Luka 10:1-42
10 I bosi, o Mfumu osolele 70 lw’akaka, ubatumini nwole-nwole benda viti muna mavata mawonso ye muna fulu yawonso ina kekwenda.
2 Ubavovese vo: “E mbongo yayingi muna kutika, kansi e nsadi mike. I dianu vo, nudodokela Mfumu a mpatu katuma asadi muna mpatu andi.
3 Nwenda! Tala, inutumini nze wan’a mameme vana vena mevua.
4 Ke nunati nkutu a nzimbu ko yovo kifunda, ngatu nsampatu, ke nukayisi muntu ko* muna nzila.
5 Konso nzo ina nukota, nuteka vova vo: ‘Yambul’o luvuvamu lwakala omu nzo yayi.’
6 Avo nkwa luvuvamu wina mo, o luvuvamu lueno lusàla yandi. Kansi avo ke wau ko, vutuka lukunuvutukila.
7 Dianu vo, lunangina muna nzo yayina, nudia yo nua ina bekunuvana, kadi o nsadi ofwene mfutu andi. Ke nusobi nzo yankaka ko.
8 “Konso vata mpe nukota avo banutambwidi, nudia ina bekunuvana,
9 nuwuka e mbevo zina mo, nubavovesa vo: ‘E Kintinu kia Nzambi kinufinamene.’
10 Kansi, konso vata nukota, avo ke banutambwidi ko, nwenda muna nzila zampwena, nuvova vo:
11 ‘Tunukubulwidi e mbundukutu a vata dieno, ina ilamini muna tambi yeto. Kansi nuzaya wo vo, e Kintinu kia Nzambi kifinamene.’
12 Inuvovese vo, e lumbu kiakina, vata diadi divewa e tumbu kisundidi kia esi Sodomo.
13 “Tâtu kwa ngeye Korazi! Tâtu kwa ngeye Betesaida! kadi mavangu mankuma mavangamene muna yeno, kala vo mavangamena muna Turo ye Sidone, nga kolo baviluk’o ntima, bavuata ngoto yo vuanda vana ntoto ampolo.
14 Dianu vo, muna lufundisu, nuvewa e tumbu kisundidi kia esi Turo ye Sidone.
15 Ongeye Kafanau, nga otundidikwa kuna zulu e? Muna Ziami* osinga kulumunwa!
16 “Konso ona okunuwa, mono mpe kewa. Konso ona okunubembola, mono mpe kabembwele. Konso ona okumbembola, ndiona wantuma mpe kabembwele.”
17 I bosi, yau 70 bavutukidi ye kiese, bavovele vo: “E Mfumu, e nkuya mpe mitusakalele muna nkumbu aku.”
18 Ubavovese vo: “Mbwene Satana osangumukini nga nsemo kuna zulu.
19 Inuvene wisa kia diatakesa nioka ye nkutu, ye ngolo zawonso muna sunda e mbeni, ke vena má ko kikunuvang’e mbi.
20 Kansi, ke numoni kiese ko wau vo e mianda minusakalele, kansi numon’e kiese wau vo e nkumbu zeno zisonamene kuna zulu.”
21 Muna ntangwa yayina, oyangalèle kikilu muna mwand’avelela, ovovele vo: “Ikembelele va meso ma ndonga, e Tata, Mfumu a zulu ye nza, kadi watoma sweka mambu mama kwa akwa ngangu ye alungaladi yo sengomona mo kwa yingiana-ngiana. Elo, kadi i wau wayangalela o vanga e Tata.
22 Se diame umpene lekwa yawonso, ke vena muntu ko ozeye una kena o Mwana, Se kaka, ke vena mpe muntu ko ozeye una kena o Se, Mwana kaka, ye konso ona o Mwana kazolele sengomwena Se.”
23 Ovovese alongoki andi vana va yau kaka, oku vo: “Mansambu o meso mana mamwene oma numonanga.
24 Kadi inuvovese wo vo, ngunza zayingi ye atinu bazola mona oma numwene, kansi ke bamona mo ko, bazola wá oma nuwidi, kansi ke bawá mo ko.”
25 Muntu mosi otomene zaya e Nsiku otelamene kimana kantonta, ovovele vo: “E Nlongi, adieyi mfwete vanga muna vua moyo a mvu ya mvu?”
26 Umvovese vo: “Adieyi diasonama muna Nsiku? Aweyi otanganga?”
27 Ovutwidi vo: “‘Zola Yave wa Nzambi aku muna nsi a ntim’aku yawonso, muna kiwuntu kiaku kiawonso, muna ngolo zaku zawonso, muna nyindu aku wawonso, zola mpe nkw’aku wauna okuyizolelanga.’”
28 Umvovese vo: “Otomene vutula; kwamanana wo vanga, ovua o moyo.”
29 Kansi, wau kazolele kuyilungisa, ovovele kwa Yesu vo: “Nani kieleka i nkw’ame?”
30 Yesu ovutwidi vo: “Vakedi muntu okulumukini tuka kuna Yerusaleme yakuna Yeriko, wele kuyisuka vana vena mivi, bakutumwini lekwa yandi, banwende, bele kwau, bansisidi wafw’e kiambu.
31 I bosi, nganga mosi okulumukini muna nzila yayina, umwene, kansi ovengomokene kuna sambu diankaka.
32 Diau adimosi mpe, Nlevi olueke vana fulu kiakina, umwene, ovengokele kuna sambu diankaka.
33 Kansi Nsamaria mosi, wau kekangalanga, olueke vana kena, umwene, umfwididi e nkenda.
34 Wele vana kena, okangidi mputa zandi, oyitidi zo mazi ye vinyu. Umfongese vana bulu kiandi, untwese muna nzo a tambulwila nzenza, otomene kunlunga-lunga.
35 Muna lumbu kialanda, ovaikisi denali zole, ovene zo kwa ntambudi a nzenza, ovovele vo: ‘Toma kunlunga-lunga, konso kina okumfutila diaka, vava nkwiza vutuki ikuvutulwila kio.’
36 Muna wantu awaya yau atatu, nani wakala nkw’andi a ndiona wayisuka vana vena mivi?”
37 Ovutwidi vo: “Ndiona wansong’e nkenda.” O Yesu umvovese vo: “Wenda, vanga diau adimosi.”
38 Wau bayendanga, olueke muna vata dimosi. Mukedi nkento nkumbu andi Mareta, untambwidi muna nzo andi.
39 Wakala mpe yo nleke, nkumbu andi Maria, ofongele vana malu ma Mfumu yo winikina mana kavovelenge.*
40 Kansi, o Mareta kasianga sungididi ko mu kuma kia ulolo wa salu. Wizidi kwa Yesu, ovovele vo: “E Mfumu, nga kumwene ko vo nleke ame unsisidi mono mosi kaka ye salu e? Umvovesa keza kunsadisa.”
41 O Mfumu umvutwidi vo: “E Mareta, e Mareta, mambu mayingi otelekele o moyo yo tokanena.
42 Kansi, makete kaka yovo dimosi kaka dina o mfunu. O Maria osolele ndambu ambote,* ina ke ikunkatulwa ko.”
Mvovo vana yand'a lukaya
^ Yovo “ke nubimbana yo muntu ko.”
^ Muna Kingerekia, “Hades.” Tala Nsas’a Mvovo.
^ Sina, “mambu mandi.”
^ Yovo “ndambu isundidi o wete.”
