Filipi 2:1-30
2 Ozevo, avo vena yo lukasakeso muna Kristu, avo vena yo lufiaulwisu lwa zola, avo nutokanenanga wete dia muntu yo nkw’andi, avo vena yo walakazi ye nkenda,
2 ozevo nulunganisa e kiese kiame muna kalanga yo nyindu mosi ye nzola mosi, akwa ntima mosi, ye kani dimosi.
3 Ke nuvangila konso diambu muna ntantani ko ngatu kuyitundidika, kansi kuna lulembamu kaka nubadikila ankaka vo banusundidi,
4 ke nuvavingi kaka wete wa yeno kibeni ko, kansi wete dia akaka mpe.
5 Nukala yo nyindu una wakala muna Kristu Yesu,
6 ona wina vo, vava kakala muna mpw’a Nzambi, kasidi wo yindula ko owu wa wombola e kimfumu, i sia vo, kafwanana yo Nzambi.
7 Kansi, wakisisa e nkatu, wabaka e mpw’a ntaudi yo kituka se muntu.
8 Edi disundidi, vava kakituka se muntu, wakisakidika yo songa nlemvo yamuna lufwa, elo, lufwa vana nti ampasi.*
9 Muna kuma kiaki, o Nzambi wansia vana fulu kisundidi otundalala yo kumvana e nkumbu iviokele e nkumbu zawonso,
10 kimana muna nkumbu a Yesu mwafukamena makungunu mawonso—awana bena kuna zulu ye awana bena ova ntoto ye awana bena kuna nsi a ntoto—
11 tubini twawonso twatambulwila vo Yesu Kristu i Mfumu muna nkembo a Nzambi, wa Se.
12 Dianu vo, azolw’ame, nukwamanana songa o nlemvo ke vana ngina kaka ko, kansi musungula avo kina vo ko, nusiamanana sala kuna vumi ye zakamu muna diambu dia luvuluzu lweno.
13 Kadi o Nzambi muna luzolo lwandi, okunusiamisa, muna kunuvana tima yo nkuma wa sala.
14 Nuvangilanga mawonso kondwa kwa yidima ye mpaka,
15 kimana nwakondwa mpilakanu ye tumbu, nwakala wan’a Nzambi bakondwa twangu* vana kati kwa mbandu yayi yambi yo tekomoka, vana nukeziminanga nze mini omu nza.
16 Nutoma simbinina e diambu diamoyo, kimana yakala ye kuma kia kuyisanina muna lumbu kia Kristu, kadi nzeye wo vo kialundumuka nkatu ko ngatu funtuka nkatu.
17 Kana nkutu vo ngitilu nze lukau lwa ndua vana kimenga ye salu kiavauka nusadidi muna lukwikilu, omono ngiangalele, ngiangalele kumosi yo yeno awonso.
18 Diau adimosi, oyeno mpe nuyangalala yo kemba yame.
19 Owau ngina ye vuvu muna Mfumu Yesu vo ke kolo ko se yanutumina Timoteo, kimana yakumikwa vava itambula e nsangu zeno.
20 Kadi kina yo muntu ankaka ko wina ye tima nze yandi, ona otoma tokanenanga mambu meno.
21 Kadi ankaka, mambu ma yau kibeni kaka bevavanga, ke mana ma Yesu Kristu ko.
22 Nuzeye e ziku kina kasonga, nze mwana osadilanga se diandi, osadidi yame muna lunungunuku lwa nsangu zambote.
23 Dianu vo, yandi nzolele tuma-tuma, vava izaya owu wina mambu mame.
24 Kansi, ngina ye vuvu muna Mfumu vo, ke kolo ko mono kibeni se ngiza.
25 Kansi owau, edi mbwene vo diamfunu yanutumina Epaferodito wa mpangi ame, nkw’ame a salu ye nkw’ame kesa, ona nwatuma kimana kansadila,
26 kadi olakukang’o moyo a monana yo yeno awonso yo kendalala kikilu e kuma kadi nwawa wo vo yela kayela.
27 Yela kikilu kayela, wadi fwa nkutu; kansi o Nzambi wamfwila e nkenda, ke yandi kaka ko, yo mono mpe kimana yalembi mona diaka e ntantu vana ntandu a ntantu.
28 Dianu vo, intumini mu nzaki, kimana vava numonana yandi, nwamona diaka e kiese, omono mpe yakulula e ntantu.
29 Nuntambula muna Mfumu ye kiese kiawonso wauna nwakulukilwa, nuzitisanga wantu a mpila yayi,
30 e kuma kadi muna diambu dia salu kia Kristu* i kadi fwila, wau ke nwina yame ko osidi o moyo andi mu vonza muna kunsadila.
