Ayibere 8:1-13
8 Ediadi i mbut’a diambu muna mana tuvovele: Tuna ye ngang’ambuta una wau, ona ovuende kuna koko kwalunene kwa kunda kia ndiona Wanene kuna zulu,
2 wa selo kia fulu kiavauka ye saba kialudi, kina Yave kasumika, ke muntu ko.
3 Kadi konso ngang’ambuta otumbikwanga muna tambika tukau ye yimenga; dianu vo diamfunu ondioyu mpe kakala ye lekwa kiatambika.
4 Kele vo kakala ova nza, kadi kala nganga ko, kadi vena ye awana betambikanga tukau mun’owu wa Nsiku.
5 Wantu awaya besalanga e salu kiavauka, kina se mbandu ye kîni* kia mana ma zulu; wauna Mose kavoveswa vava kakanikinwa kwa Nzambi katunga e saba: Kadi wavova vo: “Vava ovanga lekwa yawonso, vanga wawonso mun’owu wa mbandu ina wasongelwa vana mongo.”
6 Kansi owau, Yesu otambwidi uselo usundidi o wete, kadi yandi i nkambami* wa kangu disundidi o wete, dina diasikidisilwa muna nsilu misundidi o wete.
7 Kele vo e kangu diantete ke dikadi yo vilwa ko, edi diazole ke diadi kala mfunu ko.
8 Kadi osolwele tumbu kwa nkangu vava kavovele vo: “‘Tala, muna lumbu ikwiza,’ u kavovele o Yave, ‘Ikanga kangu diampa ye nzo a Isaele ye nzo a Yuda.
9 Ke difwanana ko ye kangu dina yakanga yo mase mau muna lumbu kina yabasimba muna koko yo kubavaikisa muna nsi a Engipito, kadi ke basikila muna kangu diame ko, dianu yayambulwila kubalunga-lunga,’ u kavovele o Yave.
10 “‘Kadi ediadi i kangu ikanga ye nzo a Isaele vava kivioka e lumbu yayina,’ u kavovele Yave. ‘E nsiku miami nsia mio muna nyindu miau yo soneka mio muna ntima miau. Omono nkala Nzambi au, oyau bekala nkangu ame.
11 “‘Ke muntu ko olonga diaka nkw’andi ngatu mpangi andi, oku vo: “Zaya Yave!” Kadi awonso bekunzaya, tuka muna nleke yamuna mbuta.
12 Ikubaloloka muna mavangu mau mavilwa, o masumu mau kiyindula mo diaka ko.’”
13 Wau kavovele vo, “kangu diampa,” okitwidi dina diantete se diakondwa o mfunu. Wau vo ke dina diaka mfunu ko ye diankulu, se divila e mvimba.
