Luka 19:1-48
19 I bosi, Yesu okotele muna Yeriko, wau kelutanga,
2 mukedi muntu nkumbu andi Zakai; mvuama kakala ye mfumu wa avakulwisi a mpaku.
3 Edi kavavanga vo kamona Yesu una kena, kansi kalenda wo ko mu kuma kia ndonga, wau vo ntel’andi wankufi.
4 Dianu vo wele ntinu kuna ntwala, omente muna nsanda kimana kamona Yesu, kadi i nzila ina keviokela.
5 Vava Yesu kalueke vana fulu kiakina, osengwele o meso, umvovese vo: “E Zakai, kulumuka-kulumuka, kadi o unu muna nzo aku inangina.”
6 Okulumukini-kulumukini, untambwidi muna nzo andi kuna kiese.
7 Awonso vava bamwene wo, bayantikidi yidima, oku vo: “Okotele muna nzo a nsumuki.”
8 Zakai otelamene, ovovele kwa Mfumu vo: “E Mfumu, e bula-kati kia salanganu yame, se mvana kio kw’asukami, konso kina yakutumuna* kwa muntu, iyá ikumvutulwila.”
9 Yesu umvovese vo: “O unu luvuluku luizidi omu nzo yayi, kadi ongeye mpe u mwan’a Abarayama.
10 O Mwan’a muntu wizidi vavi yo vuluza ana bavila.”
11 Wau bawidi mambu mama, otele kingana kiankaka, kadi ofinamene kuna Yerusaleme, oyau edi babenze vo, e Kintinu kia Nzambi se kikwiza vana vau.
12 Ovovele vo: “Nkwa tunda wayenda kuna nsi anda, kimana kayadikwa kintinu, i bosi kavutuka kwandi.
13 Obokele ntaudi zandi zau kumi, ubavene mina* kumi, ubavovese vo, ‘Nwenda zo kitila kweno yavana nkwiza.’
14 Kansi esi nsi andi bansawidi, bantumini akunzi, oku vo, ‘Ke tuzolele ko vo muntu ndioyo katuyala.’
15 “Una kayadikwa e kintinu, ovutukidi, obokele ntaudi zandi, zina kavana e nzimbu,* kazaya kana nkia nluta babakidi.
16 Ona wantete wizidi kuyisunzula, oku vo, ‘E Mfumu, e mina aku, mina kumi ilutidi.’
17 Umvovese vo, ‘Otomene sala, u ntaudi ambote! Wau vo osongele kwikizi muna diambu diandwelo, ovua wisa kia mavata kumi.’
18 Ona wanzole wizidi, oku vo, ‘E Mfumu, e mina aku, mina tanu ilutidi.’
19 Umvovese diau adimosi, ‘Ongeye mpe okala ye wisa kia mavata tanu.’
20 Kansi, wankaka wizidi, oku vo, ‘E Mfumu, tala mina aku, ina yalunda vana nlele.
21 Wonga imwenene, kadi u nkwa ntim’ambadi; obonganga ina kulundidi ko, okutikanga ina kukunini ko.’
22 Umvovese vo, ‘Muna mvovo miaku ikufundisila, u ntaudi ambi. Ozeye wo kwaku vo mono i nkwa ntim’ambadi, ibonganga ina kilundidi ko, ikutikanga ina kikunini ko.
23 Ekuma walembi tambikila nzimbu zame* kw’akiti? Ozevo, wau ngizidi, nga ntambwidi e nzimbu zame ye nluta.’
24 “Ovovese ana batelamene vavana vo, ‘Numbonga e mina, nuvana yo kwa ndiona wina ye mina kumi.’
25 Kansi, bamvovese vo, ‘E Mfumu, mina kumi kena zau!’—
26 ‘Inusamunwini vo, konso ona una ye lekwa, yayingi kevewa, kansi ndiona kena ye lekwa ko, kina kena kiau nkutu, katulwa kikunkatulwa.
27 Vo i atantu ame, ana ke bazolele ko vo yabayala, nubatwasa oku, nubavondela ova ndose ame.’”
28 Vava kavovele mambu mama, oviokele kuna ntwala, wele atomboki kuna Yerusaleme.
29 Una kafinamene muna Betefangi ye Betania vana mongo uyikilwanga vo Mongo a Olive, otumini alongoki wole,
30 oku vo: “Nwenda muna vata dina kuntwala, vava nuluaka mo, nuwana mwan’a buluku wakangidilwa, ona kafongelo nkutu kwa muntu ko. Nunkutulula yo kuntwasa.
31 Avo muntu okunuyuvula vo, ‘Ekuma nukunkutulwilanga?’ Nuvova vo, ‘Mfumu ovuidi dio mfunu.’”
32 Ana batumwa bele, bawene dio wauna kabavovese.
33 Una bekutululanga mwan’a buluku, ana bamvuidi babayuvuidi vo: “Ekuma nukutulwilanga mwan’a buluku?”
34 Bavovele vo: “Mfumu ovuidi dio mfunu.”
35 Batwese dio kwa Yesu, basidi mvuatu miau vana mwan’a buluku, Yesu ovuende vana buluku.
36 Una se kekwendanga, bayalumwini mvuatu miau muna nzila.
37 Una kafinamene vana nkulumuka a Mongo a Olive, e bidi diawonso dia alongoki bamwene kiese, bayantikidi sanisina Nzambi muna nding’angolo mu kuma kia mavangu mawonso mankuma oma bamwene,
38 oku vo: “Nkwa nsambu, o Ntinu, ona okwizilanga muna nkumbu a Yave! Luvuvamu koko zulu, nkembo kuna kayengele!”
39 Kansi, akaka Afarisi bakala muna ndonga, bamvovese vo: “E Nlongi, tumba alongoki aku.”
40 Kansi, ovutwidi vo: “Inusamunwini vo, awaya, avo babutamene, matadi nga makazidi.”
41 Vava kafinamene, omwene e mbanza, odidìdi yo,
42 oku vo: “Kala vo ngeye kibeni wabakula omu lumbu kiaki, oma ma luvuvamu—kansi owau maswekamene omu meso maku.
43 Kadi e lumbu ikwiza, ina vo atantu aku bekuzieta o lûmbu lwangolo lwa nti miasongoka, bekuzunga, bekubangika muna ndambu zawonso.
44 Bekutuba va ntoto yo wan’aku, ke musiswa tadi vana ntandu a tadi ko omu ngeye, wau olembele zaya kolo kia nkingulw’aku.”
45 I bosi okotele muna tempelo, ovaikisi awana batekelenge,
46 ubavovese vo: “Diasonama vo, ‘E nzo ame ikala nzo a sambu,’ kansi oyeno nukitwidi yo se nzo a mivi.”
47 Walongelanga muna tempelo e lumbu yawonso. E nganga zambuta y’asoneki ye mbuta za nkangu, bavavidi okumvonda;
48 kansi ke bamwene owu bavangila wo ko, kadi o nkangu awonso unzietele mu kunwa.
Mvovo vana yand'a lukaya
^ Yovo “kutumuna muna mfundu a luvunu.”
^ Mina ya Ngerekia 340 za grama yazitanga. Mina mosi i 100 drakima.
^ Sina, “palata.”
^ Sina, “palata ame.”
