Luka 14:1-35
14 Lumbu kimosi vava kayenda muna nzo a mfidi mosi wa Afarisi muna lumbu kia Vundu, kenda dia, bankondelele.
2 Tala, vana kena vakedi muntu una ye kimbevo kia sulu.*
3 Yesu oyuvuidi ana batomene zaya Nsiku ye Afarisi vo: “Nga diansongi mu wuka muna lumbu kia Vundu yovo ve?”
4 Babutamene kwau. Umbongele, unsaswidi, unsindikidi.
5 I bosi ubavovese vo: “Nani vovo nwina, avo mwan’andi yovo ngombe ikobokele muna sima, vana vau kalembi kuntombola muna lumbu kia Vundu?”
6 Ke balendele kumvana mvutu ko muna diambu diadi.
7 I bosi, otele kingana kw’awana babokeleso, wau kamwene e nsola bayisolele e kunda yantete. Ubasamunwini vo:
8 “Avo obokeleso kwa muntu kuna nkinzi a longo, kuvuandi vana kunda kiantete ko. Dilenda kala vo muntu usundidi o zitu kabokelese.
9 I bosi, ndiona ubokelese okwiza yandi yo kuvovesa vo, ‘Sisila o muntu ndioyu e fulu.’ I bosi kuna nsoni zawonso okwenda vuanda vana fulu kiansuka.
10 Kansi avo obokeleso, nda vuanda vana fulu kiansuka, kimana ona ubokelese, avo wizidi, kavova vo, ‘E nkundi, tomboka vana ntandu.’ I bosi ozitiswa kw’awonso bevuanda yaku vana meza.
11 Kadi konso ona okuyitundidika, okululwa, konso ona okuyikulula, otundidikwa.”
12 Ovovele mpe kwa ndiona wambokelesa vo: “Avo olambisi e lambu yovo nlekelo, kubokelesa akundi aku ko, yovo mpangi zaku, yovo yitu yaku, ngatu mvuama za zunga kiaku. Kadi oyau mpe balenda kubokelesa, dikala se nsendo kwa ngeye.
13 Kansi avo olambisi e lambu, bokelesa asukami, avanguki, mbevo za malu ye mpofo;
14 ozevo u nkwa nsambu, kadi oyau ke bena y’eki bàsenda ko. Ngeye osendwa kuna lufuluku lwa ansongi.”
15 Omosi vana ven’awana bavuende yandi kuna meza, vava kawidi wo, umvovese vo: “Nkwa nsambu ona odila* muna Kintinu kia Nzambi.”
16 Yesu umvovese vo: “Muntu mosi walambisa e lambu diampwena, obokelese wantu ayingi.
17 Muna ntangw’a nlekelo, otumini ntaudi andi kenda zayisa ana babokeleswa vo, ‘Nwiza, kadi yawonso ikubamene.’
18 Kansi yau awonso bavavidi vakuba. Ona wantete umvovese vo, ‘Mpatu nsumbidi, mfwete kwenda yo tala; undoloka, kilenda kwiza ko.’
19 Wankaka ovovele vo, ‘Ngombe kumi* nsumbidi, se nkwenda zo fimpa; undoloka, kilenda kwiza ko.’
20 Owaka ovovele vo, ‘Wau kwandi nkazalele, dianu vo kilenda kwiza ko.’
21 I bosi, e ntaudi wizidi samunwina mfumu andi o mambu mama. O mfumu a nzo ofungidi makasi, ovovese ntaudi andi vo, ‘Wenda-wenda muna nzila zampwena ye zakete za mbanza, wabokela asukami, avanguki, mpofo ye mbevo za malu.’
22 I bosi ntaudi ovovele vo, ‘E mfumu, din’otumini, divangamene, kansi e fulu yakinu.’
23 O mfumu ovovese ntaudi vo, ‘Wenda muna mpambu za nzila ye muna belo, dodokela wantu beza kota kimana e nzo ame yazala.
24 Kadi inusamunwini vo, ke vena muntu ko vana vena awana babokelwa, oyeleka nlekelo ame.’”
25 Una kayendanga ye ndong’ayingi, ovilukidi, ubavovese vo:
26 “Avo muntu zolele kwiz’oku ngina, kalembi menga* se diandi, ngudi, nkaz’andi, wan’andi, mpangi ye nsanga zandi, musungula moyo andi, kalendi kala nlongoki ame ko.
27 Konso ona olembi nata nti andi ampasi* yo kwiz’andandi, kalendi kala nlongoki ame ko.
28 Kansi nani vovo nwina, avo ozolele tunga nzo e zulu, kalembi teka vuanda, kabadika e ntalu mu zaya kana vo una ye nzimbu zafwana mu manisa yo?
29 Dikwa kala vo okuba nkubilwa, kansi ke lenda yo manisa ko, ozevo awonso bemona yo, beyantika kunseva,
30 oku vo: ‘O muntu ndioyo oyantikidi o tunga, kansi kalendele manisa ko.’
31 Yovo nkia ntinu una ye 10.000 ma makesa, avo se kekwenda nwanisa ntinu akaka wina ye 20.000 ma makesa, kalembi teka vuanda, kavanga mfulu kana vo olenda kunsunda?
32 Avo kelenda ko, ekolo ntinu ndioyo kekala kuna vala, otuma nkunzi miandi benda vanga ungudi.
33 Diau adimosi, konso ona olembi yambula mavua mandi mawonso, kalendi kala nlongoki ame ko.
34 “O mungwa wambote. Kansi, avo ukatukidi nzenzo andi, mu nki uzenzeselwa?
35 Ke ufwene diaka sadilwa ko muna ntoto, ngatu sadilwa se mbole. O wantu veta bevetanga wo. Ndiona una ye matu manwe, yambula kawa.”
Mvovo vana yand'a lukaya
^ Kimbevo kiwutisanga maza mu malu.
^ Sina, “odia mbolo.”
^ Yovo “vangu tanu ya ngombe.”
^ Yovo “kakulula o zola muna.”
^ Tala Nsas’a Mvovo.
