Efeso 1:1-23
1 Paulu, wa ntumw’a Kristu Yesu muna luzolo lwa Nzambi, kuna kw’aveledi omo Efeso, akwa kwikizi muna Kristu Yesu:
2 Nsambu koko nwina yo luvuvamu lutuka kwa Nzambi wa Se dieto ye Mfumu Yesu Kristu.
3 Okembelwa o Nzambi wa Se dia Mfumu eto Yesu Kristu, kadi okutusambulanga muna nsambu zawonso za kimwanda muna mazulu, muna Kristu,
4 e kuma kadi una ke kiasemeno e nza ko, watusola kimana twakala yandi* e ntwadi, twakala twavelela yo kondwa tona vana ndose andi muna zola.
5 Kadi wateka kana vo twakitulwa se wan’andi muna Yesu Kristu, mun’owu wa luzolo ye kani diandi,
6 muna lusanisinu lwa nkembo a nsambu zandi zina katuvanina kuna mvevo muna Mwan’andi anzolwa.
7 Watukûla muna menga ma mwana ndioyo, i sia vo, twavevolwa, twalolokwa masumu mun’owu wa umvuama wa nsambu zandi.
8 Muna nsambu zazi i katuwokesela ngangu zawonso yo umbakuzi,*
9 wau katuzayisa e mbumb’avauka ya luzolo lwandi. Mbumba yayi ngwizani ina ye mana mekunyangidikanga, mana kayikanina,
10 kakubika mambu muna ntangwa yasikidiswa, kayikanesa diaka lekwa yawonso muna Kristu, e lekwa ina kuna zulu, y’eyi in’ova nza. Elo, e lekwa yawonso yayikakeselwa muna yandi,
11 ndiona twinina e ntwadi, o Nzambi watusola twatambula e vua. Wateka kutusola mun’owu wa lukanu lwa ndiona ovanganga mawonso kakanini mun’owu wa luzolo lwandi,
12 kimana o Nzambi kakembelwa yo sanisinwa muna yeto twavita bunda e vuvu muna Kristu.
13 Kansi, oyeno mpe nwabunda e vuvu muna yandi vava nwawa e diambu dia ludi, e nsangu zambote za luvuluku lweno. Vava nwakwikila, nwasiwa e dimbu kia mwand’avelela una nwasilwa o nsilu muna yandi,
14 owu wateka vewa se lusikidisu* lwa vua dieto, ye kani dia vevola o vua kwa Nzambi muna lusadisu lwa lukûlu, muna lusanisinu lwa nkembo andi.
15 Dianu vo, omono mpe wau ngwidi lukwikilu lweno muna Mfumu Yesu yo zola kuna nusonganga kwa aveledi awonso,
16 kiyambulanga nkutu vutula matondo ko mu kuma kieno. Ikwamanananga kunuyika muna sambu yame,
17 kimana o Nzambi a Mfumu eto Yesu Kristu, wa Se dia nkembo, kanuvana mwand’a ngangu yo lusengomono muna zayi wasikila mu kuma kiandi.
18 Otemwene meso ma ntima mieno kimana nwazaya e vuvu kina kanubokelela, kina vo i nkembo a umvuama una kelundanga se vua di’aveledi,
19 o nene wa nkum’andi owu usundidi wina omu yeto tukwikilanga. Mun’owu wa nene wa nkum’andi,
20 i kafudila Kristu muna mafwa yo kumvuandisa kuna koko kwandi kwalunene kuna zulu,
21 vana ntandu a luyalu lwawonso, wisa, nkuma ye umfumu ye nkumbu zawonso ziyikwanga, ke mu tandu* kiaki kaka ko, kansi ye kina kikwiza mpe.
22 Wasakidika mpe lekwa yawonso kuna nsi a tambi yandi yo kunkitula se ntu a lekwa yawonso muna nkutakani,
23 ina vo i nitu andi, o luzalu lwa ndiona ozadisanga yawonso muna awonso.
Mvovo vana yand'a lukaya
^ I sia vo, yo Kristu.
^ Yovo “lulungalalu.”
^ Yovo “mfutu.”
^ Tala Nsas’a Mvovo.
