Luka 16:1-31
16 I bosi ovovele mpe kw’alongoki vo: “Vakedi mvuama mosi wakala ye selo* kiafundwa vo vua kwandi kafwasidinge.
2 Umbokele, unyuvuidi vo, ‘Adieyi ngwidi mu kuma kiaku? Tá mbalu wa kiselo kiaku, kadi kulendi lunga-lunga diaka nzo ame ko.’
3 I bosi, o selo wiyivovese vo, ‘Aweyi mpanga, wau vo mfumu ame katula kekunkatul’o uselo? Kina ye ngolo zavata ko, o lomba nsoni imwena ko.
4 Nzeye dina mvanga, kimana wantu bantambula muna nzo zau avo nkatwilu uselo.’
5 Obokele e mindia-mfuka mia mfumu andi, mosi-mosi; ovovese ona wantete vo, ‘Ntalu kwa wadia kwa mfumu ame?’
6 Ovutwidi vo, ‘Nkam’a nzongo* mia mazi ma olive.’ Umvovese vo, ‘Tambula nkand’aku a mfuka, vuanda, wasoneka-soneka 50.’
7 Ovovese wankaka vo, ‘Ntalu kwa wadia?’ Ovovele vo, ‘Nkam’a nzongo* mia masa.’ Umvovese vo, ‘Tambula nkand’aku a mfuka wasoneka 80.’
8 O mfumu osanisini selo kiandi kana una vo wakondwa unsongi, kadi dia lulungalalu* kavangidi; e kuma kadi, o wan’a tandu* kiaki baviokele mbandu au o lungalala ke mu wan’a ntemo ko.
9 “Omono inusamunwini mpe vo: Nuyivangila yikundi muna umvuama wa vilwa kimana avo usukidi, banutambula muna nzo za mvu ya mvu.
10 Ona wina ye kwikizi muna mambu makete, wina mpe ye kwikizi muna mambu manene, ona okondelo kwikizi muna mambu makete, okondelo mpe kwikizi muna mambu manene.
11 Dianu vo, avo nukondelo kwikizi muna umvuama wa vilwa, nani okunuyekeka owu waludi?
12 Avo nukondelo kwikizi muna umvuama wangani, nani okunuvana owu wayeno kibeni?
13 Ke vena selo ko kilenda sadila mfumu zole, kadi omenga mosi yo zola wankaka, yovo otatidila mosi yo bembola wankaka. Ke nulendi sadila Nzambi ye Umvuama ko.”
14 Afarisi bena vo minzola-nzimbu vava bawidi mambu mama mawonso, bayantikidi kumveza.
15 Dianu kabavovesele vo: “I yeno yana nukuyilungisanga vana vena wantu, kansi o Nzambi ozeye ntima mieno. Kadi dina ditundidikwanga kwa wantu, diangemi vana ndose a Nzambi.
16 “O Nsiku ye Ngunza zakala yamuna Yoane. Tuka muna kolo kiakina, e nsangu zambote za Kintinu kia Nzambi zisamunwanga, wantu a mpila zawonso besianga ngolo za kota mo.
17 Kieleka, diasazu e zulu ye nza yavioka, ke mu fisono fimosi ko fia Nsiku fialembi lungana.
18 “Konso yakala ovonda longo yo nkaz’andi yo sompa wankaka, zumba katele, konso ona osompa nkento wavonda longo yo nkaz’andi, zumba katele.
19 “Vakedi mvuama mosi, wavuatanga nlele a nduwa ye lino, wazolanga nkembo lumbu yawonso.
20 Vakala mpe nlombi, nkumbu andi Lazaro, nkwa mputa zayingi, wasiwanga vana mwelo a nzo andi,
21 wazolanga vo kadia ina yasotokanga vana meza ma mvuama. E mbwa zayiza vendanga mputa zandi.
22 Kuna kwalanda, o nlombi ofwidi, oneto kwa ambasi vana ndambu a Abarayama.*
“I bosi, o mvuama mpe ofwidi, ozikilu.
23 Wau kakedi muna lubangamu muna Ziami,* osengwele o meso omwene Abarayama kuna vala yo Lazaro vana ndambu* andi.
24 Obokele, oku vo, ‘E Tata Abarayama, umfwa nkenda, tuma Lazaro kenda vunga nsuk’a nlembo andi muna maza, kavolesa lubini luame, kadi mbangamene mu nlaku a tiya twatu.’
25 Abarayama ovutwidi vo, ‘E mwana, sungamena vo una wakala yo moyo má yambote wakala yau, kansi Lazaro má yambi katambulanga. Owau mu fiaulwiswa kena okwaku, kansi ongeye obangamene.
26 Vana ntandu, mbilu ampwena yasiwa ova kati kwa yeto yo yeno, kimana ana bena vava bazolele kwiza koko nwina, ke balendi wo ko, ngatu ana bena koko, beza kwa yeto.’
27 I bosi, oyandi ovutwidi vo, ‘E tata, do, untuma kuna nzo a se diame,
28 kadi abunzi tanu ngina yau, kenda kubasìla umbangi, kimana balembi kwiza oku fulu kiaki kia lubangamu.’
29 Kansi, Abarayama ovovele vo, ‘Bena yo Mose ye Angunza; yambula babawa.’
30 Ovutwidi vo, ‘Ke wau ko, e tata Abarayama, kansi, avo muntu otukidi omu mafwa wele kwa yau, bevilukw’e ntima.’
31 Umvovese vo, ‘Avo ke bewila Mose ye Angunza ko, kana nkutu muntu ofulukidi muna mafwa, ke bekunkwikila ko.’”
Mvovo vana yand'a lukaya
^ Yovo “ntaudi a nzo.”
^ Yovo “nzongo mia bata.” Litro 22 zikotanga muna nzongo mosi wa bata.
^ Yovo nkam’a kore. 2.200 ma litro zikotanga muna kore mosi.
^ Yovo “ngangu.”
^ Tala Nsas’a Mvovo.
^ Sina, “vana tulu kia Abarayama.”
^ Muna Kingerekia, “Hades.” Tala Nsas’a Mvovo.
^ Sina, “vana tulu kiandi.”
