Luka 15:1-32
15 Avakulwisi a mpaku ye asumuki awonso banzietele kimana banwa.
2 Afarisi ye asoneki bayidimini, oku vo: “Muntu ndioyu otambulanga asumuki yo dia yau.”
3 Ubatelele kingana eki, oku vo:
4 “Nkia muntu vovo nwina, una ye 100 mameme, kavidis’e dimosi, kalembi sisa 99 vana nzanza, kenda vavi dina divididi yavana kesolola dio?
5 Vava kasolwele dio, osidi dio vana vembo ye kiese kiawonso.
6 Una kalueke kuna nzo, obokele akundi andi, y’esi belo kiandi, ubavovese vo, ‘Nunkembesa, kadi e meme diame diavila, nsolwele dio.’
7 Inusamunwini vo, kiese kiayingi mpe kikala kuna zulu muna diambu dia nsumuki mosi ovilukidi o ntima, ke mu 99 lwa wantu ansongi ko ana ke bena yo mfunu a luviluku lwa ntima ko.
8 “Yovo nkia nkento una ye drakima kumi, avo ovidisi drakima mosi, kalembi kwika mini, kakomba nzo andi, katoma vava yavana kesolola yo?
9 Vava kasolwele yo, obokele akundi andi,* y’esi belo kiandi, oku vo, ‘Nunkembesa, kadi e drakima ina mvidisi, nsolwele yo.’
10 Inusamunwini vo, kiese kia mpila yayi kikala vana vena mbasi za Nzambi, muna diambu dia nsumuki mosi ovilukidi o ntima.”
11 Ovovele diaka vo: “Muntu mosi wakala yo wana wole amakala.
12 Oyu wanleke ovovese se diandi vo, ‘E Tata, umpana e kiame kunku kina mfwete tambula muna mavua maku.’ Ubakayanisi mavua mandi.
13 Ke vavioka lumbu yayingi ko, oyu wanleke okutikidi lekwa yandi yawonso, wele kuna nsi yandá, kuna kafwasidi mavua mandi muna zingu kia umpumbulu.*
14 Vava kamene fwasa yawonso, mulueke mvengele ampasi muna nsi yayina, osukamene.
15 Wele laminina mwisi nsi yayina, ona wantuma muna mpatu andi, kenda vungula ngulu.
16 Ozolele nkutu dia madia ma ngulu, kadi ke muntu ko wankayilanga.
17 “Vava kayibenze, ovovele vo, ‘Asadi a se diame bena ye ulolo wa madia, ekolo mono mfwang’e nzala!
18 Mfwete telama, ngienda kwa se diame, yamvovesa vo: “E Tata, nsumukini Nzambi kuna zulu, y’oku ndose aku.
19 Kifweno yikilwa diaka mwan’aku ko. Unkitula mosi muna asadi aku.”’
20 Otelamene, wele kwa se diandi. Wau kakedi kuna vala, o se diandi umwene, umfwididi e nkenda, olundumukini, umbimbakene,* umfibidi.
21 O mwana umvovese vo, ‘E Tata, nsumukini Nzambi kuna zulu, y’oku ndose aku. Kifweno yikilwa diaka mwan’aku ko.’
22 Kansi o se ovovese ntaudi zandi vo, ‘Nuzabuzioka! Nutwasa mvuatu una usundidi, numvuika, nunsia mpeto muna nlembo, ye nsampatu muna malu mandi.
23 Nutwasa mpe mwan’a ngombe amazi, nwamvonda, twadia yo kemba,
24 kadi o mwan’ame ona wafwa, kansi wina diaka yo moyo; ona wavila, osolokele.’ Bayantikidi kemba.
25 “O mwan’andi ambuta kuna mpatu kakele, una kezidi finam’e nzo, owidi nkunga yo makinu.
26 Obokele mosi muna asadi, oyuvuidi kana nkia diambu divangamanga.
27 Umvovese vo, ‘O nleke aku wizidi, o se diaku ovondele mwan’a ngombe amazi, kadi untambwidi yo vimpi wambote.’*
28 Ofungidi makasi, kazolele mo kota ko. I bosi, o se diandi ovaikidi, oyantikidi kundodokela.
29 Ovutwidi kwa se diandi vo, ‘Tala e mbidi a mvu yakusadila, kiakolamene nkutu nkanikinu aku ko, kansi mono kuvani kana nkutu mwan’a nkombo yakembela y’akundi ame.
30 Kansi, wau kezidi o mwan’aku ndioyo, ona wafwasa* mavua maku ye minta-zumba, umvondèle o mwan’a ngombe amazi.’
31 Umvovese vo, ‘E mwana, ongeye okalanga yame ntangwa zawonso, o vua kwame kwawonso i kwaku.
32 Dianu vo diambote twakemba kweto, twamon’e kiese, kadi o nleke aku ona wafwa, kansi wina diaka yo moyo; ona wavila, osolokele.’”
Mvovo vana yand'a lukaya
^ Yovo “akw’andi akento.”
^ Yovo “uzowa.”
^ Sina, “bimbakene nsingu andi.”
^ Yovo “wamoyo.”
^ Sina, “wadia.”
