Luka 1:1-80
1 Wau vo wantu ayingi bakivene mu soneka mambu mavangama, mana tukwikidi mpe oyeto,
2 ankaka batuzayisa mo mbangi za mona-meso y’ateleki a diambu dia Nzambi tuka kuna lubantiku,
3 omono mpe wau ntomene fimpa mawonso tuka kuna lubantiku, mbwene vo diambote yasonekena mo muna ndandani, e mfumu Teofilo,
4 kimana watoma zay’e ziku kia mambu mana walongwa.
5 Muna lumbu ya Erodi* wa ntinu a Yuda, mwakala nganga muna buka kia Abiya, nkumbu andi Zakariya. O nkaz’andi mosi muna wan’akento a Arone, nkumbu andi Elisabete.
6 Yau awole wantu ansongi vana ndose a Nzambi, kadi badiatilanga muna nkanikinu miawonso ye nsiku mia Yave yo kondwa tumbu.
7 Kansi ke bakala yo mwana ko, wau vo Elisabete sita, yau awole mpe se anunu kwau.
8 Una kasalanga salu kia kinganga vana ndose a Nzambi muna buka kiandi,
9 mun’owu wa fu kia anganga, e ntangw’andi ifwene kakota muna nzo avauk’a Yave kayoka e ndumbu.
10 Nkangu wawonso basambidi kuna mbazi muna ntangw’a yoka e ndumbu.
11 Mbasi a Yave imonekene kwa yandi, itelamene vana koko kwalunene kwa ziku dia ndumbu.
12 O Zakariya vava kamwene, otelamene moyo, wonga umbakidi.
13 Kansi, mbasi umvovese vo: “E Zakariya, kumoni wonga ko, kadi ndodokela zaku ziwakanene, o nkaz’aku Elisabete okuwutila mwan’a yakala, okumvana e nkumbu Yoane.
14 Okala ye yangi ye kiese, ayingi beyangalela luwutuku luandi,
15 nene kekala vana meso ma Yave. Ke nua vinyu ko ngatu má kiankolwa, ozala yo mwand’avelela tuka muna vumu kia ngudi andi,
16 wan’a Isaele ayingi kevutulwisa kuna kwa Yave wa Nzambi au.
17 Ovita kuna ndose andi muna mwanda ye ngolo za Eliya, kavilula e ntima mia mase muna wana, akolami mpe basikila muna ngangu zansongi, kakubikila Yave nkangu akubama.”
18 Zakariya ovovese mbasi vo: “Aweyi ndenda kadila ye ziku kia diambu diadi? Kadi se i nunu kwame, o nkaz’ame mpe se nunu.”
19 Mbasi umvutwidi vo: “I Ngambiele kwame, vana ndose a Nzambi itelamanga, ntuminu ngiza mokena yaku, yo kusamunwina nsangu zazi zambote.
20 Wá, baba okala, kuvova diaka ko yamuna lumbu kina mevangama mambu mama, kadi kukwikidi mambu mame ko mana melungana muna kolo kiasikidiswa.”
21 O nkangu bavingidinge Zakariya, basivikidi wau kakedi kolo kiayingi muna nzo avauka.
22 Una kavaikidi, kalendele vovana yau ko, babakwidi wo vo mona-meso kamwene muna nzo avauka. Ovangidi kak’e sinsu kwa yau, okedi se baba.
23 E lumbu yandi ya salu kiavauka* vava yalunga, wele kuna nzo andi.
24 Vava vavioka e lumbu yayingi, nkaz’andi Elisabete oyimiti, uyiswekele ngonde tanu, oku vo:
25 “I wau wuwu kampangidi o Yave muna lumbu ina kansidi e sungididi. Okatwidi luvezo lwame vana vena wantu.”
26 Vava kalungisa ngonde sambanu, mbasi Ngambiele watumwa kwa Nzambi kuna vata dia Ngalili, dina nkumbu a Nazarete,
27 kuna kwa ndumba mwenze ya zitikilwa kwa yakala, nkumbu andi Yosefe, mwisi nzo a Davidi, nkumbu a mwenze, Maria.
28 Una kakotele muna kena, mbasi umvovese vo: “Kiambote kiaku, ongeye nkwa dienga, o Yave una yaku.”
29 Kansi, otokanene kikilu mu kuma kia mvovo miandi, ovavidi o zaya e nsasa nkayisa yayi.
30 O mbasi umvovese vo: “Kumoni wonga ko, e Maria, kadi Nzambi usongel’e dienga.
31 Tala! yimita oyimita, mwan’a yakala owuta, okumvana e nkumbu a Yesu.
32 Nene kekala, mwan’a Mpungu keyikilwa, o Yave wa Nzambi okumvan’e kunda kia Davidi wa se diandi,
33 okala se Ntinu muna nzo a Yakobo yakwele mvu, e Kintinu kiandi ke kisuka ko.”
34 Kansi, Maria ovovese mbasi vo: “Aweyi divangamena ediadi, wau vo kizeye yakala ko?”
35 O mbasi umvutwidi vo: “O mwand’avelela ukwiza omo ngeye, o nkum’a Mpungu ukuyitalela. Dianu vo, ndiona owutwa oyikilwa vo wavelela, Mwan’a Nzambi.
36 Elisabete wa yitu kiaku, oyu wayikilwa vo sita, oyandi mpe lukau lwa mwan’a yakala kabakidi muna kinunu kiandi, eyayi i ngonde andi ya sambanu;
37 kadi kuna kwa Nzambi ke vena diambu ko dilenda funga.”
38 Maria ovutwidi vo: “Tala, omono i ntaudi a Yave! Yambula diambu diaku diavangama omu mono.” O mbasi okatukìdi vana kena.
