Luka 11:1-54
11 Lumbu kimosi una kasambanga, vava kamana, mosi muna alongoki andi umvovese vo: “E Mfumu, utulong’o samba, nze una Yoane kalongela alongoki andi.”
2 Ubavovese vo: “Avo se nusamba, nuvova vo: ‘E Tata, yambula nkumbu aku yazitiswa.* E Kintinu kiaku kiza.
3 Utuvana o dia* kweto kwa lumbu ke lumbu mun’owu wa nsatu za konso lumbu.
4 Utuyambulwila masumu meto, kadi oyeto mpe tuyambulwilanga awonso ana batudia mfuka; kutuyambula ko muna lutonto.’”
5 I bosi, ubavovese vo: “Avo mosi muna yeno una yo nkundi, wele kwa yandi kuna dingidingi, umvovese vo, ‘E nkundi, unsompeka mbolo tatu,
6 kadi o nkundi ame una mu nkangalu unduakidi, kina ye má ikumvana ko.’
7 Kansi, ndiona una muna nzo kavutula vo: ‘Yambula kuntokanesa. E kielo kizikamene kala, ku mfulu ngina yo wan’ame; kilendi telama ko ngiza kuvana má.’
8 Inuvovese vo, avo muna kuma kia kikundi kiandi ke telama ko kamvana má, muna siandama kwandi i ketelamena kamvana konso ina kavuidi o mfunu.
9 Inuvovese vo, nukwamanana lomba, ozevo nuvewa; nukwamanana vava, ozevo nusolola; nukwamanana dodela, ozevo nuziulwilwa.
10 Kadi konso ona okwamanana lomba, ovewa, konso ona okwamanana vava, osolola; konso ona okwamanana dodela, oziulwilwa.
11 Nkia se vovo nwina, avo mwan’andi unlombele mbizi a maza, oyandi kayambula mbizi a maza, kamvan’e nioka?
12 Yovo unlombele diaki, kamvana nkutu?
13 Dianu vo, oyeno nuna yo bi, avo nuzeye vana tukau twambote kwa wan’eno, o Tata kuna zulu, nkia nduta keluta vana mwand’avelela kwa awana bekunlombanga!”
14 I bosi, ovaikisi nkuya kwa baba, o nkuya vava wavaika, e baba divovele. E ndonga isivikidi.
15 Kansi, akaka vana bena bavovele vo: “Muna Belezebube* wa mfumu a nkuya, i kevaikisilang’e nkuya.”
16 Akaka muna kuntonta, banlombele kabasong’e sinsu kituka kuna zulu.
17 Wau kazeye ngindu zau, ubavovese vo: “Konso kintinu kiavambana, bwa kibwa, e nzo yavambana bwa ibwa.
18 Diau adimosi, avo Satana wiyivambwidi, e kintinu kiandi aweyi kisikidila? Kadi oyeno nuvovele vo muna Belezebube ivaikisilanga nkuya.
19 Avo omono muna Belezebube ivaikisilanga nkuya, ozevo wan’eno muna nani bevaikisilanga mio? Kiaki i kuma bekadila se afundisi eno.
20 Kansi, avo muna nlembo a Nzambi ivaikisilang’e nkuya, ozevo e Kintinu kia Nzambi kinuluakidi kikilu.
21 O nkwa ngolo una ye nwaninwa, avo olangididi o lumbu luandi, e salanganu yandi yawonso itaninwa.
22 Kansi ndiona unsundidi e ngolo, avo wizidi kunwanisa yo kunsunda, kankatula nwaninwa yawonso ina kesiang’e vuvu, ozevo okayanisa lekwa ina kansanzidi.
23 Konso ona olembi kala ku sambu diame, i ntantu ame, konso ona olembi kutika yame, mwanganisa kemwanganisanga.
24 “O mwand’a usafu avo uvaikidi muna muntu, wele vumvula muna makanga mu vava fulu kia vundila, wau ulembele kio mona, uvovele vo, ‘Ivutuka muna nzo ame yatuka.’
25 Vava uluaka, uwene nzo yatoma kombwa yo kubikwa.
26 I bosi wele, ubakidi mianda nsambwadi miankaka, emi misundidi o bi ke mu yandi kibeni ko, mikotele yo vuanda mo. E kadilu kiansukinina kia muntu ndioyo kivioka kina kiantete o bi.”
27 Una kavovelenge mambu mama, o nkento mosi vana vena ndonga otumbwidi e ndinga, umvovese vo: “Kiansambu e vumu kina kiànata ye ntulu zina wayema!”
28 Kansi, ovovele vo: “Ke wau ko, akwa nsambu ana bewanga e diambu dia Nzambi yo lunda dio!”
29 E ndonga vava ikutakene, oyantikidi vova vo: “E mbandu yayi mbandu ambi; sinsu ivavanga, kansi kana sinsu kimosi ke nusongwa kio ko, nanga sinsu kia Yona kaka.
