Efeso 3:1-21
3 Muna kuma kiaki, omono Paulu wa mbakami a Kristu Yesu muna kuma kia yeno esi zula*—
2 nwawa oma ma uselo wa nsambu za Nzambi una yavewa muna wete dieno,
3 ye mpila yazayisilwa e mbumb’avauka muna lusengomono, wauna yateka kunusonekena mambu makete.
4 Dianu vo, vava nutanga mo, nulenda zaya umbakuzi wame wa mbumb’avauka a Kristu.
5 Muna mbandu zankaka, e mbumba yayi ke yazayiswa kwa muntu ko wauna isengomweno kwa ntumwa zandi zavelela ye angunza muna mwanda,
6 i sia vo, esi zula* betambula yeto e vua, tukala se yîkwa muna nitu imosi, tutambula yau o nsilu yo Kristu Yesu, muna nsangu zambote.
7 Yakitulwa se selo kia mbumb’avauka mun’owu wa lukau lwa nsambu za Nzambi zina yavewa muna nkum’andi.
8 Kwa mono nsundidi o keva vana vena aveledi awonso, kwavewa e nsambu zazi kimana yasamuna kwa zula e nsangu zambote za umvuama wa Kristu ulembi tangakana,
9 yasadisa awonso bamona una Nzambi ona wavanga lekwa yawonso kesengomwenanga e mbumb’avauka ina yaswekama tuka kuna nz’ankulu.
10 Ediadi diavangama kimana owau muna lusadisu lwa nkutakani, e ngangu za mpila mu mpila za Nzambi zazayakana kwa tuyalu y’akwa wisa kuna zulu.
11 Mun’owu wa kani dia mvu ya mvu dina kakana muna Kristu Yesu wa Mfumu eto,
12 muna ndiona tunina ye unkabu wavova ye vuvu kia finama Nzambi muna lukwikilu lweto muna Kristu.
13 Dianu vo, inudodokele nwalembi vutuka manima mu kuma kia mpasi zame muna wete dieno, e kuma kadi i nkembo mu kuma kieno.
14 Kiaki i kuma mfukamene vana ndose a Se,
15 ona wina vo i tuku dia nkumbu za makanda mawonso kuna zulu ye ova ntoto.
16 Isambanga kimana kanuzadisa yo nkembo andi, e kiwuntu kieno kia kati kiakumama muna nkum’a mwand’andi,
17 mu kuma kia lukwikilu yo zola kweno, Kristu kakala muna ntima mieno. Nwasimama e mianzi yo sikila muna nkubilwa
18 kumosi ye aveledi awonso, nwatoma zaya owu wina o yalumuka, lambuka, lá yo sina,
19 nwazaya o zola kwa Kristu kuna kuviokele o zayi, kimana nwazadiswa ye fu yawonso ya Nzambi.
20 Mun’owu wa nkum’andi una usalanga omu yeto, Nzambi olenda vanga mayingi lutila nkutu mawonso tulombanga yovo yindula,
21 oku kwa yandi i nkembo muna nkutakani ye muna Kristu Yesu, muna mbandu zawonso yamu mvu ya mvu. Amen.