39 E lumbu yayina, o Maria otelamene, wele-wele kuna zunga kia miongo, kuna mbanza mosi ya Yuda,
40 okotele muna nzo a Zakariya, okayisi Elisabete.
41 Elisabete vava kawidi e nkayiswa kakayisu kwa Maria, o mwana onikukini muna vumu kiandi, Elisabete ozele yo mwand’avelela,
42 ovovele muna nding’angolo, oku vo: “Osambwilu vana vena akento awonsono, isambwilu mpe e mbongo a vumu kiaku!
43 Akweyi dintukìdi e lau diadi, vo ngudi a Mfumu ame wizidi oku ngina?
44 Kadi e zú dia nding’aku vava dizidi omu matu mame, o mwana omu vumu kiame onikukini kuna kiese.
45 Kiese kwa ndiona okwikidi wo, e kuma kadi mambu mana kavoveswa kwa Yave lungana melungana.”
46 Maria ovovele vo: “O moyo ame* utundidikidi Yave,
47 o ntim’ame uyangalele muna Nzambi wa Mvuluzi ame
48 kadi watadidi lusakalalu lwa ntaudi andi a nkento. Tuk’omu wau, mbandu zawonso zikungikila vo nkwa nsambu,
49 kadi o Nengolo oma kampangidi manene, e nkumbu andi yavauka,
50 kadi muna mbandu ye mbandu, osonganga e nkenda zandi kw’awana bekumvuminanga.
51 Ovangidi owu wankuma muna koko kwandi; omwanganese akwa lulendo muna makani ma ntima miau.
52 Okunkwidi ayadi muna kunda yau, otundidikidi ana basakalele;
53 ozadisi akwa nzala ye lekwa yambote, e mvuama osindikidi zo moko-moko.
54 Osadisi Isaele wa ntaudi andi muna kunsungamesa e nkenda zandi,
55 una kavovesa mase meto, kuna kwa Abarayama ye mbongo andi, yakwele mvu.”
56 Maria tezo kia ngonde tatu kakala yandi, i bosi kavutuka kuna nzo andi.
57 E ntangw’a Elisabete ya wuta ifwene, owutidi mwan’a yakala.
58 Esi belo kiandi ye yitu yandi bawidi vo Yave owokese nkenda zandi kwa yandi, bankembese.
59 E lumbu kina kia nana bezidi zenga* o mwana, nkumbu a Zakariya wa se diandi bazola kumvana.
60 Kansi, o ngudi andi ovutwidi vo: “Ve! Yoane keyikilwa.”
61 Bamvovese vo: “Omu yitu yaku ke mosi ko una ye nkumbu yayi.”
62 Bayuvuidi se diandi muna sinsu, kana aweyi kazolele vo kayikilwa.
63 Olombele babu kia sonekena, osonekene vo: “Yoane i nkumbu andi.” Basivikidi yau awonso.
64 Vana vau o nu’andi ubatwinu, o lubini lwandi mpe luzezele, oyantikidi vova, okembele Nzambi.
65 Awonso bakedi kuna belo kiau babakamene kwa wonga, muna londe lwawonso lwa Yuda mambu mama mawonso bamokenenge.
66 Awonso bawa mo, basidi mo muna ntima miau, bavovele vo: “Aweyi kikala kimwana-mwana kiaki?” Kadi o koko kwa Yave kukedi yandi.
67 I bosi, Zakariya wa se diandi ozele yo mwand’avelela, osakwidi, oku vo:
68 “Yambula kakembelwa o Yave wa Nzambi a Isaele, e kuma kadi ovutwidi sungididi kiandi kwa nkangu andi, kabakûla.
69 Utuvaikisidi mpak’a luvuluzu* muna nzo a Davidi wa ntaudi andi.
70 Kadi i diau kavova muna nua mia ngunza zandi zavelela tuka kuna nz’ankulu.
71 Wavova vo okutuvuluza kuna kw’atantu eto, ye muna moko m’awonso batumengene;
72 katusonga e nkenda mun’owu wa nsilu kasia kwa mase meto, yo sungamena e kangu diandi diavauka,
73 i ndofi kadila se dieto Abarayama.
74 Vava kekutuvuluza muna moko m’atantu eto, okutuyambula twansadila kondwa wonga,
75 kuna kwikizi ye unsongi e lumbu yeto yawonso.
76 Kansi, ongeye kimwana-mwana mpe, ngunz’a Mpungu oyikilwa, kadi okwend’aviti kuna luse lwa Yave, wakubika nzila zandi,
77 wazayisa o luvuluzu kwa nkangu andi muna luloloko lwa masumu mau,
78 mu kuma kia walakazi wa Nzambi eto. Muna walakazi wau tumona ntemo utuka kuna zulu ukezima nze nkielo a kuma,
79 watemesa ntemo kw’awana bafongele vana tombe ye kîni kia lufwa, kimana twasingik’o malu meto muna nzil’a luvuvamu.”
80 E kimwana-mwana kikudidi, kikumamene muna mwanda,* okedinge muna makanga, yavana kialuaka e lumbu kayisonga kuna kwa Isaele.
Mvovo vana yand'a lukaya
^ Tala Nsas’a Mvovo.
^ Yovo “salu kiandi muna wete dia nkangu.”
^ Yovo “Kiwuntu kiame kiawonso.” Tala Nsas’a Mvovo.
^ Yovo “yotesa.”
^ Yovo “mvuluzi a nkuma.” Tala Nsas’a Mvovo, “Mpaka.”
^ I sia vo, ngindu ye kiwuntu.
