Kolosai 3:1-25
3 Wau vo nwafulwa yo Kristu, nuvavanga mana ma zulu, kuna o Kristu kavuandidi kuna koko kwalunene kwa Nzambi.
2 Nusianga e sungididi muna mana ma zulu, ke ma nza ko.
3 Kadi nwafwa, o moyo eno waswekama yo Kristu muna Nzambi.
4 Vava Kristu wa moyo eto kesengomoka, oyeno mpe nusengomoka yandi muna nkembo.
5 Dianu vo, nufwasa yîkwa yeno ina ova nza, mu diambu dia zumba,* usafu, zinu diasaka dia vukana, e keto diambi ye loko, dina vo i sambu ya teke.
6 Muna kuma kia mambu mama i mukwizila o makasi ma Nzambi.
7 Oyeno mpe, mambu mama nwavanganga* muna nkadilu eno yankulu.
8 Kansi, owau nufwete katula omu yeno mawonso mama: e kudi,* makasi, mbi, mvovo mia malevo ye moko yansoni omo nua mieno.
9 Ke nuvunaziana ko. Nukatula kiwuntu kiankulu ye mavangu mandi,
10 nuvuata kiwuntu kiampa, kina kivangululwanga muna zayi wasikila mun’owu wa fwaniswa kia Ndiona wasema kio,
11 ke muna nkutu Mungerekia ko ngatu Nyuda, ndiona wazengwa yovo mundembi zengwa, nzenza, Nsekutia,* ntaudi yovo mvevoki; kansi Kristu i mawonso muna awonso.
12 Dianu vo, wau vo nwasolwa kwa Nzambi, nwavelela yo zolwa, nuvuata walakazi, nkenda, lusakalalu, lulembamu yo luzindalalu.
13 Nuvezananga mambu yo loloka muntu yo nkw’andi kuna mvevo, kana nkutu vo muntu obakidi nkw’andi diambu. Wauna Yave kanulolokela kuna mvevo, oyeno mpe i wau nufwete vanga.
14 Kansi, vana ntandu a mambu mama mawonso, nuvuata o zola, kadi i kangwa kiazikuka kia untwadi.
15 Nuyambula o luvuvamu lwa Kristu lwayala omo ntima mieno, kadi muna luvuvamu lwalu i nwabokelelwa muna nitu imosi. Nuvutulanga o matondo.
16 Yambula diambu dia Kristu diakala muna ntima mieno ye ngangu zawonso. Nulonganga yo kasakesa* muntu yo nkw’andi muna nkunga, muna sanisina Nzambi, muna nkunga mia kimwanda yo matondo, nuyimbidila Yave muna ntima mieno.
17 Konso mana nuvova yovo vanga, mawonso nuvangila mo muna nkumbu a Mfumu Yesu, nutondanga Nzambi wa Se muna yandi.
18 Akento, nusakalela akazi eno, wauna ufwene muna Mfumu.
19 Akala, nuzolanga akazi eno, ke nubafungila makasi ma ndudi ko.*
20 Wana, nulemvokelanga mase ye ngudi zeno muna mawonso, kadi dia luyangalalu kwa Mfumu.
21 Amase, ke nufungisa wan’eno makasi ko, kimana balembi kendalala.
22 Antaudi, nulemvokela mfumu zeno muna kinitu muna mawonso, ke vava nuyingilwanga kaka ko nze mingiangidika wantu, kansi ye ntim’asikila yo vumi wa Yave.
23 Mawonso nuvanga, nuvangilanga mo ye nsi a ntima yawonso nze kuna kwa Yave, ke kwa wantu ko,
24 kadi nuzeye wo vo kuna kwa Yave nutambula e vua dieno se nsendo. Nusala se ntaudi za Mfumu, Kristu.
25 Kadi ndiona ovanganga o bi otambula o bi una kevanganga, ke vena mpambula ko.
Mvovo vana yand'a lukaya
^ Muna Kingerekia, por·neiʹa. Tala Nsas’a Mvovo.
^ Yovo “i wau nwakangalelanga.”
^ Yovo “nsita.”
^ “Nsekutia” i muntu walembi temoka.
^ Yovo “wondelela.”
^ Yovo “ke nubabangiki ko.”
