Kolosai 4:1-18
4 Oyeno amfumu, nuvanga oma mansongi y’oma mafwene kwa ntaudi zeno, wau nuzeye wo vo oyeno mpe Mfumu luna yandi kuna zulu.
2 Nuzindalala muna sambu, ke nuvilakananga samba ko yo vutula matondo.
3 Vana ntandu, nutusambidilanga mpe kimana o Nzambi katuziulwila o mwelo twalenda samuna e diambu dia mbumb’avauka mu kuma kia Kristu, eyi nginina mu pelezo,
4 yasamuna yo mu mpila mfwete yo samunwina.
5 Nukangadilanga muna ngangu vana vena awana bena kuna mbazi, nutoma sadilanga e ntangw’eno.*
6 E mpov’eno yambula yakala yangemba ntangwa zawonso, yasiwa o mungwa, kimana nwazaya una nufwete vanina e mvutu kwa konso muntu.
7 Tukiko wa mpangi ame anzolwa ye selo kiakwikizi ye nkw’ame ntaudi muna Mfumu, okunusamunwina mambu mame mawonso.
8 Intumini kwa yeno kimana nwazaya owu twina, kafiaulwisa mpe ntima mieno.
9 Wizidi kumosi yo Onesimo wa mpangi ame anzolwa ye kwikizi, ona watuka kwa yeno; bekunusamunwina mawonso mabwidi okwaku.
10 Aresetako wa nkw’ame mbakami, unutumini mavimpi yo Maku wa yitu kia Banaba (ona nwakanikinwa vo nwantambula avo wizidi),
11 yo Yesu ona oyikilwanga vo Yuseto, ana bena mun’awana bazengwa. Yau kaka i akw’ame a salu kia Kintinu kia Nzambi, oyau i nto a lufiaulwisu* lwame.
12 Epafera wa ntaudi a Kristu Yesu ona watuka kwa yeno, unutumini mavimpi. Ntangwa zawonso ozindalalanga o samba muna wete dieno, kimana nwatelama, nwazikuka yo sikila muna luzolo lwawonso lwa Nzambi.
13 Insididi umbangi vo ovanganga mawonso muna wete dieno, y’awana bena muna Laodikia ye Yerapole.
14 Luka wa ngang’a mawuku anzolwa, unutumini mavimpi yo Dema mpe.
15 Nuzingula mavimpi kw’ampangi muna Laodikia, kwa Numfa ye nkutakani ina muna nzo andi.
16 Vava nutanga o nkanda wau, nuvanga mawonso watangwa mpe muna nkutakani a Laodikia, oyeno mpe nutanga una wa esi Laodikia.
17 Nuvovesa Arekipo vo: “Toma tala uselo una watambula muna Mfumu, walunganesa wo.”
18 I mavimpi mame mama, muna koko kwame, mono Paulu. Nuyindulanga tuvambu twame. Yambula e nsambu zakala yeno.
