Filipi 4:1-23
4 Dianu vo, e mpangi zame azolwa, ana ilakukilang’o moyo, nu kiese ye kolowa kiame, i nsikila yayi nusikila muna Mfumu, azolw’ame.
2 Nkasakese Ewodia, nkasakese mpe Suntuki kimana bakala yo nyindu mosi muna Mfumu.
3 Elo, idodokele mpe, nze nkw’ame wakieleka muna salu, kwamanana sadisa akento awaya ana befuntukanga yame muna diambu dia nsangu zambote, kumosi yo Kelemento ye ankaka mpe akw’ame muna salu, ana bena vo e nkumbu zau zina muna nkand’a moyo.
4 Ntangwa zawonso nuyangalala muna Mfumu. Mpovele wo diaka vo, Nuyangalala!
5 O ntim’eno anleka yambula wazayakana kw’awonso. O Mfumu wina omu ngenga.
6 Ke nutelama ntima muna konso diambu ko, kansi muna mambu mawonso muna sambu ye ludodokelo ye matondo, yambula ndomba zeno zazayiswa kwa Nzambi;
7 o luvuvamu lwa Nzambi luna luviokele umbakuzi wawonso luyingila ntima mieno ye makani meno muna Kristu Yesu.
8 Vo i mankaka ampangi, mawonso maludi, mawonso mazitu, mawonso mansongi, mawonso mavelela, mawonso ma zolakana, mawonso mevovelwanga e mbote, mawonso mambote ye mawonso ma lusanisinu, nukwamanana badika mambu mama.
9 O mambu mana nwalongoka ye mana nwatambula yo wá yo mona omu mono, i mau nuvanga, o Nzambi a luvuvamu okala yeno.
10 Ngiangalele kikilu muna Mfumu wau vo nungindwidi diaka. Kana una vo nwatokanenanga wete diame, ke nwakala ye lau diasonga wo ko.
11 Ke sia ko vo wau nkondelo i mpovele wo, kadi muna mambu mawonso nzeye yangalela konso kina ngina kiau.
12 Nzeye owu wakadila ye fiakete yo wokela. Muna mambu mawonso ye ntangwa zawonso nzeye mbumb’a kala wayukuta yo fwa nzala, kala ye ulolo ye kondwa má.
13 Muna mambu mawonso ngina ye nkuma muna ndiona okunkumikanga.
14 Kansi, diambote nwavanga wau nwakala yame entwadi muna mpasi zame.
15 Ozevo, yeno esi Filipi nuzeye wo mpe vo vava nwawa e nsangu zambote mu nkumbu antete, vava yakatuka oku Makedonia, ke vakala nkutakani ko yakala yame ntwadi muna diambu dia vana yo tambula, yeno kweno kaka;
16 kadi vava yakala kuna Tesalonika, nwantwikila lekwa muna diambu dia nsatu zame, ke nkumbu mosi kaka ko kansi nkumbu miole.
17 Ke sia ko vo lukau mvavanga, kansi mbongo ikunutwasila nluta miayingi nzolele.
18 Kadi, ngina ye yawonso ina mvuidi o mfunu, yo suva nkutu. Nzadidi wau ntambwidi kwa Epaferodito ina nuntwikidi, e nsunga zambote, lukau lutondakana yo yangidika Nzambi.
19 O Nzambi ame olungisa emvimba e nsatu zeno zawonso mun’owu wa umvuama wandi muna nkembo muna Kristu Yesu.
20 Kuna kwa Nzambi eto yo Se nkembo yamu mvu ya mvu. Amen.
21 Nuzingula mavimpi kw’aveledi awonso muna Kristu Yesu. Ampangi ana bena yame banutumini mavimpi.
22 Aveledi awonso banutumini mavimpi, musungula awana bena muna nzo a Kaisa.
23 E nsambu za Mfumu Yesu Kristu zakala ye mwanda nusonganga.
