Ayibere 7:1-28
7 Kadi Mankizedeke ndioyo wa ntinu a Saleme, ngang’a Nzambi a Mpungu, wayenda kika Abarayama vava kavutukanga kuna vita ina kavondela atinu yo kunsambula,
2 Abarayama wamvana e tini kia kumi kia yawonso ya sanzu diandi. Entete, nkumbu andi yasekolwa vo “Ntinu a Unsongi,” i bosi mpe ntinu a Saleme, i sia vo, “Ntinu a Luvuvamu.”
3 Wakondwa se, wakondwa ngudi, wakondwa luvila, wakondwa lubantiku lwa lumbu ngatu nsuk’a zingu, wau kafwananeswa yo Mwan’a Nzambi, okala kaka nganga yakwele mvu.
4 Tala o nene wa muntu ndiona Abarayama wa nkulu a kanda kavan’e tini kia kumi kia wete wa sanzu.
5 Mun’owu wa Nsiku, wan’a Levi, ana batambula kinganga bakanikinwa mu vakulwisa e tini kia kumi kwa nkangu, i sia vo, kwa mpangi zau, kanele vo oyau mpe mbongo* ya Abarayama.
6 Kansi o muntu ndiona wina vo katuka mu luvila lwau ko, otambwidi e tini kia kumi kwa Abarayama yo sambula ona wakala ye nsilu.
7 Ediadi ke dilendi fidiswa mpaka ko, nleke osambwilu kwa mbuta.
8 Anelevi befwanga yau betambulanga e tini kia kumi, kansi vena ye wankaka otambulanga e tini kia kumi, e Sono ikunsilanga kimbangi vo, wamoyo.
9 Dilenda vovua vo kana nkutu Levi, ona otambwidi e tini kia kumi, wavana e tini kia kumi muna Abarayama,
10 kadi kayiwutukila ko muna luvila lwa Abarayama wa nkulu andi,* vava kakikwa kwa Mankizedeke.
11 Kele vo wantu bavuila nkal’a lunga muna kinganga kia Levi (kadi e kinganga kiaki dimosi muna Nsiku wavewa kwa nkangu), nkia mfunu diaka diadi kala vo nganga ankaka katelama, yo yikilwa e kinganga nze kia Mankizedeke ke mun’owu wa kinganga kia Arone ko?
12 Kadi, wau vo kinganga kiasobwa, diavavanga mpe vo o Nsiku wasobwa.
13 O muntu ona oyikilu mambu mama mu kanda diankaka katuka, dina vo ke mosi ko wasadilanga vana ziku.
14 Dialudi vo Mfumu eto muna kanda dia Yuda katuka, kansi Mose kavova diambu ko muna nganga zituka muna kanda diadi.
15 Ediadi ditomene moneka vava kitelamene nganga ankaka wafwanana yo Mankizedeke,
16 ona otumbikilu, ke mu sia ko vo muna kanda diasikidiswa muna Nsiku katuka, kansi mu kuma kia nkum’a moyo ulembi fwasakana.
17 Kadi wasilwa umbangi vo: “Ongeye u nganga yakwele mvu, e kinganga nze kia Mankizedeke.”
18 Dianu vo, nkanikinu wankulu ukatwilu, e kuma kadi watovoka yo kondwa mfunu.
19 Kadi o Nsiku ke wakitula má ko se kialunga, kansi e vuvu kisundidi o wete kiavanga wo, i kiau kikutufinamesanga kwa Nzambi.
20 Wau kina vo ke va kondwa ndofi ko,
21 (kadi vena ye awana batumbilu kinganga ke mu ndofi ko, kansi ondioyu muna ndofi katumbilu e kinganga kwa Ndiona wavova vo: “Yave odidi ndofi, kesoba ngindu zandi ko,* ‘Ongeye u nganga yakwele mvu’”),
22 muna diadi, Yesu okitukidi se lusikidisu lwa kangu disundidi o wete.
23 Vana ntandu, ndonga batumbikwa e kinganga vana fulu kia ankaka, kadi o lufwa lwabakakidila mu kwamanana sala e salu kiaki,
24 kansi, wau vo Yesu ozinganga yakwele mvu, e kinganga kiandi ke kivingwa kwa muntu ko.
25 Dianu vo, wafwana mpe vuluza emvimba awana befinamanga Nzambi muna yandi, e kuma kadi ozinganga kaka muna kubadodokelela.
26 Kadi difwene kwa yeto twakala ye ngang’ambuta una wau, ona wina vo nkwa kwikizi, wakondwa bi, wakondwa usafu, wavavuka asumuki, watundidikwa vana ntandu a zulu.
27 Nswaswani ye nganga zambuta zozo, oyandi kavuidi mfunu wa tambika kimenga lumbu ke lumbu ko, entete muna masumu ma yandi kibeni, i bosi mana ma nkangu, e kuma kadi wavanga wo e mvimba vava kayitambika se kimenga.
28 Kadi o Nsiku wantu atovoka utumbikanga se nganga zambuta, kansi e diambu dia dilwa e ndofi ina yalandila o Nsiku, ditumbikidi o mwana, walunga yakwele mvu.
Mvovo vana yand'a lukaya
^ Sina, “batukidi muna luketo.”
^ Sina, “muna luketo lwa nkulu andi kakala.”
^ Yovo “ke viluka ko.”
