nkubilwa, i sia vo, luviluku lwa ntima muna mavangu mafwa yo lukwikilu muna Nzambi,
2 e longi dia mvuba za mpila mu mpila, ngiambik’a moko, mfuluk’a mafwa ye mfundis’a mvu ya mvu.
3 I diau tuvanga, avo Nzambi ozolele wo.
4 Kadi awana bateka temonwa yo yeleka lukau lwangovo lwa zulu ye awana bakituka akwa kunku muna mwand’avelela
5 ye awana bayeleka e diambu diambote dia Nzambi ye nsambu* za tandu* kikwiza,
6 kansi bavengomoka, ke dilendakana ko mu kubafila diaka muna luviluku lwa ntima, e kuma kadi bakomene diaka Mwan’a Nzambi vana nti yo kumfusulwisa e nsoni vana meso ma ndonga.
7 Kadi ntoto usambulwanga kwa Nzambi vava unuanga maza ma mvula yo yima e mbongo ifwene kw’awana bevatanga wo.
8 Kansi, avo uyimini nsende ye nkeka za mfinda, ke una mfunu ko, ufinamene sibu, e mbaninu andi yokwa.
9 Kansi azolwa, kanele vo tuvovele e mpila yayi, kuna kwa yeno tuna ye ziku kia mambu mambote, mana metwasa luvuluzu.
10 Kadi Nzambi kakondelo unsongi ko kavilakana e salu kieno yo zola nusongele muna nkumbu andi, wau nwasadila aveledi yo kwamanana kubasadila.
11 Kansi tuzolele vo konso muntu vovo nwina kasonga e fululu kiau kimosi, kakala ye vuvu kiasikila yakuna mbaninu,
12 kimana nwalembi kala miolo, kansi nwatanginina awana bena vo muna lukwikilu yo luzindalalu i bevuila e nsilu.
13 Kadi o Nzambi vava kasila Abarayama o nsilu, wau vo kalendi dila muntu osundidi nene ndofi ko, wiyididi e ndofi,
14 oku vo: “Sambula kikilu ikusambula, wokesa mpe ikuwokesa.”
15 Abarayama wau kazindalala, wavua o nsilu wau.
16 Kadi o wantu, ndiona osundidi nene bedilanga e ndofi, e ndofi au isukisanga e mpaka zawonso, kadi e ndofi i lusikidisu kwa yau.
17 Diau adimosi mpe, o Nzambi vava kabaka e nzengo za songa e ziku kw’awana bevua o nsilu wa kani diandi dilembi soba, wasikidisila wo muna ndofi,
18 kimana muna mambu mole ke malendi soba ko, oma mena vo Nzambi kalendi vuna ko, oyeto tutinini kwa Nzambi tutambwidi lukasakeso lwa nkuma, twasimbinina e vuvu kina twavewa.
19 Tuna ye vuvu kiaki nze mbw’a* nzaza a mioyo mieto, kia ludi ye kiasikila, kikutukotesanga kuna nim’a nlele a ngumbu,*
20 kuna kwakota Yesu ona wavita muna wete dieto, okitukidi se ngang’ambuta yakwele mvu, e kinganga nze kia Mankizedeke.
Mvovo vana yand'a lukaya
^ Sina, “nkuma.”
^ Tala Nsas’a Mvovo.
^ I sia vo, luvaku lusikininanga e nzaza.
^ I nlele wavambulanga suku diavauka ye dina disundidi ovauka.
