Filipi 3:1-21
3 Vo i mankaka ampangi zame, nuyangalelanga muna Mfumu. Ke dialutokaneso ko kwa mono mu kunusonekena mambu mau mamosi, kadi dialutaninu kwa yeno.
2 Nuyikenga ye mbwa; nuyikenga ye awana bekotanga ankaka o nsoki; nuyikenga ye awana betatidilanga e fu kia zengwa.
3 Kadi yeto twazengwa o zengwa kwakieleka, oyeto tusalanga e salu kiavauka muna mwand’a Nzambi yo kuyisanina muna Kristu Yesu, ke tusianga vuvu kieto muna nitu ko,
4 kana una vo mono ngina ye kuma kia bund’e vuvu muna nitu, ke mu wantu ankaka ko.
Avo muntu oyindula vo una ye kuma kia bund’e vuvu muna nitu, omono nsundidi:
5 yazengwa muna lumbu kianana, i mwisi zula kia Isaele, i mwisi kanda dia Benyamini, i Nyibere yawutwa kwa mase ma Ayibere, i Mfarisi mun’owu wa nsiku;
6 mu kuma kia vema kwame, yabangika e nkutakani; mu kuma kia ndungidi muna nsiku, yasonga vo yakondwa e tumbu.
7 Kansi, mana mantwasilanga e nluta, mbadikidi mo se mfwilu* muna diambu dia Kristu.
8 Edi disundidi, mbadikidi mpe yawonso se mfwilu muna diambu dia zayi wa Kristu Yesu wa Mfumu ame una usundidi. Muna kuma kiandi, mbembwele yawonso, ibadikilanga yo se mbole,* kimana yabaka Kristu,
9 yakala muna yandi, ke mu kuma kia ndungidi ame ko muna lundanga o Nsiku, kansi mu kuma kia ndungidi ya lukwikilu muna Kristu, ye ndungidi a Nzambi mu kuma kia lukwikilu.
10 Nzolele kunzaya yo nkum’a lufuluku lwandi, yamona e mpasi nze yandi, yafwa mpe nze yandi.
11 Isiang’e ngolo kimana yavua e lau diakala muna lufuluku lwantete lwa mafwa.
12 Ke sia ko vo ntambwidi kala o nsendo ngatu kituka se muntu alunga, kansi isianga kaka e ngolo kimana yatambula o nsendo una yasolelwa* kwa Kristu Yesu.
13 Ampangi, kikuyibadikilanga ko vo ntambwidi wo kala; kansi dimosi kaka mvanganga: Ivilakananga mana mena kuna nima, inanukinanga mana mena kuna ntwala,
14 isianga ngolo muna tambula o nsendo yabokelelwa kwa Nzambi muna Kristu Yesu.
15 Dianu vo, awana bazikukidi vava twina, yambula bakala yo nyindu wau, avo ngindu zaswaswana nuna zau muna konso diambu, Nzambi osinga kunusengomwena nyindu asikila.
16 Kansi, muna tezo kina tunungunukini, yambula twakwamanana kangala nkangala ansongi muna fu kiau kimosi.
17 Ampangi, nukala e ntwadi muna kuntanginina, nusia meso mun’awana bekangalanga e nkangala ina tunusisidi e mbandu.
18 Kadi ayingi bena—nkumbu miayingi ikubayikanga kansi owau kuna kinsanga ibayikidi—ana bekangalanga nze mbeni za nti ampasi* a Kristu.
19 E mbaninu au i lufwasu, nzambi au i vumu, e nkembo au i nsoni zau, oma ma nza kaka beyindulanga.
20 Kansi e kisi nsi kieto kuna zulu kina, i kuna kutuka mvuluzi ona tuvingilanga ye tima diawonso, Mfumu Yesu Kristu,
21 ona okitula e nitu zeto zasakalala* e mfwanani ye nitu andi ya nkembo muna nkum’andi usundidi, una ukunsadisanga mu sakidika e lekwa yawonso muna yandi kibeni.
Mvovo vana yand'a lukaya
^ Dilenda kala vo, “mbembwele mo.”
^ Yovo “titi.”
^ Sina, “yabakilwa.”
^ Tala Nsas’a Mvovo.
^ Yovo “zatovoka.”
