Luka 12:1-59
-
Mfuna ya Afarasi (1-3)
-
Numwena Nzambi wonga, ke wantu ko (4-7)
-
Tambulwila kala ntwadi ye Kristu (8-12)
-
Kingana kia zowa dia mvuama (13-21)
-
Nuyambula tokana (22-34)
-
Fikambi-kambi (32)
-
-
Yingila (35-40)
-
Selo kia kwikizi ye selo kiakondwa kwikizi (41-48)
-
Ke luvuvamu ko, kansi mpambani (49-53)
-
Mfunu wa bakula e kolo (54-56)
-
Singika ntantani (57-59)
12 Muna ntangwa yayina, mafunda ye mafunda ma wantu bezidi lungalakana yo diataziana, oyantikidi vovesa ntete alongoki andi vo: “Se nulukila mfuna wa Afarisi, i sia vo, umpuki.
2 Kansi ke vena diambu ko diatoma swekama dilembi sengomonwa, ke vena mbumba ko ilembi zayakana.
3 Konso dina nuvovele oku tombe, diwakana kuna ntemo, konso dina nulongesele muna masuku, disamunwa vana nludi mia nzo.
4 Akundi ame, inuvovese vo, ke nubamoni wonga ko, awana bevonda e nitu, yau ke bavangi diaka diambu diankaka.
5 Ikunusonga ona numwena wonga: Nùmona wonga, Ndiona wina vo, vava kemana vonda, ovuidi wisa kia tuba kuna Ngeena.* Elo, inusamunwini vo, Yandi nùmwena o wonga.
6 Nga ke ntietie tanu ko zitekwanga muna mpata miole*? Kansi vana zina, ke vena imosi nkutu ko ivilakanwa* kwa Nzambi.
7 Kana nkutu e nsuki zawonso za ntu mieno zavua tangwa. Ke numoni wonga ko; oyeno ntietie zayingi nusundidi.
8 “Inusamunwini vo, konso ona okuntambulwila vana vena wantu, o Mwan’a muntu mpe okuntambulwila vana vena mbasi za Nzambi.
9 Kansi, konso ona okumpanina nkalu vana vena wantu, oyandi mpe ovaninwa nkalu vana vena mbasi za Nzambi.
10 Konso ona ovovela Mwan’a muntu diambu diambi, dilolokwa kwa yandi, kansi, konso ona otianguna mwand’avelela, ke lolokwa ko.
11 Vava bekunuyekola muna masambilu ye kwa mfumu za luyalu ye akwa wisa, ke nutelama mioyo ko mu kuma kia una nuvutula, yovo dina nuvova muna kuyitanina,
12 kadi muna kolo kiakina, o mwand’avelela ukunulonga mana nufwete vova.”
13 I bosi, mosi vana vena ndonga umvovese vo: “E Nlongi, vovesa mpangi ame twakayana e vua.”
14 Umvovese vo: “Nani untumbikidi kimfundisi yovo kimvambudi kia yeno wole?”
15 Ubavovese vo: “Nutoma tala, nuyikenga ye loko diawonso, e kuma kadi, o muntu kana nkutu ulolo wa mavua kena mau, o moyo andi ke una muna mavua mandi ko.”
16 Dianu vo, ubatelele kingana, oku vo: “E yana ya mvuama mosi itomene yima mbongo.
17 Oyantikidi yindula muna ntim’andi vo, ‘Aweyi mfwete vanga wau vo kina ye fulu kia lundila mbongo ame ko?’
18 I bosi, ovovele vo, ‘Edi ivanga: Ibangula malundilu mame, yatunga oma masundidi o nene, i muna nkutikila mbongo ame yawonso, ye lekwa yame yawonso yambote,
19 i bosi, ivovesa moyo ame vo: “E moyo, lekwa yayingi yambote una yau ikubamene mu mvu miayingi; vunda kwaku, wadia, wanua, wamona kiese.”’
20 Kansi o Nzambi umvovese vo, ‘U zowa kwaku, o fuku wau o moyo aku katulwa ukukatulwa. Ozevo, e lekwa yoyo okubikidi, ya nani e?’
21 Diau adimosi yo muntu okuyilundilanga mavua, kansi ke mvuama ko kuna kwa Nzambi.”
22 I bosi, ovovese alongoki andi vo: “Kiaki i kuma inusamunwini vo, nuyambula tokana mu kuma kia mioyo mieno, kana nki nudia, ngatu muna diambu dia nitu zeno, kana nki nuvuata.
23 Kadi o moyo usundidi madia, e nitu mpe isundidi mvuatu.
24 Nubadika e ngono-ngono: Ke zikunanga ko, ngatu kutika; ke zina ye malundilu ko, kansi Nzambi odikilanga zo. Nga yeno ke nusundidi e nuni mfunu ko e?
25 Nani vovo nwina muna tokana kwayingi olenda kudikila kana nkutu miniti mosi muna zingu kiandi?
26 Edi diandwelo, avo ke nulenda dio vanga ko, ekuma nutokanena e mambu mankaka?
27 Nubadika e mbena imenanga mvuma: Ke zifuntukanga ko, ngatu tunga nlele; kansi inuvovese wo vo, kana nkutu Solomo muna nkembo andi wawonso, kasidi vuatila nze imosi muna mvuma zazi ko.
28 Avo Nzambi ovuikanga titi ya mfuta, eyi imenene o unu, o mbazi iyokelo vana tiya, nga keluta kunuvuika ko, oyeno akwa filukwikilu e?
29 Dianu vo, nuyambula tokana kana nki nudia, kana nki nunua, ngatu yangama ntima;
30 kadi yawonso yayi i yau befuntukinanga wantu a nza, kansi o Se dieno ozeye wo vo lekwa yayi nuvuidi o mfunu.
