Efeso 4:1-32
4 Dianu vo, omono mbakami muna Mfumu, inudodokele nwakangala e nkangala ifwene e mboka ina nwabokelwa,
2 yo lusakalalu* lwawonso yo lulembamu yo luzindalalu, nuyambuziananga e mambu muna zola,
3 nusianga e sungididi kia tatidila untwadi wa mwanda muna kangwa kia ungudi.
4 Vena ye nitu imosi, mwanda umosi, wauna venena ye vuvu kimosi kaka kina nwabokelelwa;
5 Mfumu mosi, lukwikilu lumosi, luvubu lumosi;
6 Nzambi mosi ye Se dia wantu awonso, ona wina vana ntandu a wantu awonso, kw’awonso ye muna awonso.
7 Konso muntu omu yeto wavewa e nsambu muna tezo kia lukau lwangovo kavana o Kristu.
8 Kadi e sono kivovele vo: “Vava katomboka kuna zulu wanata abakami; wavana wantu se tukau.”
9 Ozevo, o mvovo “katomboka” aweyi usongele? Nga ke usongele ko vo wakulumuka mpe muna yanda-yanda, i sia vo, ova ntoto e?
10 Ndiona wakulumuka i yandi mpe watomboka vana ntandu a zulu diawonso, kimana kalunganesa mawonso.
11 Oyandi wavana ankaka se ntumwa, ankaka se ngunza, ankaka ateleki a nsangu zambote, ankaka avungudi ye alongi,
12 ye kani dia singika* aveledi muna salu kia uselo, muna vangamesa e nitu a Kristu,
13 yavana yeto awonso tuluaka muna untwadi wa lukwikilu yo vua zayi wakieleka wa Mwan’a Nzambi, kimana twazikuka yo luaka emvimba muna tezo kia kiwuntu kia Kristu.
14 Kimana twalembi kala diaka yingiana-ngiana, twanatumunwa kwa mavuku, yo tungianiswa kwa tembwa yawonso ya malongi ma luvunu, muna luvuki lwa wantu, ye muna ndekwa zambi.
15 Kansi wau tuvovanga e ludi, muna zola yambula twanungunuka muna mambu mawonso muna Kristu, una vo i ntu.
16 Muna yandi e nitu yawonso yayikakiana kimana e yîkwa yawonso yasalanga kumosi muna lungisa oma mavuilu o mfunu. Vava konso kîkwa kisalanga una ufwene, disadisanga e nitu yanungunuka ye kuyivangamesa muna zola.
17 Edi mpovele yo sia umbangi muna Mfumu vo, ke nufwete kangalela diaka ko nze esi zula* ana bekangalelanga muna ngindu zau za kizowa.*
18 E nyindu miau mina muna tombe yo vambana muna moyo utukanga kwa Nzambi, muna kuma kia bubu kiau yo bâla kwa ntima miau.
19 E ntona zau zayiva kikilu, bakivene muna mavangu mansoni,* bevanganga usafu wawonso kuna loko.
20 Kansi, oyeno ke nwalongoka ko vo Kristu i wau kena,
21 ozevo, avo nwawa yo longwa kwa yandi, e ludi muna Yesu kina.
22 Nwalongwa kimana nwakatula kiwuntu kiankulu kina kiafwanana ye kadilu kieno kiantete, kina kiyiviswanga mun’owu wa maketo mandi ma luvuki.
23 Nukwamanana vanguluka muna nyindu mieno,*
24 nuvuata kiwuntu kiampa kina kiavangilwa muna luzolo lwa Nzambi, muna unsongi ye kwikizi kiakieleka.
25 Dianu vo, wau nuyambwidi luvunu, nuvovang’e ludi muntu yo nkw’andi, kadi tu yîkwa yayikakiana.
26 Numona makasi, kansi ke nusumuki ko; ke nulundi makasi ko yakuna ndimuk’a ntangwa;
27 ke nusisila Nkadi ampemba nzila ko.*
28 Ndiona oyiyanga kayiyi diaka ko; kansi yambula kasala ye fululu kiawonso, kasala e salu kiambote muna moko mandi, kimana kakala ye kina kekayila ndiona okondelo.
29 E mvovo miambi ke mivaiki mu nua mieno ko, kansi nuvova kaka edi diambote mu kumika akaka muna ntangwa ifwene, kimana diatwasa nluta kw’awana bewá dio.
30 Ke nukendeleka mwand’avelela a Nzambi ko, una nwasilwa e dimbu yamuna lumbu kia lukûlu.
31 Nuyambula e ndudi yawonso, makasi, nganzi, ntantani, mvovo mia lutiangu yo bi wawonso.
32 Kansi nusonga ngemba kwa muntu yo nkw’andi, nukala yo walakazi, nuloloka muntu yo nkw’andi kuna mvevo wauna o Nzambi kanulolokela muna Kristu.
Mvovo vana yand'a lukaya
^ Yovo “lusakalalu lwa ntima.”
^ Yovo “longa.”
^ Awana bena vo ke Ayuda ko yovo awana ke bekwikilanga mu Nzambi ko.
^ Yovo “mpavala; vavala.”
^ Muna Kingerekia, a·selʹgei·a. Tala Nsas’a Mvovo.
^ Sina, “muna mwand’a ntima mieno.”
^ Yovo “ke nusisila Nkadi ampemba fulu ko.”
