Kolosai 2:1-23
2 Nzolele nwazaya wo vo vita yampwena inwananga muna wete dieno ye awana bena oko Laodikia ye muna wete dia awonso ana ke bamwene ntete ndose ame ko.*
2 Kimana e ntima miau miafiaulwiswa, bayikakiana muna zola, yo tambula umvuama wawonso wa lusikidisu lwa umbakuzi wau, kimana bakala yo zayi wasikila wa mbumb’avauka ya Nzambi, i sia vo, Kristu.
3 Muna yandi i mwaswekamena tusalu twawonso twa ngangu yo zayi.
4 Mpovele wo kimana valembi kala muntu okunuvukikila muna mvovo mia malengo.
5 Kanele vo kina yeno ko muna nitu, ngina yeno muna mwanda, iyangalalanga mu mona e nkubika zeno zambote yo lukwikilu lweno lwasikila muna Kristu.
6 Dianu vo, wauna nwatambulwila Kristu Yesu wa Mfumu, nukangalelanga muna yandi,
7 nusimama e mianzi yo kumikwa muna yandi, nwasikila muna lukwikilu, wauna nwalongwa, yo wokesa matondo.
8 Nutoma tala, valembi kala muntu okunubunduna mun’owu wa ndongota yo luvuki lwa tusansu twa wantu, yo mambu ma nza makondwa o mfunu, ke mun’owu wa Kristu ko;
9 kadi e fu yawonso ya Nzambi izele muna yandi.
10 Dianu vo, muna yandi ke nukondwa lekwa ko, yandi i ntu a luyalu lwawonso ye wisa.
11 Muna ngwizani eno yo yandi i nwazengelwa e nzengwa ina vo ke ya moko ko, muna katula e nitu a kinsuni, kansi e nzengwa ina vo ya Kristu.
12 Kadi nwazikwa kumosi muna luvubu lwandi, muna ngwizani eno yo yandi nwafulwa mpe kumosi muna diambu dia lukwikilu lweno muna mavangu ma nkum’a Nzambi, ona wamfula muna mafwa.
13 Vana ntandu, kanele vo nwafwa nwakala muna makuzuka meno yo lembi zengwa muna nitu zeno, Nzambi wanuvana o moyo kumosi yo yandi. Kuna mvevo waloloka makuzuka meto mawonso
14 yo vunzuna* o Nsiku una watusianga e kitantu. Wakatula wo muna nzila wau kakoma wo vana nti ampasi.*
15 Muna nti ampasi* wau i kasundila tuyalu y’akwa wisa, wabasunzula se abakami vana meso ma ndonga, yo kubadiatisila muna nkembo a nsundidi.
16 Dianu vo, ke nuyambula ko vo muntu kanufundisila muna kuma kia dia yo nua yovo kembelela nkinzi yovo nzangam’a ngonde ngatu lunda lumbu kia vundu.
17 O mambu mama i kîni* kia mana mekwiza, kansi e ziku kia mambu mama i Kristu.
18 Ke nuyambula ko vo muntu kanukutumuna o nsendo muna lulembamu lwa kivunina ye nsambila ambasi, “wau kesiandamanga” mu mana kamwene. Okuyitundidikanga e ntundidika ankatu muna nyindu andi a kinitu,
19 yo lembi landa o Ntu una vo muna yandi e nitu yawonso idikilwanga yo yikakeselwa kumosi muna mayikilu ye mianzi, kimana yavongela waun’o Nzambi kazolele.
20 Avo nwafwa kumosi yo Kristu muna mambu ma nza makondwa o mfunu, ekuma nuzingilanga vika sia vo nwakinu nwa nza yo lunda diaka nsiku:
21 “Kusimbi ko, kuyeleka ko, kuviakana ko,”
22 e lekwa yawonso ikuyifwilanga muna nsadilwa, mun’owu wa nkanikinu ye malongi ma wantu?
23 Kanele vo mambu mama malenda moneka vo ma ngangu, wau basikidisa nsambila ya yau kibeni yo songa lulembamu lwa kivunina, yo bangika e nitu, ke mena kwandi mfunu ko wau ke malendi kakidila e keto dia nitu ko.
Mvovo vana yand'a lukaya
^ Sina, “ke bamwene ndose ame muna nitu ko.”
^ Yovo “katula.”
^ Tala Nsas’a Mvovo.
^ Tala Nsas’a Mvovo.
^ Yovo “ninga.”
