Luka 17:1-37
17 I bosi, ovovese alongoki andi vo: “Mambu metesesa wantu e sakuba kwiza kaka mekwiza. Kansi, tâtu kwa ndiona mekwizila!
2 Diambote kwa yandi avo ozembelekwa tadi dianene muna laka, katubwa muna mbu, ke mu tesesa sakuba ko kwa mosi mun’awaya andwelo.
3 Nutoma kuyilunga-lunga kweno. Avo mpangi aku usumukini, untumba, avo ovilukilu o ntima, unloloka.
4 Avo nsumuka nsambwadi kekusumukina muna lumbu kimosi, yo kuvutukila nkumbu nsambwadi, oku vo, ‘Mpilukidi o ntima,’ ofwete kunloloka.”
5 Antumwa bavovese Mfumu vo: “Utukudikila lukwikilu.”
6 O Mfumu ovovele vo: “Avo lwina yo lukwikilu nze disu dia mutade,* nulenda vovesa nti wau wa sikamina vo, ‘Vuzuka, wakununuka muna mbu!’ ukunulemvokela.
7 “Nani vovo nwina, una ye ntaudi ovatanga yovo ovungulanga e kambi, avo otombokele muna mpatu, kamvovesa vo, ‘Wiza-wiza oku meza wadia’?
8 Ozevo, nga ke kumvovesa ko vo, ‘Nda kubika madia mame, vuata nlele aku a salu, wansadila yavana idia yo nua, i bosi ongeye odia yo nua’?
9 Nga tonda ketonda ntaudi yayina, wau kavangidi dina kavoveso e?
10 Diau adimosi mpe, oyeno avo nuvangidi mawonso nuvoveso, nuvova vo: ‘Yeto tu ntaudi zakondwa mfunu. Tuvangidi mana tufwete vanga.’”
11 Una kayelenge kuna Yerusaleme, oviokele muna mwingilu a Samaria ye Ngalili.
12 Una se kekota muna vata dimosi, kumi dia wantu, akwa wazi bezidi kunkika, batelamene kuna vala.
13 Batumbwidi ndinga, oku vo: “E Yesu, e Nlongi, utufwil’e nkenda!”
14 Vava kabamwene, ubavovese vo: “Nwenda kuyisonga kwa anganga.” I bosi, una bekwendanga, bavelele.
15 Mosi muna yau, vava kamwene wo vo osasukidi, ovutukidi, okembelele Nzambi muna nding’angolo.
16 Ofukamene vana malu ma Yesu, untondele, kana una vo mwisi Samaria kwandi.
17 Yesu ovutwidi vo: “Nga ke kumi ko diveleleso e? Ozevo, evua akweyi bena?
18 Ke mosi ko ovutukidi kakembela Nzambi, ndioyo kaka mwisi kanda diankaka?”
19 I bosi, umvovese vo: “Telama, wenda kwaku; lukwikilu lwaku lusaswidi.”
20 Wau kayuvuilu kwa Afarisi kana nkia ntangwa kikwiz’e Kintinu kia Nzambi, ubavutwidi vo: “E Kintinu kia Nzambi vava kikwiza ke kimoneka ko;
21 ngatu wantu bavova vo, ‘Tal’oku!’ yovo ‘Kuna!’ Kadi, e Kintinu kia Nzambi ova kati kweno i kina.”
22 I bosi, ovovele kw’alongoki vo: “E lumbu ikwiza, ina nukala ye tima dia mona lumbu kimosi muna lumbu ya Mwan’a muntu, kansi ke numona kio ko.
23 Wantu bekunuvovesa vo, ‘Tala kuna!’ yovo ‘Tal’oku!’ Ke nuvaiki ko, ke nubalandi ko.
24 Kadi nze una nsemo utemenanga kuna sambu dimosi dia zulu yo mwesesa yakuna sambu diankaka dia zulu, i una ukal’o Mwan’a muntu muna lumbu kiandi.
25 Kansi, kafwete teka mona mpasi zayingi, yo bembolwa kwa mbandu yayi.
26 Wauna wakala muna lumbu ya Noa, i una mpe ukala muna lumbu ya Mwan’a muntu:
27 badianga, banuanga, akala basompanga, akento basompeswanga, yamuna lumbu kiakota Noa muna nzaza, e Kizalu kiakwiza, kiafwasa yau awonso.
28 Diau adimosi mpe muna lumbu ya Loti: badianga, banuanga, basumbanga, batekanga, bakunanga, batunganga.
29 Kansi muna lumbu kiavaika Loti muna Sodomo, kianoka tiya yo nlengo watuka kuna zulu, wafwasa yau awonso.
30 I wau mpe ukala muna lumbu kisengomok’o Mwan’a muntu.
31 “Muna lumbu kiakina, ona owanuka vana nludi a nzo, kakulumuki ko mu kwenda bonga salanganu yandi ina muna nzo, diau dimosi mpe, ona owanuka kuna mpatu, kavutukila ko ina kasisidi ku nima.
32 Nusungamena nkaz’a Loti.
33 Konso ona ovava vuluza moyo andi, vidisa kevidisa wo, kansi ona ovidisa wo, zingisa kezingisa wo.
34 Inusamunwini vo, muna fuku wauna, wantu wole bekala vana mfulu mosi; mosi obongwa, wankaka obembolwa.
35 Akento wole betuta muna su kimosi; mosi obongwa, wankaka obembolwa.”
36 ——
37 Bamvutwidi vo: “Akweyi, e Mfumu?” Ubavovese vo: “Konso kuna kwina e fwila, i kwau kuna kulungalakena mbemba.”
Mvovo vana yand'a lukaya
^ Mutade i mbongo yakete-kete ikunwanga kuna Palestina. Ikulanga yo luaka tezo kia meta 4 yo vaikisa ntayi zayingi.
