Efeso 6:1-24
6 E wana, nulemvokelanga mase ye ngudi zeno mun’owu wa luzolo lwa Mfumu, kadi ediadi diansongi.
2 “Zitisa se diaku yo ngudi aku,” owau i nkanikinu wantete wavewa kumosi yo nsilu:
3 “Kimana wakala kiambote yo zinga kolo kiayingi ova ntoto.”
4 Amase, ke nufungisa wan’eno makasi ko, kansi nubasansila muna longi ye luludiku lwa Yave.
5 Antaudi, nulemvokela mfumu zeno muna kinitu, kuna vumi ye zakamu ye ntim’asikila, nze kuna kwa Kristu,
6 ke vava nuyingilwanga kaka ko nze mingiangidika wantu, kansi nze ntaudi za Kristu, nuvanganga luzolo lwa Nzambi ye nsi a ntima yawonso.
7 Nusalanga ye nyindu ambote, nze ntaudi kuna kwa Yave, ke kwa wantu ko,
8 kadi nuzeye wo vo konso muntu ovanga edi diambote, otambula nsendo kuna kwa Yave, kakala ntaudi yovo mvevoki.
9 Amfumu mpe, nuvanganga diau adimosi kwa ntaudi zeno, ke nubavumisinge ko, kadi nuzeye wo vo yeno yo yau, o Mfumu eno mosi kaka kuna zulu, ke swaswanesanga wantu ko.
10 Vo i makaka, nukumamena kaka muna Mfumu ye muna nkum’andi anene.
11 Nuvuata nwaninwa yawonso ya Nzambi kimana nwalenda telamena umpuki* wa Nkadi ampemba;
12 e kuma kadi e ndwan’eto ke ya menga ye nitu ko, kansi ye tuyalu, akwa wisa, nyadi mia tombe kia nza yayi ye vu kia mianda miambi kuna zulu.
13 Muna kuma kiaki, nuvuata nwaninwa yawonso ya Nzambi kimana nwalenda zizidila muna lumbu kiambi, wau numana vanga mawonso, nutelama.
14 Dianu vo, nutelama ye mpond’a ludi yakangwa muna tuketo tweno yo vuata nkikw’a tulu a unsongi,
15 ye nsampatu muna malu, nwakubama mu samuna e nsangu zambote za luvuvamu.
16 Vana ntandu a mawonso mama, nubonga e ngubu anene ya lukwikilu, ina nulenda zimina maswanga mawonso matiya* ma ndiona wambi.
17 Nuvuata mpe mpu a luvuluzu ye nsosolo a mwanda, i sia vo, diambu dia Nzambi,
18 ye nsamba zawonso ye ndodokela zawonso, nulombanga ntangwa zawonso muna mwanda. Muna kuma kiaki, nuyingila ntangwa zawonso yo dodokela muna wete dia aveledi awonso.
19 Nusambanga mpe mu kuma kiame, yavewa dina ivova vava ibatuna o nua, kimana yakala ye unkabu wavova muna zayisa e mbumb’avauka ya nsangu zambote,
20 zina isadilanga se nkunzi* muna tuvambu, kimana yavovela zo kuna unkabu wauna mfwete vovela.
21 Vo i mambu mame ye salu kiame, o Tukiko wa mpangi anzolwa ye selo kiakwikizi muna Mfumu, okunuzayisa mambu mawonso.
22 Intumini kwa yeno ye kani diadi, kimana kanuzayisa mambu meto mawonso, kafiaulwisa mpe ntima mieno.
23 Luvuvamu kuna kw’ampangi yo zola yo lukwikilu lutuka kwa Nzambi wa Se ye kwa Mfumu Yesu Kristu.
24 Yambula e nsambu za Nzambi zakala ye awonso ana bena ye nzol’a mvu ya mvu muna Mfumu eto Yesu Kristu.
