Efeso 2:1-22
2 O Nzambi, yeno kavana o moyo kana una vo nwafwa nwakala muna makuzuka ye masumu meno,
2 mana nwateka kangadila mun’owu wa tandu* kia nza yayi, mun’owu wa nyadi a tembwa, o mwanda una usalanga owau muna wan’akolami.
3 Yeto awonso twateka kangadila vana bena mun’owu wa zolela yeto ya nitu, yo lungisa e zolela ya nitu ye makani meto, wan’a nganzi twakala muna kingutukila wauna bena ankaka.
4 Kansi o Nzambi ona wavuama ye nkenda, muna nzol’anene ina katuzola,
5 watuvana o moyo kumosi yo Kristu kana nkutu vava twakala twafwa muna makuzuka—muna nsambu zandi nwavuluzilwa.
6 Watufula yo kutuvuandisa kumosi kuna zulu muna Kristu Yesu,
7 kimana muna tandu* ina ikwiza kasonga ulolo wa umvuama wa nsambu zandi muna walakazi* wandi kwa yeto muna Kristu Yesu.
8 Muna nsambu zazi i nwavuluzilwa muna lukwikilu, ke mu ngolo za yeno kibeni ko; mu lukau lwa Nzambi kaka.
9 Ke mu mavangu mpe ko, kimana valembi kala yo muntu okuyisana.
10 Oyeto tu salu kia moko ma Nzambi, twavangilwa muna Kristu Yesu muna mavangu mambote mana Nzambi kateka kutukubikila vo twavanga.
11 Dianu, nusungamena wo vo muna kolo kiavioka, oyeno esi zula* muna nitu, nwayikilwa vo “mindembi-zengwa” kw’awana “bazengelwa” muna moko ma wantu.
12 Muna kolo kiakina ke nwazaya Kristu ko, nwavambana ye zula kia Isaele, ke nwakala mu makangu ma nsilu ko; ke nwakala ye vuvu ko ye ke nwazaya Nzambi ko ova nza.
13 Kansi muna Kristu Yesu, oyeno kwanda nwateka kala, owau nufinameso muna menga ma Kristu.
14 Kadi yandi i luvuvamu lweto, ona wayikakesa buka yole se kimosi yo bangula e yaka kiabavambulanga.
15 Muna nitu andi kasukisila kitantu, i sia vo, Nsiku una ye nkanikinu ye nkoki, kimana kavangila muna yandi kibeni e buka yole se muntu mosi ampa yo twasa ungudi,
16 katoma wizanesa e buka yole yo Nzambi muna nti ampasi,* kimana yakala se nitu imosi, wau kasukisa e kitantu muna yandi kibeni.
17 Wayiza samuna e nsangu zambote za luvuvamu kwa yeno nwakala kwanda yo luvuvamu kw’awana bafinamene,
18 kadi muna yandi, e buka yau yole, ilenda finama kwa Se muna mwanda umosi.
19 Dianu vo, ke nu anzenza ye anangi diaka ko, kansi e kisi nsi kieno kimosi y’aveledi, nu esi nzo a Nzambi,
20 nwatungilwa vana nkubilwa antumwa ye angunza, Kristu Yesu yandi kibeni i mbuta tadi dia konko kia nkubilwa.
21 Muna yandi e nzo yawonso itomene yikakeswa, ivongeswanga yakituka se tempelo avauka a Yave.
22 Oyeno mpe muna yandi i nwasikidisilwa kumosi se kalu kia Nzambi muna mwanda.
Mvovo vana yand'a lukaya
^ Yovo “kadilu.”
^ Tala Nsas’a Mvovo.
^ Yovo “nkenda.”
^ Awana bena vo ke Ayuda ko.
^ Tala Nsas’a Mvovo.
