Luka 13:1-35
-
Luviluku lwa ntima yovo lufwasu (1-5)
-
Kingana kia nsanda ulembi yimanga bundu (6-9)
-
Nkento wa mvanguki owukilu mu lumbu kia Vundu (10-17)
-
Kingana kia disu dia mutade ye mfuna (18-21)
-
Ngolo divavanga muna kotela mu mwelo ambatakani (22-30)
-
Erodi, “mfwenge yayina” (31-33)
-
Yesu otatidi mu kuma kia Yerusaleme (34, 35)
13 Muna ntangwa yayina, vakedi akaka ana bansamunwini vo Pilato wavonda Mingalili ana bakelanga yimenga.
2 Ubavutwidi vo: “Nga nubenze vo Mingalili awana basundidi Mingalili miawonso o sumuka wau bamona e mpasi zazi e?
3 Inusamunwini vo, ke wau ko, kansi tu, avo nulembi vilukw’e ntima, yeno awonso i wau mpe nufwasilwa.
4 Yovo, e 18 dia wantu babwilwa nzo e zulu muna Siloa yo fwa—nga nubenze vo basundidi awonso ana bezingilanga muna Yerusaleme o sumuka?
5 Inusamunwini vo, ke wau ko; kansi avo nulembi vilukw’e ntima, oyeno awonso i una mpe nufwasilwa.”
6 I bosi, otele kingana eki: “O muntu wakala yo nti a nsanda muna mpatu andi a vinyu, wizidi mo vavi bundu, kansi yau kamoni.
7 Ovovele kwa mvati a vinyu vo, ‘Se mvu ntatu ikwiz’avavinge bundu mu nsanda wau, kansi mwau kimoni má. Kesa wo! Ekuma ufwete yambulwilwa mu ntoto wau vo ke uyimanga bundu ko?’
8 Kansi oyandi umvutwidi vo, ‘E Mfumu, yambula wo diaka mu mvu mosi, yatimina wo omu ndambu yo sia wo e mbole.
9 Avo uyima e mbongo, dia matondo; avo ke wau ko, ozevo kesa wo kwaku.’”
10 Una kalongelenge muna sambilu muna lumbu kia Vundu,
11 vakedi nkento mosi wayeleswa kwa nkuya mu mvu 18; wakovama beni, kelendanga nkutu vumbuka ko.
12 O Yesu vava kàmwene, umbokele, umvovese vo: “E nkento, osasukidi kwaku muna mayela maku.”
13 Untensekele o moko, vana vau osingamene, oyantikidi kembela Nzambi.
14 O mbuta sambilu ofungidi makasi wau vo Yesu owukidi muna lumbu kia Vundu, ovovese ndonga vo: “Vena ye lumbu sambanu ifwete salwanga; muna lumbu yayi nwiza wukwa, kansi ke mu lumbu kia Vundu ko.”
15 O Mfumu umvutwidi vo: “Akwa kivunina, muna lumbu kia Vundu, konso muntu vovo nwina, nga ke kutululanga ngombe andi ko, ovo e buluku vana dilu, kenda dio nuik’e?
16 Nga ke diambote ko kwa nkento ndioyo wa mwan’a Abarayama, ona wakangwa kwa Satana mvu 18, kakutululwa muna kangwa kiaki mu lumbu kia Vundu e?”
17 Una kavovele mambu mama, atantu andi awonso bafusukidi e nsoni, kansi e ndonga yawonso imwene kiese muna mambu mawonso mambote kavangidi.
18 I bosi ovovele vo: “Nki kifwananene ye Kintinu kia Nzambi? Nki ndenda kio tezanisa?
19 Kina nze disu dia mutade,* dina muntu kabongele yo kuna dio muna mpatu andi, dimenene, dikitukidi se nti, e nuni za zulu zizidi tunga nzialwa muna tayi yandi.”
20 Ovovele diaka vo: “Nki ndenda tezanisa ye Kintinu kia Nzambi?
21 Kina nze mfuna, ina yabongwa kwa nkento, yo sanga yo nzongo ntatu mianene* mia mfumfu, yavana yafunisa mbumba wawonso.”
22 Wau kekwendanga kuna Yerusaleme, oviokèle muna mbanza ye muna mavata, wele alonginge.
23 Muntu mosi umvovese vo: “E Mfumu, nga akete kaka bevuluzw’e?” Ubavovese vo:
24 “Nusiamanana kotela muna mwelo ambatakani, kadi inusamunwini vo, ayingi bevava mo kotela, kansi ke belenda ko.
25 O mfumu a nzo avo otelamene yo zika e kielo, oyeno nwatelama vana mbazi yo dodela kielo, yo vova vo, ‘E Mfumu, utuziulwila.’ Kansi okunuvutula vo: ‘Kizeye kwame ko kuna nutukidi.’
26 I bosi nuyantik’o vova vo, ‘Twadila yo nuina vana wakala, wakwenda longelanga muna nzila zampwena za mbanza zeto.’
27 Kansi okunuvutula vo, ‘Kizeye kwame ko kuna nutukidi. Nukatuka ova ngina, yeno awonso avangi a umpumbulu!’
28 I kuna kukala e dilu kieno yo nkweteso a meno, vava numona Abarayama yo Isaki yo Yakobo ye ngunza zawonso muna Kintinu kia Nzambi, vo i yeno kibeni nuvetelo kuna mbazi.
29 Kwiza bekwiza ana betuka kuna este ye weste, kuna node ye sude, bevuanda kuna meza muna Kintinu kia Nzambi.
30 Vena ye awana basukinini yau bevita, ye ana bavitidi yau besukinina.”
31 Muna ntangwa yayina, valueke Afarisi akaka, bamvovese vo: “Vaika, wakatuka mwamu, kadi o Erodi ozolele kuvonda.”
32 Ubavovese vo: “Nwenda samunwina mfwenge yayina vo, ‘Omono ivaikisa nkuya yo wuka mbevo, o unu yo mbazi, muna lumbu kietatu ifokola.’
33 Kansì tu, mfwete kangala o unu yo mbazi ye kiamene, kadi ke dilendi vangama ko* vo ngunza kavondelwa kuna mbazi a Yerusaleme.
34 E Yerusaleme, e Yerusaleme, on’ovondanga e ngunza, yo tubila awana katuminu o matadi—nkumbu nkwa yazolele konka o wan’aku nze una e nsusu ikonkelanga o wan’andi kuna nsi a mave! Kansi, oyeno ke nwazola wo ko.
35 Tala, e nzo eno ibembwelo kwa Nzambi. Inusamunwini vo, ke nukumbona diaka ko yavana nuvova vo: ‘Nkwa nsambu ndiona okwizilanga muna nkumbu a Yave!’”
Mvovo vana yand'a lukaya
^ Mutade i mbongo yakete-kete ikunwanga kuna Palestina. Ikulanga yo lwaka tezo kia meta 4 yo vaikisa ntayi zayingi.
^ Tezo kia yilu 10 ikotanga muna ‘nzongo ntatu mianene.’ Sina, “nzongo mia sea.” Sea mosi litro 7,33.
^ Yovo “ke dilendakana ko.”
