Efeso 5:1-33
5 Dianu vo, nukala atanginini a Nzambi nze wan’anzolwa,
2 nukangalela muna zola, wauna o Kristu katuzolela* yo kuyitambika muna wete dieto* se lukau ye kimenga, kia nsunga zambote kuna kwa Nzambi.
3 E zumba* ye usafu wawonso ye loko ke diyikwa nkutu ko vovo nwina, wauna ufwanukini kwa nkangu avelela;
4 ngatu mambu mansoni yovo moko ya uzowa ngatu ya usafu—mambu mena vo ke mansongi ko—kansi nuvutulanga kaka matondo kwa Nzambi.
5 Kadi nuzeye ediadi yo toma dio sungamena yeno kibeni vo, kana munta-zumba* yovo mundembi-velela yovo nkwa loko, i sia vo, nsambidi a teke, kena ye vua ko muna Kintinu kia Kristu ye kia Nzambi.
6 Ke nuyambula muntu ko kanuvukika muna mvovo miakondwa mfunu, kadi muna mambu mama i mukwizila makasi ma Nzambi kwa wan’akolami.
7 Dianu vo, ke nukadi yau ntwadi ko;
8 kadi tombe nwakala, kansi owau nu ntemo muna Mfumu. Nukangalelanga nze wan’a ntemo,
9 kadi e mbongo a ntemo i mawonso mambote, mansongi ye ludi.
10 Nuvavang’o zaya mana mazolakene kwa Mfumu;
11 nuyambula kala yau e ntwadi muna mavangu ma tombe makondwa o mfunu; kansi nusenzeka mo.
12 Kadi mana bevangilanga kuna sweki diansoni nkutu muna mo yika.
13 Mambu mawonso masenzamene,* ntemo osenzekele mo, kadi mawonso mana masenzamene i ntemo.
14 I kuma diavovelwa vo: “Sikama ongeye olele, fuluka muna mafwa, Kristu okutemena.”
15 Dianu vo, nutoma tala e nkangala nukangala, ke nukangadi nze minkondwa-ngangu ko, kansi nze akwa ngangu kaka,
16 Nutoma sadilanga e ntangw’eno,* e kuma kadi e lumbu i bi.
17 Muna diadi, ke nukadi nze minkondwa-ngangu ko, kansi nuvavanga o zaya owu wina o luzolo lwa Yave.
18 Ke nukolwa vinyu ko, ina ifilanga muna mavangu ma usafu,* kansi nuzala kaka yo mwanda.
19 Nuvovaziana muna nkunga, nusanisina Nzambi, muna nkunga mia kimwanda, nuyimbidila Yave nkunga muna ntima mieno,
20 ntangwa zawonso tutondanga Nzambi eto ye Se muna mambu mawonso, muna nkumbu a Mfumu eto Yesu Kristu.
21 Nusakalela muntu yo nkw’andi muna vumi wa Kristu.
22 Yambula akento basakalela akazi au nze kuna kwa Mfumu,
23 kadi yakala i ntu a nkaz’andi wauna Kristu kenena se ntu a nkutakani, yandi i mvuluzi a nitu yayi.
24 Wauna e nkutakani isakalelanga Kristu, akento mpe bafwete sakalelanga akazi au muna mawonso.
25 Akala, nuzolanga akazi eno wauna Kristu kazolela e nkutakani yo kukiyekola mu kuma kia nkutakani,
26 kavaula yo, kavelelesa yo muna nsukul’a maza ma Diambu dia Nzambi,
27 kimana kakitula e nkutakani se ya nkembo vana ndose andi, yakondwa e tona yovo fu ngatu mambu mena wau, kansi yakala kaka yavelela yo kondwa twangu.*
28 Diau dimosi mpe, akala bafwete zolanga akazi au nze una bezolelanga e nitu za yau kibeni. Yakala ona ozolele nkaz’andi, ukizolele,
29 ke vena muntu ko omenganga e nitu andi, kansi odikilanga yo yo lunga-lunga yo wauna Kristu kevanganga kwa nkutakani,
30 e kuma kadi oyeto tu yîkwa ya nitu andi.
31 “Muna kuma kiaki, o yakala osisa se diandi yo ngudi andi kalaminina* nkaz’andi, yau wole bekala se nitu mosi.”
32 E mbumba yayi yavauka yanene kikilu. Muna kuma kia Kristu ye nkutakani i mpovele.
33 Dianu vo, konso yakala vovo nwina kafwete zola nkaz’andi nze yandi kibeni; vo i nkento kafwete toma zitisanga yakala diandi.
Mvovo vana yand'a lukaya
^ Dilenda kala vo, “kanuzolela.”
^ Dilenda kala vo, “wete dieno.”
^ Muna Kingerekia, por·neiʹa. Tala Nsas’a Mvovo.
^ Tala Nsas’a Mvovo, “Mvukana za usafu.”
^ Yovo “matumbilu.”
^ Sina, “nusumbanga e ntangwa.”
^ Yovo “umpumbulu.”
^ Yovo “mvindu.”
^ Yovo “kakala kaka yo.”
