Filipi 1:1-30
1 Paulu yo Timoteo, ntaudi za Kristu Yesu, kuna kw’aveledi awonso muna Kristu Yesu ana bena omo Filipi, kumosi ye akengi ye selo ya salu:
2 Nsambu koko nwina yo luvuvamu lutuka kwa Nzambi wa Se dieto yo Mfumu Yesu Kristu.
3 Ntangwa zawonso ivutulanga matondo kwa Nzambi ame vava ikunusungamenanga
4 muna ndodokela zame zawonso mu kuma kia yeno awonso. Ntangwa zawonso idodokelanga kuna kiese,
5 mu kuma kia lukau lweno* muna nsangu zambote tuka muna lumbu kiantete yamu wau.
6 Kadi ngina ye ziku muna diambu edi, ndiona wayantika e salu kiambote vovo nwina ofokola kio yamuna lumbu kia Kristu Yesu.
7 Diansongi kwa mono yayindula diambu diadi mu kuma kia yeno awonso, kadi ngina yeno omu ntim’ame, oyeno nuna yame e ntwadi muna nsambu za Nzambi, kiakala muna tuvambu twame, muna tanina yo sikidisa e nsangu zambote kuna kw’akwa wisa.
8 Kadi o Nzambi i mbangi ame muna mpila ikunulakukilang’o moyo yeno awonso yo zola kwawonso wauna Kristu Yesu kekunuzolelanga.
9 E kiaki i kuma isambilanga vo e nzol’eno yawokela kikilu yo zayi wasikila yo umbakuzi wawonso;
10 nwazaya oma masundidi o mfunu, kimana nwakondwa mpilakanu yo lembi tesesa akaka masakuba, yamuna lumbu kia Kristu,
11 nwayima mbongo a ndungidi, ina muna Yesu Kristu, muna nkembo ye lusanisinu lwa Nzambi.
12 Ampangi, nzolele nwazaya wo vo, o mambu mambwididi manungunwini nsangu zambote,
13 o tuvambu twame muna diambu dia Kristu, tutomene zayakana vana vena Ayingidi awonso a lûmbu lwa ntinu ye kwa ankaka.
14 Owau muna kuma kia tuvambu twame, ayingi muna mpangi zame muna Mfumu bakasakene yo songa unkabu wavova diambu dia Nzambi kondwa wonga.
15 Dialudi vo, ankaka besamunanga Kristu ye kimpala ye ntantani, kansi ankaka ye luzolo lwambote.
16 Awaya besamunanga Kristu muna zola, kadi bazeye wo vo yavewa kiyekwa kia tanina e nsangu zambote;
17 kansi ana bavitidi bevangilanga wo muna ntantani, ke mu ntim’asikila ko, bazolele kuntwasila mpasi muna tuvambu twame.
18 Nkia nluta ditwasa? Mpasi vo Kristu kasamunwa muna mpila zawonso, kiakala kuna kuvunina yovo muna ludi, i diau ntomene mwena kiese. Elo, i diau mpe ikwamanana mwena kiese,
19 kadi nzeye wo vo muna ndodokela zeno i mukwizila luvuluku lwame yo lusadisu lwa mwand’a Yesu Kristu.
20 Ngina ye ziku ye vuvu vo, kimweswa nsoni muna konso diambu ko. Kansi mu kuma kia unkabu wame wavova, owau itundidika Kristu nze una yateka vanga, ikuntundidika omu nitu ame, kiakala mu moyo yovo mu lufwa.
21 Kadi kwa mono, okala moyo i Kristu, o fwa i nluta.
22 Avo ngina moyo muna nitu, i mbongo a salu kiame; kansi owu nsola kizayisa wo ko.
23 Ntelamen’o ntima muna mambu mama mau mole, kadi nzolele vo yavevolwa kimana yakala yo Kristu, ediadi i disundidi o wete.
24 Kansi, disundidi o mfunu yakala kaka muna nitu muna diambu dieno.
25 Dianu vo, wau ngina ye ziku kiaki, nzeye wo vo ikala kaka yeno muna lunungunuku lweno ye kiese kia lukwikilu lweno,
26 kimana wau ikala yeno diaka, e kiese kieno kiawokela muna Kristu Yesu.
27 Yambula e nkadilu eno yakala e ngwizani ye nsangu zambote mu kuma kia Kristu, kiakala vo ngizidi vovo nwina yovo kina vo ko, yawá e nsangu zeno yo zaya vo nusikidi muna nyindu yo ntima mosi* wau nusalanga e ntwadi muna tatidila lukwikilu lwa nsangu zambote,
28 ke nuvumiswa nkutu mu konso diambu ko kwa atantu eno. E kiaki i sinsu kia lufwasu lwau, kansi kia luvuluku kuna kwa yeno; sinsu kitukidi kwa Nzambi.
29 Kadi mu kuma kia Kristu nuvaninu e lau, ke mu kwikila kaka muna yandi ko, kansi nwamona mpe mpasi mu kuma kiandi.
30 Kadi nunwananga e ndwana yau imosi ina nwamona kwa mono, owau nuwidi wo vo yakinu yo nwana.