30 Kadi wauna Yona kakadila se sinsu kwa esi Ninive, i una mpe o Mwan’a muntu kekadila kwa mbandu yayi.
31 Muna lufundisu o ntinu ankento a sude ofuluka kumosi ye mbandu yayi yo yelesa yo, kadi kuna nsuk’a nza katuka mu kwiza wá ngangu za Solomo. Kansi tala, oyu osundidi Solomo una vava.
32 Muna lufundisu Esi Ninive befuluka kumosi ye mbandu yayi yo yelesa yo, kadi baviluk’o ntima muna nsangu za Yona. Kansi tala, oyu osundidi Yona una vava.
33 Ke vena muntu ko okwika mini, kasia kio vana fulu kiaswekama, ngatu kuna nsi a mbangu,* kansi vana fulu kiazanguka kaka, kimana ana bekota mo bamona o ntemo.
34 E mini kia nitu i disu diaku. Avo disu diaku dialungalala,* e nitu aku yawonso mpe itemokene; kansi, avo dia kimpala,* e nitu aku mpe ibukamene tombe.
35 Dianu vo, lungalala kimana o ntemo wina omo ngeye walembi kala se tombe.
36 E nitu aku yawonso avo itemokene, kondwa ndambu a tombe, yawonso itemoka nze una mini kikuvaninanga o ntemo.”
37 Una kavovelenge, Mfarisi mosi umbokele kenda dia yandi. Wele kota muna nzo andi, ovuende kuna meza.
38 O Mfarisi osivikidi vava kamwene vo katekele sukula moko* ko vitila kadia.
39 O Mfumu umvovese vo: “Yeno Afarisi nuvelelesanga kuna mbazi a kopo ye longa, kansi omo kati nwazala ye loko yo bi.
40 Nu mazowa! Ndiona wavang’oku mbazi, nga ke yandi ko wavang’omu kati e?
41 Kansi, nuvana yina yakati se tukau twa nkenda,* ozevo lekwa yeno yawonso iveleleswa.
42 “Tâtu kwa yeno Afarisi, kadi nuvananga tini kiakumi kia mana-nsusu, penganone* ye mvûdi yawonso, kansi nubembolanga unsongi yo zola kwa Nzambi! I mambu mama nufwete vanga, lembi bembola mambu mankaka.
43 Tâtu kwa yeno Afarisi! e kuma kadi, nuzolanga kunda yantete* muna masambilu, yo kayiswa muna mazandu!
44 Tâtu kwa yeno! e kuma kadi, nuna nze ziami ilembi moneka,* o wantu beviokela vo, ke bazeye wo ko!”
45 Mosi mun’awana batomene zaya e Nsiku umvutwidi vo: “E Nlongi, e mpova yoyo ovovele, i yeto mpe otiangwini.”
46 Ovovele vo: “Tâtu kwa yeno mpe nutomene zaya e Nsiku! Kadi yeno nukomekenanga wantu mazitu mampasi muna nata, kansi yeno kibeni, kana nkutu i nlembo eno mosi, ke nuviakanesa wo muna mazitu ko.
47 “Tâtu kwa yeno! kadi nutunganga e ziami ya ngunza zavondwa kwa mase meno.
48 Kieleka, oyeno kana una vo nu mbangi za mavangu ma mase meno, kansi nukubatondanga, kadi oyau bavonda angunza, oyeno nutunganga e ziami yau.
49 Kiaki i kuma e ngangu za Nzambi zavovela vo: ‘Ikubatumina angunza ye antumwa; bevonda yo bangika akaka muna yau,
50 kimana o menga ma ngunza zawonso, mana mabunguka tuka kuna semo dia nza, muna mbandu yayi mekala,*
51 tuka muna menga ma Abele yamuna menga ma Zakariya, ona wavondelwa vana vena e ziku ye nzo.’* Kieleka, inusamunwini wo vo, menga mau omu mbandu yayi mekala.*
52 “Tâtu kwa yeno nutomene zaya e Nsiku! e kuma kadi, nukatwidi nsabi a zayi. Yeno kibeni ke nukotele mo ko, nukakididi ana bakotelenge mo!”
53 Vava kavaikidi mo, asoneki ye Afarisi bayantikidi kumbangika, yo kunyuvula yuvu yayingi,
54 bankondelele, kimana bambakila muna mvovo miandi.
Mvovo vana yand'a lukaya
^ Yovo “yavaulwa; yaveleleswa.”
^ Sina, “mbolo.”
^ Nkumbu yankaka ya Satana.
^ Yovo “kitunga.”
^ Yovo “diakiá.” Sina, “dia kumosi.”
^ Sina, “diambi; dia umpumbulu.”
^ I sia vo, nsukul’a moko yasikidiswa muna kinkulu kia Ayuda.
^ Yovo “tukau twa asukami.” Tala Nsas’a Mvovo.
^ Penganone i ma kiansunga kisiwanga muna madia.
^ Yovo “yambote.”
^ Yovo “ziami yakondwa sinsu.”
^ Yovo “mevavilwa.”
^ Yovo “tempelo.”
^ Yovo “mevavilwa.”
