Filemone 1:1-25
1 Paulu, wa mbakami muna diambu dia Kristu Yesu, yo Timoteo wa mpangi eto, kuna kwa Filemone wa nzolw’eto yo nsadi wa nkw’eto,
2 ye kuna kwa Afia wa nsang’eto yo Arekipo wa nkw’eto e kesa, ye kuna kwa nkutakani ina muna nzo aku:
3 Nsambu koko lwina ye luvuvamu lutuka kwa Nzambi wa Se dieto yo Mfumu Yesu Kristu.
4 Ntangwa zawonso ikusianga muna sambu yame vava itondanga Nzambi,
5 wau iwanga lukwikilu luaku yo zola kwaku muna Mfumu Yesu ye muna aveledi awonso.
6 Isambanga kimana o lukwikilu tuna lwau e ntwadi lwasadisa wazaya mambu mawonso mambote tuna mau muna Kristu.
7 Kadi kiese kiayingi yamwene yo fiaulwiswa wau yawidi o zola kwaku, e kuma kadi e ntima mia aveledi mifiaulwisu muna ngeye, e mpangi.
8 Dianu vo, kana una vo ngina yo unkabu wayingi wa vova muna Kristu yo kukanikina wavanga dina diambote,
9 idodokele muna zola, wau kina vo mono Paulu se i mbuta kwame, owau mpe i mbakami muna diambu dia Kristu Yesu.
10 Idodokele muna diambu dia Onesimo wa mwan’ame, oyu yakitukila e se vava yakala muna pelezo.*
11 Kakala mfunu ko kwa ngeye, kansi owau mfunu kena kuna kwa ngeye yo mono.
12 Imvutwidi kwa ngeye, yandi i ntim’ame.*
13 Yadi zola vo kakala yame kaka kimana kansadila vana fulu kiaku wau ngina mu pelezo muna diambu dia nsangu zambote.
14 Kansi kizolele vanga diambu ko kondwa kwa luve lwaku, kimana e vangu diaku diambote diakala dia ntim’a mvevo, ke dia komekenwa ko.
15 Nanga i kuma kavambanena yaku mu fikolo,* kimana kavutuka emvimba kwa ngeye,
16 kansi owau ke nze ntaudi diaka ko, kadi osundidi ntaudi, i mpangi anzolwa kuna kwa mono, musungula kuna kwa ngeye, muna kinitu ye muna Mfumu.
17 Dianu vo, avo okumbadikila vo i nkundi aku,* untambula kuna ngemba wauna wadi vanga kwa mono.
18 Vana ntandu, avo mbi kàvanga yovo mfuk’aku kadia, yekeka yo kwa mono.
19 Mono Paulu, nsonekene dio muna koko kwame: Mono ifuta yo—lembi yika nkutu e mfuk’ame una yau ngeye kibeni, o moyo aku.
20 Elo, e mpangi, yambula yatambula lusadisu lwalu lutukidi kwa ngeye muna Mfumu; vuvika o ntim’ame* muna Kristu.
21 Ngina ye vuvu muna nlemvo waku, dianu isonekene, wau nzeye wo vo oluta vanga dina mpovele.
22 Vana ntandu, unkubikila mpe fulu kia luakila, kadi ngina ye vuvu vo se yavevolwa mu kuma kia sambu yeno muna kunusadila.
23 Epafera wa nkw’ame mbakami utumini mavimpi muna Kristu Yesu,
24 kumosi mpe ye Maku, Aresetako, Dema yo Luka, akw’ame asadi.
25 E nsambu za Mfumu Yesu Kristu zakala ye mwanda nusonganga.
Mvovo vana yand'a lukaya
^ Sina, “kangwa.”
^ Yovo “zola kwame.”
^ Sina, “ola mosi.”
^ Sina, “nkwa ntwadi.”
^ Yovo “zola kwame.”
