Luka 18:1-43
18 I bosi, muna kubasonga mfunu wazindalala muna sambu yo lembi yoya, ubatelele kingana,
2 oku vo: “Muna vata dimosi mwakala mfundisi walembi vuminanga Nzambi, ngatu zitisa muntu.
3 Mwakala mpe nkento wafwilwa yakala muna vata diadina wayendanga kwa yandi, oku vo, ‘Undungisa kwa ntantu ame.’
4 Kuna lubantiku kazola wo ko, kansi kuna kwalanda uvovele vo, ‘Kanele vo kivuminanga Nzambi ko, ngatu zitisa muntu,
5 wau vo nkento ndioyu wafwilwa yakala okwamanananga kuntokanesa, ikunlungisa kimana kayambula kuntokanesa muna ndomb’andi.’”
6 I bosi, Mfumu ovovele vo: “Nuwa, owu uvovele mfundisi, kana una vo nkwa vilwa!
7 O Nzambi, nga kalendi lungisa awana kasola ko, ana bekumbokelanga fuku yo mwini, wau kekubasonganga ntim’avunda mbidi a kolo e?
8 Inusamunwini vo, oyambula vo balungiswa-lungiswa. Kansi, o Mwan’a muntu vava kekwiza, nga owana kikilu lukwikilu* ova nza?”
9 Otele mpe kingana eki kw’awana bebundang’e vuvu muna unsongi wa yau kibeni, y’awana bevezanga ankaka:
10 “Wantu wole batomboka kuna tempelo basamba, omosi Mfarisi, owaka mvakulwisi a mpaku.
11 O Mfarisi otelamene, osambidi vo, ‘E Nzambi, itondele, kadi kina nze wantu awaya ko—mivi, avilwa, minta-zumba—musungula mvakulwisi a mpaku ndioyu.
12 Muna lumingu, lumbu yole ifionkononanga;* ivanang’e tini kiekumi muna yawonso mbakanga.’
13 Kansi, o mvakulwisi a mpaku, otelamene kuna vala, kazolele nkutu sengola meso ku zulu ko, tulu kiandi kaka kabundidinge, oku vo, ‘E Nzambi, umfwil’e nkenda, i nsumuki kwame.’
14 Inusamunwini vo, muntu ndioyo okulumukini kuna nzo andi se nkwa unsongi ke mu Mfarisi ko. Kadi konso ona okuyitundidika, okululwa, kansi konso ona okuyikulula, otundidikwa.”
15 O wantu bantwasidi mpe yingiana-ngiana kimana kabasimba, kansi alongoki wau bamwene wo, bayantikidi kubasima.
16 Yesu obokelese yingiana-ngiana, ovovele vo: “Nuyambula yingiana-ngiana yiza kwa mono, ke nubasimi ko, kadi e Kintinu kia Nzambi kia awana bena nze yingiana-ngiana yayi.
17 Kieleka inuvovese vo, konso ona olembi tambula Kintinu kia Nzambi nze kingiana-ngiana, ke kota mo nkutu ko.”
18 Mfidi mosi wa Ayuda unyuvuidi vo: “E Nlongi Ambote, adieyi mfwete vanga muna vua moyo a mvu ya mvu?”
19 Yesu umvovese vo: “Ekuma ungikidi vo wambote? Ke vena muntu ambote ko, Nzambi kaka.
20 E nkanikinu ozeye mio: ‘Kute zumba ko, kuvondi ko, kuyiyi ko, kusie kimbangi kia luvunu ko, zitisa se diaku yo ngudi aku.’”
21 Ovutwidi vo: “Omama mawonso ilundanga mo tuka muna kileke kiame.”
22 O Yesu vava kawidi wo umvovese vo, “Diambu dimosi okondelo: Teka yawonso una yau yo vana nzimbu kw’asukami, okala yo lusalu kuna zulu; wiz’andandi.”
23 Vava kawidi wo, okendalele kikilu, kadi mvuama kakala.
24 O Yesu untadidi, ovovele vo: “Diampasi kw’awana bena ye nzimbu mu kota muna Kintinu kia Nzambi!
25 Kieleka, diasazu kwa samo kaviokela muna disu dia ntumbu, ke mu mvuama ko kakota muna Kintinu kia Nzambi.”
26 Awana bawidi wo, bavovele vo: “Nani olenda vuluzwa?”
27 Ovutwidi vo: “Mana ke malendakana ko kwa wantu, malendakana kwa Nzambi.”
28 Kansi Petelo ovovele vo: “Oyeto tusisidi lekwa yeto yo kulanda.”
29 Ubavovese vo: “Kieleka inuvovese vo, ke vena ona wasisa nzo ko yovo nkaz’andi yovo mpangi zandi yovo se ye ngudi, yovo wana, muna diambu dia Kintinu kia Nzambi,
30 kalembi tambula yayingi omu kolo kiaki, muna tandu* kikwiza, moyo a mvu ya mvu.”
31 I bosi, obongele yau Kumi ye Zole, ubavovese vo: “Wau se tutomboka kuna Yerusaleme, o mambu mawonso masoneka angunza mu kuma kia Mwan’a muntu melungana.
32 Oyekolwa vana moko ma esi zula,* osakanenwa, otiangunwa yo vuminwa mete.
33 Bekunzwabula mpe, yo kumvonda, kansi muna lumbu kietatu ofuluka.”
34 Kansi, ke basidi bakula kana diambu dimosi ko, kadi e nsas’a mvovo miami yaswekama kwa yau, ke babakwidi mana kavovelo ko.
35 Una Yesu kafinamene kota muna Yeriko, vakedi mpofo ifongele vana mbel’a nzila, ilombanga.
36 Wau kawidi ndonga iviokanga, oyuvuidi kana nkia diambu.
37 Bansamunwini vo: “Yesu wa Nazarete oviokanga!”
38 Obokele vo: “E Yesu, e Mwan’a Davidi, umfwil’e nkenda!”
39 Ana bavitidi kuna ntwala bansimini kimana kabutama, vo i yandi, osakisi oboka vo: “E Mwan’a Davidi, umfwil’e nkenda!”
40 Yesu oningamene, oyikidi vo katwaswa vana kena. Vava kaluaka, unyuvuidi vo:
41 “Adieyi ozolele yavanga kwa ngeye?” Umvutwidi vo: “E Mfumu, yambula yamona diaka.”
42 O Yesu umvovese vo: “Mona kwaku; lukwikilu lwaku lusaswidi.”
43 Vana vau omwene, oyantikidi kunlanda, okembele Nzambi. O nkangu awonso wau bamwene wo, basanisini Nzambi.
Mvovo vana yand'a lukaya
^ Yovo “lukwikilu lwa mpila yayi.”
^ Yovo “mina nsoki.” Tala Nsas’a Mvovo.
^ Tala Nsas’a Mvovo.
^ Awana bena vo ke Ayuda ko.