31 Kansi, nukwamanana vava Kintinu kiandi, ozevo e lekwa yayi ikunukudikilwa.
32 “Ke numoni wonga ko, yeno fikambi-kambi, kadi i luzolo lwa Se dieno kanuvan’e Kintinu.
33 Nuteka ina nuvuidi, nuvana tukau twa nkenda.* Nuyivangila nkutu za nzimbu ke zilendi fwa ko, o lusalu luna ke lusuka ko kuna zulu, kuna ke kufinama mwivi ko, ngatu fwasila nselele.
34 Kadi kuna kwina lusalu lweno, i kuna mpe kukala ntima mieno.
35 “Nuvuata yo kubama,* nukwika e mini yeno,
36 nukala nze wantu bevingilanga mfumu au otuka kuna nkinzi a longo, vava keluaka, kadodela, vana vau banziulwila.
37 Akwa nsambu e ntaudi zina vo vava mfumu au kekwiza, ziwanwa vo mu yingila zina! Kieleka inusamunwini vo, vuata* kevuata nlele a salu, okubavuandisa kuna meza yo kubasadila.
38 Avo wizidi mu ngingila ina yezole,* kana nkutu ina yetatu,* ubawene bakubama, ozevo akwa nsambu!
39 Nuzaya edi, kele vo mfumu a nzo kayizayila e ntangwa ikwiza o mwivi, kadi yambula ko vo nzo andi yabangulwa.
40 Oyeno mpe se nukubama kweno, e kuma kadi, muna ntangwa nulembi yindula i kekwiz’o Mwan’a muntu.”
41 Petelo ovovele vo: “E Mfumu, nga yeto kaka otelele kingana kiaki, yovo kw’awonso?”
42 O Mfumu ovovele vo: “Nani kieleka i selo* kiakwikizi yo lulungalalu,* kina kisiwa kiyekwa kia ntaudi* za nzo kwa mfumu andi, kabavananga madia muna ntangwa ifwene?
43 Nkwa nsambu e ntaudi ina iwanuka kwa mfumu andi vo iwau ivanganga!
44 Kieleka inuvovese wo vo, okumvana kiyekwa kia lunga-lunga salanganu yandi yawonso.
45 Kansi avo e ntaudi yayina ovovele muna ntim’andi vo, ‘O mfumu ame zingila kezingila,’ kayantika wanda selo yamakala ye yamakento, yo dia, yo nua, yo kolwa,
46 o mfumu a ntaudi yayina okwiza muna lumbu kalembi kumvingila, ye muna ola kalembi zaya, okuntumba tumbu kiangolo,* yo kumvana e kunku kiandi vana vena minkondwa kwikizi.
47 E ntaudi ina izeye luzolo lwa mfumu andi, kansi kakubamene ko yovo vanga dina kalombelo,* bundwa ketoma bundwa.
48 Kansi ona olembi bakula yo vanga mana kafwete bundilwa, mu tezo kebundilwa. Konso ona wavewa yayingi, mayingi kelombwa, ona mpe wasiwa kiyekwa kiayingi, mana bekunlomba masundidi.
49 “Tiya ngizidi kwika ova nza, wau vo tulemene kala, adieyi ndenda vanga diaka?
50 Ngina ye luvubu luna mfwete vubwa, ekwe ntantu ngina zau yavana lulungana!
51 Nga nubenze vo luvuvamu ngizidi sia ova nza e? Inusamunwini vo, ke wau ko, mpambani kaka.
52 Kadi tuka owau, wantu tanu bekala muna nzo mosi bevambana, ntatu uvambuka nwole, nwole uvambuka ntatu.
53 Bevambana kwau, o se yo mwan’andi ayakala, o mwan’ayakala yo se diandi, o ngudi yo mwan’andi ankento, o mwan’ankento yo ngudi andi, o ngudi a longo yo mwan’andi a longo, o mwan’a longo yo ngudi andi a longo.”
54 I bosi ovovese mpe ndonga vo: “Avo numwene e tuti dikwizanga kuna weste, vana vau nuvovanga vo, ‘Mvula ikwizanga,’ i diau mpe divangamanga.
55 Avo numwene tembwa kia sude kivekomokanga, nuvovanga vo, ‘Mbangazi ikwizanga,’ i diau mpe divangamanga.
56 Akwa kivunina, oyeno nuzeye bakula e mpw’a nza ye zulu, kansi aweyi nulembele bakulwila kolo kiaki?
57 Ekuma nulembele kuyizayila dina diansongi?
58 Muna bong’e nona, avo se kwenda ku mbazi a nkanu yo ntantu aku, muna nzila vanga wawonso mu wizana yandi kimana kalembi kuyekola kwa mfundisi, o mfundisi kayekola kwa kesa, e kesa diasia muna pelezo.
59 Isamunwini vo, kuvaika mo nkutu ko, yavana ofuta e mpata wansuka.”*
Mvovo vana yand'a lukaya
^ Tala Nsas’a Mvovo.
^ Sina, “assarion mosi.”
^ Yovo “yakondwa mfunu.”
^ Yovo “tukau twa asukami.” Tala Nsas’a Mvovo.
^ Sina, “nukamina nlele mieno muna tuketo.”
^ Yovo “kanga nlele.”
^ Nanga tuka muna ola ya 21 yamuna dingidingi.
^ Tuka muna dingidingi yamuna ola ya 3 ya nkielo a kuma.
^ Yovo “ntaudi a nzo.”
^ Yovo “nkwa ngangu.”
^ Yovo “asadi muna nzo.”
^ Sina, “okumvinguna vana kati.”
^ Yovo “vanga luzolo lwa mfumu andi.”
^ Sina, “yavana ofuta lepton yansuka.”
